ഷാർജ– ഷാർജയിൽ ആത്മഹത്യ ചെയ്ത കൊല്ലം കൊട്ടാരക്കര സ്വദേശിനി വിപഞ്ഞികയുടെ കുഞ്ഞിൻ്റെ സംസ്കാരം ദുബൈയിൽ വെച്ച് നടത്താൻ തീരുമാനിച്ചതിൽ പ്രതികരണവുമായി കുടുംബം.കുഞ്ഞിൻ്റെ സംസ്കാരം വൈകുന്നത് ഒഴിവാക്കാനാണ് വിട്ടുവീഴ്ച്ച ചെയ്തതെന്നും ഇനിയും മൃതദേഹം ഫ്രീസറിൽ വെച്ച് കൊണ്ടിരിക്കാൻ വയ്യെന്നുമാണ് അറിയിച്ചത്.
“ഇനിയും എന്‍റെ പൊന്നുമക്കളുടെ മൃതദേഹങ്ങൾ വെച്ച് കളിക്കാൻ ഞങ്ങൾ തയ്യാറല്ല. ഇത് വരെ മൃതദേഹം ഒന്ന് കാണാൻ പോലും കഴിഞ്ഞിട്ടില്ല. ആരോടും ഒരു എതിർപ്പുമില്ല. കുഞ്ഞിനെ വെച്ച് മൽസരിച്ച് ഒന്നും നേടാനുമില്ല. കുഞ്ഞിൻ്റെ അച്ഛൻ്റെ അവകാശങ്ങൾ മാനിക്കുന്നു” യുവതിയുടെ മാതാവ് ഷൈലജയുടെയും സഹോദരൻ വിനോദിന്റെയും ഹൃദയഭേദകമായ വാക്കുകളാണിത്. കഴിഞ്ഞ ദിവസം ദുബൈ ഇന്ത്യൻ കോൺസുലേറ്റിൽ ഇരുവരുമായും വിപഞ്ചികയുടെ ഭർത്താവ് നിതീഷിന്റെ ബന്ധുക്കളുമായി നടന്ന ചർച്ചയിൽ കോടതി വിധി ഷൈലജയും വിനോദും അംഗീകരിക്കുകയായിരുന്നു.
വിപഞ്ചികയുടെ ഒന്നര വയസ്സ് മാത്രമുള്ള മകൾ വൈഭവിയുടെ മൃതദേഹം ദുബൈയിൽ തന്നെ സംസ്കരിക്കാനാണ് ചർച്ചയിൽ തീരുമാനമായത്.തനിക്ക് യാത്രാ വിലക്കുള്ളതിനാൽ മൃതദേഹം യുഎഇയിൽ തന്നെ സംസ്കരിക്കണമെന്നായിരുന്നു നിതീഷിന്റെ വാദം. ഇത് ഒടുവിൽ വിപഞ്ചികയുടെ കുടുംബം സമ്മതിക്കുകയായിരുന്നു. വിപഞ്ചികയുടെ പോസ്റ്റ്മോർട്ടം പൂർത്തിയായതോടെയാണ്. വിപഞ്ചികയുടെ മരണം ആത്മഹത്യയെന്ന നിഗമനത്തിലേക്കെത്തുന്നത്.
യുഎഇ നിയമത്തിൽ പൂർണ വിശ്വാസമുണ്ട്. ഇനി റീ-പോസ്റ്റ്മോർട്ടം വേണ്ടെന്നാണ് തീരുമാനം.മൃതദേഹം ഉടൻ നാട്ടിലെത്തിക്കാൻ സാധിക്കുമെന്നാണ് കരുതുന്നതെന്നും
അനുകമ്പയോടെ ഒരു വാക്കുപോലും നിതീഷിന്റെ കുടുംബത്തിന്റെ ഭാഗത്തു നിന്ന് ഉണ്ടായിട്ടില്ലെന്നും നാട്ടിലെ നിയമപോരാട്ടങ്ങൾ തുടരുമെന്നും കൂടെ നിന്ന എല്ലാവർക്കും നന്ദിയുണ്ടെന്നും മാതാവ് ഷൈലജയും സഹോദരൻ വിനോദും ഷാർജയിൽ മാധ്യമപ്രവർത്തകരോട് പറഞ്ഞു.