തെഹ്‌റാന്‍ – ഇറാനില്‍ ആണവ കേന്ദ്രങ്ങള്‍ക്കു നേരെ ഇസ്രായില്‍ ആക്രമണം നടത്തിയതായി ഇറാന്‍ ആറ്റമിക് എനര്‍ജി ഓര്‍ഗനൈസേഷന്‍ പറഞ്ഞു. ഖന്ദാബിലെ ഗവേഷണ റിയാക്ടറിനും ഘനജല സമുച്ചയത്തിനും നേരെയാണ് ആക്രമണമുണ്ടായത്. ഇത് അന്താരാഷ്ട്ര നിയമത്തിന്റെ പുതിയ ലംഘനമാണെന്ന് ഓര്‍ഗനൈസേഷന്‍ പറഞ്ഞു.
ഇസ്രായിലിന്റെ ഭീഷണികളെയും ആക്രമണങ്ങളെയും കുറിച്ച് അന്താരാഷ്ട്ര ആണവോര്‍ജ ഏജന്‍സിയെ ആവര്‍ത്തിച്ച് അറിയിച്ചിരുന്നെങ്കിലും ഏജന്‍സി ഒരു നടപടിയും സ്വീകരിച്ചില്ലെന്ന് ഇറാന്‍ ആറ്റമിക് എനര്‍ജി ഓര്‍ഗനൈസേഷന്‍ പറഞ്ഞതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. അധികൃതര്‍ മുന്‍കൂട്ടി ക്രമീകരണങ്ങള്‍ ചെയ്തിരുന്നതിനാല്‍ പ്രദേശവാസികള്‍ക്ക് ആളപായമോ അപകടമോ ഉണ്ടായിട്ടില്ലെന്നും ഓര്‍ഗനൈസേഷന്‍ വ്യക്തമാക്കി.
ഇസ്രായിലും ഇറാനും തമ്മിലുള്ള സംഘര്‍ഷം ഇന്ന് ഏഴാം ദിവസത്തിലേക്ക് കടന്നു. ഇന്ന് ഇറാന്‍ സൈന്യം ഇസ്രായിലിനെതിരെ ചാവേര്‍ ഡ്രോണ്‍ ആക്രമണത്തിന്റെ ആറാം ഘട്ടം ആരംഭിച്ചു. ഇസ്രായില്‍ സൈന്യം ഇറാനില്‍ ആയുധ ഉല്‍പാദന കേന്ദ്രങ്ങളും സെന്‍ട്രിഫ്യൂജ് ഉല്‍പാദന കേന്ദ്രങ്ങളും ലക്ഷ്യമിട്ട് ആക്രമണങ്ങള്‍ നടത്തി. ഇന്നലെ രാത്രി നതാന്‍സ് ആണവ കേന്ദ്രം വീണ്ടും ആക്രമിച്ചതായും അരാക്കിലെ പ്രവര്‍ത്തനരഹിതമായ ആണവ റിയാക്ടര്‍ ആക്രമിച്ചതായും ഇസ്രായില്‍ സൈന്യം ഇന്ന് അറിയിച്ചു. നതാന്‍സ് മേഖലയിലെ ആണവായുധ വികസന കേന്ദ്രം വ്യോമസേന ആക്രമിച്ചു. ഇറാനിലെ അരാക്കിലുള്ള പ്രവര്‍ത്തനരഹിതമായ ആണവ റിയാക്ടര്‍ ലക്ഷ്യമിട്ടും ആക്രമണം നടത്തിയതായി ഇസ്രായില്‍ സൈന്യം പറഞ്ഞു.