മലപ്പുറം– നിലമ്പൂര്‍ ഉപതെരഞ്ഞെടുപ്പ് വിജയാഘോഷത്തിനു ശേഷം പാണക്കാട്ടെത്തി നന്ദി അറിയിച്ച് യു.ഡി.എഫ് സ്ഥാനാര്‍ഥി ആര്യാടന്‍ ഷൗക്കത്ത്. സാദിഖലി തങ്ങള്‍ ആര്യാടനെ പച്ച ലഡു നല്‍കി സ്വീകരിച്ചു. മുസ്ലിം ലീഗാണ് തെരഞ്ഞെടുപ്പ് പ്രചരണം മുന്നില്‍ നിന്ന് നയിച്ചത്. തങ്ങളുടെ അനുഗ്രഹം വാങ്ങിയതിനു ശേഷമാണ് ഉപതെരഞ്ഞെടുപ്പ് പ്രചരണം ആരംഭിച്ചതെന്നും ഷൗക്കത്ത് മാധ്യമങ്ങളോട് പറഞ്ഞു. ഫോണില്‍ വിളിച്ച് അനുഗ്രഹിച്ചാണ് തങ്ങള്‍ ഹജ്ജിന് പോയത്. ഹജ്ജ് കഴിഞ്ഞ് നേരെ വന്നതും നിലമ്പൂരിലേക്കാണ്. പി.കെ കുഞ്ഞാലിക്കുട്ടിയുടെ നേതൃപരമായ ഇടപെടലും വിജയത്തിന് നിര്‍ണായകമായെന്നും ഷൗക്കത്ത് കൂട്ടിച്ചേര്‍ത്തു.
കൂട്ടായ, ഒറ്റക്കെട്ടായ പ്രവര്‍ത്തനങ്ങളുടെ വിജയമാണ് നിലമ്പൂരിലുണ്ടായതെന്ന് സാദിഖലി തങ്ങള്‍ പറഞ്ഞു. ഈ വിജയം ആത്മവിശ്വാസം നല്‍കുന്നതാണെന്നും കേരളത്തെ വീണ്ടെടുക്കുന്നതിലേക്കുള്ള പ്രയാണമാണ് നടത്താനുള്ളതെന്നും അദ്ദേഹം പറഞ്ഞു. 2026ലെ നിയമസഭ തെരഞ്ഞെടുപ്പില്‍ മലപ്പുറത്തെ പതിനാറ് മണ്ഡലങ്ങളിലും യു.ഡി.എഫ് വിജയിക്കുമെന്നും. ഷൗക്കത്തിന് എല്ലാവിധ വിജയങ്ങളും ആശംസിക്കുന്നെന്നും സാദിഖലി തങ്ങള്‍ അറിയിച്ചു. 11077 വോട്ടിന്റെ വന്‍ ഭൂരിപക്ഷത്തിലാണ് ഷൗക്കത്ത് നിലമ്പൂരില്‍ ജയിച്ചത്. യു.ഡി.എഫ് 77737 വോട്ടും, എല്‍.ഡി.എഫ് സ്ഥാനാര്‍ഥി എം സ്വരാജ് 66660, സ്വതന്ത്ര സ്ഥാനാര്‍ഥി പി.വി അന്‍വര്‍ 19760, ബി.ജെ.പി സ്ഥാനാര്‍ഥി മോഹന്‍ ജോര്‍ജ് 8648 വോട്ടും നേടി.