വാഷിംഗ്ടണ്‍ – ഇറാൻ- ഇസ്രായിൽ സൈനിക സംഘര്‍ഷങ്ങള്‍ വര്‍ധിച്ചുവരുന്ന സാഹചര്യത്തില്‍ തെഹ്റാനില്‍നിന്ന് ജനങ്ങള്‍ ഉടനടി ഒഴിഞ്ഞുപോകണമെന്ന യു.എസ് പ്രസിഡന്റ് ഡൊണാള്‍ഡ് ട്രംപിന്റെ ആഹ്വാനത്തെ തുടര്‍ന്ന് തെഹ്റാനില് നിന്ന് ജനങ്ങള്‍ കൂട്ടത്തോടെ പലായനം ചെയ്യാന്‍ തുടങ്ങി. സംഘര്‍ഷം ഭയന്ന് പരിഭ്രാന്തിയും ഉത്കണ്ഠയും നിറഞ്ഞ് ജനങ്ങള്‍ തെഹ്റാന്‍ വിടാന്‍ തിരക്കുകൂട്ടിയതിനാല്‍, നഗരത്തിന് പുറത്തേക്ക് നയിക്കുന്ന ഹൈവേകളിലും റോഡുകളിലും കാറുകളുടെ നീണ്ട നിര കുടുങ്ങിക്കിടക്കുന്നത് വീഡിയോ ദൃശ്യങ്ങളില്‍ കാണിച്ചു.
മിഡില്‍ ഈസ്റ്റിലെ സംഘര്‍ഷം രൂക്ഷമാകുന്ന സാഹചര്യത്തില്‍ ഇന്ത്യൻ പൗരന്മാരെ ഇറാനിൽനിന്ന് ഒഴിപ്പിക്കുന്നത് തുടങ്ങി. അർമീനിയ വഴിയാണ് ഇന്ത്യൻ വിദ്യാർഥികളെ ഒഴിപ്പിക്കുന്നത്. ഇരുന്നൂറോളം പേർ ഇതോടകം അർമീനിയയിൽ എത്തി. അതേസമയം, ഇസ്രായിലിൽനിന്ന് തല്ക്കാലം ഒഴിപ്പിക്കൽ സംബന്ധിച്ച് തീരുമാനം എടുത്തിട്ടില്ല.
ജര്‍മന്‍ പൗരന്മാര്‍ക്ക് ജോര്‍ദാന്‍ വഴി ഇസ്രായിലില്‍ നിന്ന് പുറത്തുപോകാന്‍ വിമാനങ്ങള്‍ ഒരുക്കുമെന്ന് ജര്‍മന്‍ വിദേശ മന്ത്രാലയം അറിയിച്ചു. സംഘര്‍ഷം കാരണം ഇസ്രായില്‍ വ്യോമാതിര്‍ത്തി നിലവില്‍ അടച്ചിട്ടിരിക്കുന്നതിനാല്‍, ബുധനാഴ്ച ജോര്‍ദാന്‍ തലസ്ഥാനമായ അമ്മാനില്‍ നിന്ന് പടിഞ്ഞാറന്‍ ജർമന്‍ നഗരമായ ഫ്രാങ്ക്ഫര്‍ട്ടിലേക്ക് ചാര്‍ട്ടര്‍ വിമാനങ്ങള്‍ സംഘടിപ്പിക്കുമെന്ന് മന്ത്രാലയം പറഞ്ഞു. ഇസ്രായില്‍ വിടാന്‍ ആഗ്രഹിക്കുന്ന ജര്‍മന്‍കാര്‍ ജോര്‍ദാനിലേക്കുള്ള യാത്ര സ്വതന്ത്രമായി ക്രമീകരിക്കണം. സീറ്റ് റിസര്‍വേഷനുകളും മറ്റ് വിമാന വിശദാംശങ്ങളും സംബന്ധിച്ച വിവരങ്ങള്‍ പിന്നീട് പങ്കിടുമെന്ന് വിദേശ മന്ത്രാലയം പറഞ്ഞു. സംഘര്‍ഷം പരിഹരിക്കാനായി ജര്‍മനി നയതന്ത്രത്തില്‍ ശ്രദ്ധ കേന്ദ്രീകരിക്കുന്നതായി ജര്‍മന്‍ വികസന മന്ത്രി റീം അല്‍അബ്ലി-റഡോവന്‍ പറഞ്ഞു. മിഡില്‍ ഈസ്റ്റിലെ പൊട്ടിത്തെറിയെ കുറിച്ച് വളരെയധികം ആശങ്കയുണ്ടെന്നും അവര്‍ പറഞ്ഞു.
ഇസ്രായിലില്‍ നിന്ന് ജര്‍മന്‍ പൗരന്മാരെ ഒഴിപ്പിക്കാനുള്ള മാർഗങ്ങൾ ചര്‍ച്ച ചെയ്യുന്നുണ്ടെന്ന് ജര്‍മന്‍ സര്‍ക്കാര്‍ നേരത്തെ പറഞ്ഞിരുന്നു. പോളണ്ട്, ചെക്ക് റിപ്പബ്ലിക് എന്നിവയുള്‍പ്പെടെ മറ്റ് യൂറോപ്യന്‍ രാജ്യങ്ങള്‍ ഇസ്രായിലില്‍ നിന്ന് തങ്ങളുടെ പൗരന്മാരെ തിരിച്ചെത്തിക്കാന്‍ തുടങ്ങിയിട്ടുണ്ട്. ജര്‍മന്‍ പൗരന്മാരെ അപേക്ഷിച്ച് മറ്റു ചില യൂറോപ്യന്‍ രാജ്യങ്ങളുടെ കുറച്ച് പൗരന്മാര്‍ മാത്രമേ ഇസ്രായിലിലുള്ളൂവെന്ന് ഇത് സൂചിപ്പിച്ച് ജര്‍മന്‍ വിദേശ മന്ത്രാലയ വക്താവ് പറഞ്ഞു. ഞങ്ങള്‍ എല്ലാ ഓപ്ഷനുകളും പരിശോധിക്കുന്നുണ്ട്. ജര്‍മന്‍ സര്‍ക്കാരിന്റെ പ്രതിസന്ധി സംഘം ഈ വിഷയം ചര്‍ച്ച ചെയ്യാന്‍ യോഗം ചേര്‍ന്നിട്ടുണ്ട്.
മിസൈല്‍ ആക്രമണങ്ങള്‍ കാരണം നിലവില്‍ വ്യോമാതിര്‍ത്തി അടച്ചിരിക്കുന്നതിനാല്‍ നേരിട്ടുള്ള വിമാന സര്‍വീസുകള്‍ ഒരു ഓപ്ഷനല്ല. വിദേശത്തുള്ള ജര്‍മന്‍ പൗരന്മാര്‍ക്കുള്ള ഇലക്‌ട്രോണിക് രജിസ്‌ട്രേഷന്‍ എന്നറിയപ്പെടുന്ന ജര്‍മന്‍ പ്രതിസന്ധി പ്രതിരോധ പട്ടികയില്‍ രജിസ്റ്റര്‍ ചെയ്യാന്‍ വിദേശ മന്ത്രാലയം മേഖലയിലെ എല്ലാ ജര്‍മന്‍ പൗരന്മാരോടും ആവശ്യപ്പെട്ടു.
വിദേശത്തുള്ള ജര്‍മന്‍കാര്‍ക്കുള്ള ഇലക്‌ട്രോണിക് രജിസ്‌ട്രേഷന്‍ പട്ടികയില്‍ ഇസ്രായിലില്‍ നിന്ന് നിലവില്‍ ഏകദേശം 4,000 പേര്‍ രജിസ്റ്റര്‍ ചെയ്തിട്ടുണ്ട്. രജിസ്റ്റര്‍ ചെയ്യുന്നവരുടെ എണ്ണം വര്‍ധിച്ചുകൊണ്ടിരിക്കുകയാണ്. ഇറാനിലുള്ള ജര്‍മന്‍കാരെയും പട്ടികയില്‍ രജിസ്റ്റര്‍ ചെയ്യുന്നുണ്ട്. ഇറാനില്‍ ആയിരത്തില്‍ താഴെ ജര്‍മന്‍കാരാണുള്ളതെന്നും വിദേശ മന്ത്രാലയ വക്താവ് പറഞ്ഞു. വഷളാകുന്ന സുരക്ഷാ സാഹചര്യവും ഇസ്രായിലി വ്യോമാതിര്‍ത്തി അടച്ചുപൂട്ടലും കണക്കിലെടുത്ത് ഇസ്രായിലിന്റെ കരാതിര്‍ത്തി ക്രോസിംഗുകള്‍ വഴി എത്രയും വേഗം ഇസ്രായില്‍ വിടാന്‍ ചൈനീസ് പൗരന്മാരോട് ഇസ്രായിലിലെ ചൈനീസ് എംബസി അഭ്യര്‍ഥിച്ചു.
നിലവില്‍, ഇസ്രായില്‍-ഇറാന് സംഘര്‍ഷം വര്‍ധിച്ചുകൊണ്ടിരിക്കുകയാണ്.
സിവിലിയന്‍ സൗകര്യങ്ങള്‍ക്ക് കേടുപാടുകള്‍ സംഭവിക്കുകയും സിവിലിയന്‍ മരണങ്ങള്‍ വര്‍ധിക്കുകയും ചെയ്യുന്നു. ഇത് സുരക്ഷാ സ്ഥിതി കൂടുതല്‍ വഷളാക്കുന്നു. ജോര്‍ദാനിലേക്കുള്ള കരാതിര്‍ത്തി ക്രോസിംഗ് വഴി ചൈനീസ് പൗരന്മാര്‍ എത്രയും വേഗം ഇസ്രായില്‍ വിടണമെന്ന് ചൈനീസ് എംബസി വീചാറ്റ് നോട്ടീസില്‍ പറഞ്ഞു. സംഘര്‍ഷം വികസിക്കുമെന്ന ആശങ്കകള്‍ക്കിടയില്‍ ജൂണ്‍ 22 ന് ഇസ്രായില്‍ പാര്‍ലമെന്റിനെ (നെസെറ്റ്) അഭിസംബോധന ചെയ്യാനായി താന്‍ നിശ്ചയിച്ചിരുന്ന ഇസ്രായില്‍ സന്ദര്‍ശനം മാറ്റിവെച്ചതായി അമേരിക്കന്‍ ജനപ്രതിനിധിസഭ സ്പീക്കര്‍ മൈക്ക് ജോണ്‍സണ്‍ അറിയിച്ചു.
ഇറാന്റെ തലസ്ഥാനമായ തെഹ്റാനില് നിന്ന് എല്ലാവരും ഉടന്‍ ഒഴിഞ്ഞുപോകണമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ് ആവശ്യപ്പെട്ടു. ഇറാന് അമേരിക്കയുമായി ഒരു ആണവ കരാറില്‍ ഒപ്പുവെക്കേണ്ടതായിരുന്നുവെന്നും ട്രംപ് ആവര്‍ത്തിച്ചു. ഇറാന് ഒരു ആണവായുധം ഉണ്ടാകാന്‍ കഴിയില്ല… ഞാന്‍ അത് പലതവണ പറഞ്ഞിട്ടുണ്ട്! എല്ലാവരും ഉടന്‍ തെഹ്റാനില് നിന്ന് ഒഴിഞ്ഞുപോകണം! – ട്രംപ് സ്വന്തം സാമൂഹികമാധ്യമമായ ട്രൂത്ത് സോഷ്യലില്‍ എഴുതി. തെഹ്റാനില് നിന്ന് എല്ലാവരും ഉടന്‍ പുറത്തുപോകണമെന്ന യു.എസ് പ്രസിഡന്റിന്റെ ട്വീറ്റ് ട്രംപ് ഭരണകൂട ഉദ്യോഗസ്ഥരും വൈറ്റ് ഹൗസ് അക്കൗണ്ടുകളും റീട്വീറ്റ് ചെയ്തു.
കാനഡയില്‍ നടക്കുന്ന ജി-7 ഉച്ചകോടിയില്‍ നിന്ന് നിശ്ചയിച്ചതിലും ഒരു ദിവസം നേരത്തെ ട്രംപ് മടങ്ങി. മിഡില്‍ ഈസ്റ്റിലെ സംഭവവികാസങ്ങള്‍ കാരണം, ലോക നേതാക്കളുമൊത്തുള്ള അത്താഴത്തിന് ശേഷം പ്രസിഡന്റ് ട്രംപ് ഇന്ന് രാത്രി പോകുമെന്ന് വൈറ്റ് ഹൗസ് വക്താവ് കരോലിന്‍ ലെവിറ്റ് ട്വിറ്ററില്‍ കുറിച്ചു. ഇറാന്റെ ആണവ പദ്ധതിയെ കുറിച്ച ചര്‍ച്ചകള്‍ പുനരുജ്ജീവിപ്പിക്കാനുള്ള അവസാന അവസരം എന്ന നിലയില്‍, ട്രംപ് ഒരു പുതിയ ഓഫര്‍ വാഗ്ദാനം ചെയ്‌തേക്കാമെന്ന് മാധ്യമ റിപ്പോര്‍ട്ടുകള്‍ വെളിപ്പെടുത്തി. ഈ ഓഫര്‍ മുമ്പത്തേതില്‍ നിന്ന് അല്പം വ്യത്യസ്തമായിരിക്കാം, ഇറാനികള്‍ക്ക് ഒരു നല്ല വികാരം നല്‍കാന്‍ ഒരുപക്ഷേ കുറച്ചുകൂടി മികച്ചതായിരിക്കാം, പക്ഷേ തത്വങ്ങള്‍ നിലനില്‍ക്കും, യുറേനിയം സമ്പുഷ്ടീകരണമില്ല, ആണവ പദ്ധതിയില്ല. ആണവ ചര്‍ച്ചയില്‍ ഇസ്രായില്‍ പങ്കെടുക്കുന്നില്ല. ഇറാനും അമേരിക്കയും തമ്മില്‍ മധ്യസ്ഥര്‍ വഴിയാണ് ചര്‍ച്ചകള്‍ നടക്കുന്നതെന്നും ഇസ്രായില്‍ ചാനല്‍ റിപ്പോര്‍ട്ട് ചെയ്തു.
തെഹ്റാനില് നിന്ന് എല്ലാവരും ഉടന്‍ ഒഴിഞ്ഞുപോകണമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ് ആവശ്യപ്പെട്ടതിനു പിന്നാലെ തലസ്ഥാനത്ത് നിരവധി സ്ഫോടനങ്ങള്‍ റിപ്പോര്‍ട്ട് ചെയ്തു. അമേരിക്ക ഇറാനെതിരെ ആക്രമണം നടത്തുന്നുണ്ടെന്ന റിപ്പോര്‍ട്ടുകള്‍ വൈറ്റ് ഹൗസ് വക്താവ് അലക്‌സ് ഫൈഫര്‍ നിഷേധിച്ചു. യു.എസ് സേന അവരുടെ പ്രതിരോധ നിലപാട് നിലനിര്‍ത്തുന്നു. അത് മാറിയിട്ടില്ല. അമേരിക്കന്‍ താല്‍പര്യങ്ങള്‍ ഞങ്ങള്‍ സംരക്ഷിക്കും- ഫൈഫര്‍ പറഞ്ഞു.
ഇറാനും ഇസ്രായേലും തമ്മിലുള്ള സംഘര്‍ഷത്തെ കുറിച്ച് ജി-7 നേതാക്കള്‍ പുറപ്പെടുവിച്ച സംയുക്ത കരട് പ്രസ്താവനയില്‍ യു.എസ് പ്രസിഡന്റ് ഡൊണാള്‍ഡ് ട്രംപ് ഒപ്പിട്ടില്ല. സംഘര്‍ഷം രൂക്ഷമാക്കുന്നതും പ്രാദേശിക സ്ഥിരതയെ ദുര്‍ബലപ്പെടുത്തുന്നതും ഒഴിവാക്കാന്‍ കരട് പ്രസ്താവന ഇസ്രായിലിനോടും ഇറാനോടും ആവശ്യപ്പെടുന്നതായി റോയിട്ടേഴ്സ് റിപ്പോര്‍ട്ട് ചെയ്തു.
അതിനിടെ, ഇസ്രായിലില്‍ ഇറാന് അതിശക്തമായ ആക്രമണങ്ങള്‍ക്ക് തുടക്കമിട്ടു. ഇസ്രായിലിനെതിരായ ഒമ്പതാമത്തെ ആക്രമണമാണിതെന്നും രാവിലെ വരെ ആക്രമണം തുടരുമെന്നും റെവല്യൂഷണറി ഗാര്‍ഡ് പറഞ്ഞു. പുലരുവോളം ഇടതടവില്ലാതെ ഇസ്രായിലിനെതിരെ ആക്രമണം നടത്തുമെന്ന് റെവല്യൂഷനറി ഗാര്‍ഡ് പറഞ്ഞു. തുടര്‍ച്ചയായ ഇസ്രായിലി ആക്രമണങ്ങള്‍ക്ക് മുന്നില്‍ ഇറാന് നിഷ്‌ക്രിയമായി നില്‍ക്കില്ലെന്ന് ഇറാന് സുപ്രീം നാഷണല്‍ സെക്യൂരിറ്റി കൗണ്‍സില്‍ പറഞ്ഞു. ഇറാന് ഇസ്രായിലിന്റെ രാത്രിയെ പകലാക്കി മാറ്റുമെന്ന് സുപ്രീം നാഷണല്‍ സെക്യൂരിറ്റി കൗണ്‍സില്‍ അടിയന്തര പ്രസ്താവനയില്‍ പറഞ്ഞു. ഇസ്രായിലിനെതിരായ പുതിയ ആക്രമണം തെല്‍അവീവിനെയും ഹൈഫായെയും ലക്ഷ്യമിട്ടാണെന്ന് ഇറാന് മാധ്യമങ്ങള്‍ റിപ്പോര്‍ട്ട് ചെയ്തു. ഇറാന് മിസൈല്‍ പതിച്ചതിനെ തുടര്‍ന്ന് എണ്ണ ശുദ്ധീകരണശാലയും അനുബന്ധ സൗകര്യങ്ങളും അടച്ചുപൂട്ടിയതായി ഇസ്രായിലിലെ ബസാന്‍ ഓയില്‍ കമ്പനി അറിയിച്ചു. ആക്രമണത്തില്‍ റിഫൈനറിയിലെ വൈദ്യുത നിലയത്തിന് സാരമായ കേടുപാടുകള്‍ സംഭവിച്ചതായും മൂന്ന് ജീവനക്കാര്‍ കൊല്ലപ്പെട്ടതായും കമ്പനി പറഞ്ഞു.
ക്യാപ്.
തെഹ്റാനില് ഇസ്രായില്‍ നടത്തിയ ആക്രമണം.