തൃശൂര്‍- റോഡിലെ കുഴികാരണം അപകടം സംഭവിക്കുകയും മരണമുണ്ടാവുകയും ചെയ്യുന്നത് തുടര്‍ സംഭവങ്ങളായി സംസ്ഥാനത്ത് മാറിക്കൊണ്ടിരിക്കെ ജനങ്ങള്‍ക്ക് താങ്ങായ തീരുമാനവുമായി തൃശൂര്‍ ജില്ലാ കലക്ടര്‍ രംഗത്ത്. തൃശൂര്‍ ജില്ലയിലെ റോഡുകളിലെ കുഴികള്‍ അടിയന്തരമായി അടക്കുകയും അപകടകരമായ സാഹചര്യം ഒഴിവാക്കുകയും ചെയ്യണമെന്ന് ആവശ്യപ്പെട്ട തൃശൂര്‍ ജില്ലാ കലക്ടര്‍ അര്‍ജുന്‍ പാണ്ഢ്യന്‍ ഇക്കാര്യത്തില്‍ ഉടന്‍ നടപടി ആവശ്യപ്പെട്ട് ബന്ധപ്പെട്ട വകുപ്പുകള്‍ക്ക് നിര്‍ദ്ദേശവും നല്‍കി. റോഡിലെ കുഴികള്‍ മൂലം എന്തെങ്കിലും അപകടം സംഭവിച്ചാല്‍ ബന്ധപ്പെട്ട ഉദ്യോഗസ്ഥര്‍ക്കും കരാറുകാര്‍ക്കുമെതിരെയാണ് നടപടിയുണ്ടാവുക. ദുരന്തനിവാരണനിയമം 2005 ലെ സെക്ഷന്‍ 51 (ബി) പ്രകാരം നിയമ നടപടി സ്വീകരിക്കും. കുറ്റകരമായ അനാസ്ഥമൂലം അപകടങ്ങള്‍ സംഭവിക്കുകയാണെങ്കില്‍ ബിഎന്‍എസ് സെക്ഷന്‍ 125, 106 ഉള്‍പ്പെടെയുള്ള ശിക്ഷാനടപടികളുമായി മുന്നോട്ട് പോകുന്നതിന് പൊലീസിനും നിര്‍ദ്ദേശം നല്‍കിയതായി ജില്ലാ കളക്ടര്‍ അറിയിച്ചു.
തൃശൂര്‍ ജില്ലയിലെ വിവിധ ഭാഗങ്ങളിലുള്ള റോഡുകളിലെ അറ്റകുറ്റപ്പണികള്‍ അടിയന്തരമായി പൂര്‍ത്തിയാക്കി റോഡിലെ അപകടാവസ്ഥ ഒഴിവാക്കുന്നതിന് ജനുവരി 16 നും ജൂണ്‍ 20 നും ചേര്‍ന്ന ജില്ലാ റോഡ് സുരക്ഷാ സമിതി യോഗങ്ങളിലും 2024 ഡിസംബര്‍ 2 നും 2025 മാര്‍ച്ച് 13 നും ഏപ്രില്‍ 10 നും ചേര്‍ന്ന ജില്ലാ ദുരന്തനിവാരണ അതോറിറ്റി യോഗങ്ങളിലും നിര്‍ദ്ദേശം നല്‍കിയിരുന്നുവെന്നും ബന്ധപ്പെട്ടവര്‍ വിശദീകരിച്ചു. എന്നാല്‍ ഇത് പല സ്ഥലങ്ങളിലും പാലിച്ചതായി കാണുന്നില്ലെന്നും കലക്ടര്‍ വ്യക്തമാക്കി. റോഡിലെ കുഴികള്‍ മൂലം നിരവധി അപകടങ്ങള്‍ റിപ്പോര്‍ട്ട് ചെയ്യുന്ന സാഹചര്യമാണുള്ളത്. ജില്ലയിലെ എല്ലാ റോഡിലേയും കുഴികള്‍ അടക്കണം. അപകടകരമായ രീതിയിലുള്ള കുഴികള്‍ അടച്ച് ഗതാഗത സൗകര്യം സുഗമമാക്കണം. അപകടസാഹചര്യം ഒഴിവാക്കുന്നതിനു വേണ്ട സത്വര നടപടികള്‍ അടിയന്തരമായി സ്വീകരിക്കേണ്ടതാണെന്നും ജില്ലാ കളക്ടര്‍ ബന്ധപ്പെട്ട അധികൃതര്‍ക്ക് നല്‍കിയ നിര്‍ദ്ദേശത്തില്‍ വിശദീകരിക്കുന്നു.