ദുബായ്: 1.5 കോടി രൂപയുടെ മൂന്നക്ക നമ്പർ പ്ലേറ്റ് ‘S 529’ സ്വന്തമാക്കി ദുബായിലെ യുവ മലയാളി വ്യവസായി ഷരീഫ് മുഹമ്മദ്. തൃശൂർ തളിക്കുളം സ്വദേശിയും ക്യൂബ്സ് ഇന്റർനാഷണൽ ഗ്രൂപ്പിന്റെ സ്ഥാപകനും മാനേജിങ് ഡയറക്ടറുമാണ് ഷരീഫ്.
‘മാർക്കോ’ എന്ന ബ്ലോക്ബസ്റ്റർ സിനിമയുടെ നിർമാതാവ് കൂടിയായ അദ്ദേഹം, ക്യൂബ്സ് എന്റർടെയ്ൻമെന്റ്സിന്റെ ബാനറിൽ ‘കാട്ടാളൻ’ എന്ന ആന്റണി വർഗീസ് പെപ്പെ ചിത്രവും അണിയറയിൽ ഒരുക്കുന്നു.
സാധാരണ കുടുംബത്തിൽ നിന്നുയർന്ന ഷരീഫ് 2008-ൽ ദുബായിൽ സെയിൽസ് കോ-ഓർഡിനേറ്ററായി കരിയർ ആരംഭിച്ചു. പിന്നീട് ഖത്തറിൽ ഒരു എയർപോർട്ട് കൺസ്ട്രക്ഷൻ കമ്പനിയിൽ പ്രോക്യുർമെന്റ് ഓഫിസറായും വാഹന ലീസിങ് കമ്പനിയിലും ജോലി ചെയ്തു. 2011-ൽ സ്വന്തം സംരംഭമെന്ന സ്വപ്നത്തിലേക്ക് കാൽവെച്ച അദ്ദേഹം ഖത്തറിൽ ക്യൂബ്സ് ഇന്റർനാഷണൽ ഗ്രൂപ്പിന് തുടക്കമിട്ടു. ആദ്യം മാൻപവർ കൺസൾട്ടൻസിയായി ആരംഭിച്ച കമ്പനി 2017-ൽ ഇന്ത്യയിൽ ലോജിസ്റ്റിക്സ് രംഗത്തേക്കും വ്യാപിച്ചു.
നിലവിൽ ക്യൂബ്സ് ഇന്റർനാഷണൽ ഗ്രൂപ്പ് ലോജിസ്റ്റിക്സ്, മീഡിയ പ്രൊഡക്ഷൻ, ഷിപ്പിങ്, സിവിൽ, എംഇപി എൻജിനീയറിങ്, ജനറൽ ട്രേഡിങ്, കൺസ്ട്രക്ഷൻ തുടങ്ങിയ മേഖലകളിൽ സജീവമാണ്.