ദുബായ്: ചാംപ്യന്‍സ് ട്രോഫിയില്‍ ഇന്ന് ഇന്ത്യ -പാകിസ്താന് സൂപ്പര്‍ ത്രില്ലര്‍. ഇന്ത്യയുടെ ലക്ഷ്യം സെമിഫൈനലെങ്കില്‍, പാകിസ്താന്, ടൂര്‍ണമെന്റിലെ നിലനില്‍പ്പിനായുള്ള ജീവന്‍മരണ പോരാട്ടമാണ്. ദുബായ് രാജ്യാന്തര സ്റ്റേഡിയത്തില്‍ ഇന്ത്യന്‍ സമയം ഉച്ചയ്ക്ക് രണ്ടരമുതലാണ് മല്‍സരം.
ബംഗ്ലദേശിനെ ആറുവിക്കറ്റിന് തോല്‍പിച്ചെത്തുന്ന ഇന്ത്യയും ന്യൂസിലന്‍ഡിനോട് 60 റണ്‍സിന് തോറ്റെത്തുന്ന പാക്കിസ്ഥാനുമാണ് ഏറ്റുമുട്ടുന്നത്. ചാംപ്യന്‍സ് ട്രോഫിയില്‍ ഇതിനുമുമ്പ് ഏറ്റുമുട്ടിയപ്പോള്‍ ഇന്ത്യയെ തോല്‍പിച്ച് കപ്പുമായാണ് പാക്കിസ്ഥാന് മടങ്ങിയത്. ആ മികവിന്റെ ഇരട്ടി പുറത്തെടുക്കണം പാക്കിസ്ഥാന് ടൂര്‍ണമെന്റില്‍ നിലനില്‍ക്കണമെങ്കില്‍. ആദ്യമല്‍സരത്തിലെ പ്രകടനം സൂചനയായി കണ്ടാല്‍ ക്യാപ്റ്റന്‍ രോഹിത്തിന്റെ ഫോമില്‍ ആശങ്കവേണ്ട. 36 പന്തില്‍ 41 റണ്‍സാണ് രോഹിത്ത് നേടിയത്.
മറുവശത്ത് 321 റണ്‍സ് പിന്തുടരുമ്പോള്‍ 90 പന്തില്‍ 64 റണ്‍സ് നേടിയ ബാബര്‍ അസമിനെ ആരാധകര്‍ ക്രൂശിലേറ്റിക്കഴിഞ്ഞു. പരുക്കേറ്റ ഫകര്‍ സമാന്‍ പുറത്തായതും പാക്കിസ്ഥാന് കനത്ത തിരിച്ചടിയായി. ആദ്യ മല്‍സരത്തില്‍ നിന്ന ആകെ പോസിറ്റീവ് 69 റണ്‍സെടുത്ത മധ്യനിര ബാറ്റര്‍ ഖുഷ്ദില്‍ ഷാ. പാക്കിസ്ഥാനെതിരെ എന്നും മിന്നിച്ചിട്ടുള്ള വിരാട് കോഹലി കൂടി റണ്‍സ് കണ്ടെത്തണമെന്നേ ഇന്ത്യന്‍ ആരാധകര്‍ ആഗ്രഹിക്കുന്നുള്ളു. അഞ്ചുവിക്കറ്റുമായി മുഹമ്മദ് ഷമിയും കൂടെനിന്ന ഹര്‍ഷിദ് റാണയും ബംഗ്ലദേശിനെതിരെ ബുമ്രയുടെ കുറവറിയിച്ചില്ല.