ജിദ്ദ- ജിദ്ദ കെ.എം.സി.സി കായിക വിഭാഗം സംഘടിപ്പിച്ച അന്താരാഷ്ട്ര വടംവലി ടൂർണമെന്റിന് ആവേശകരമായ സമാപനം. ആയിരങ്ങൾ പങ്കെടുത്ത വടംവലിമേള പ്രവാസലോകത്തെ ഏറ്റവും വലിയ വടംവലി ടൂർണമെന്റായി മാറി. ജിദ്ദ ഖാലിദ് വലീദിലെ അൽ റസൂഖ് സ്റ്റേഡിയം കാണികളാൽ നിറഞ്ഞു.
വടംവലി മേഖലയിലെ കരുത്തരായ പന്തിനഞ്ചു ടീമുകൾ പങ്കെടുത്തു. കാണികളെ മുൾമുനയിൽ നിർത്തിയ ആവേശമായിരുന്നു ഓരോ മത്സരങ്ങൾക്കും. റെഡ് മാക്സ് ജിദ്ദ കപ്പിൽ മുത്തമിട്ടു. മിഡിലീസ്റ്റിന്റെ വിവിധ ഭാഗങ്ങളിൽ നിന്നും സൗദി അറേബ്യയുടെ വിവിധ പ്രവിശ്യകളിൽനിന്നുമെത്തിയ വടംവലി താരങ്ങളാണ് ഓരോ മത്സരങ്ങളിലും അണിനിരന്നത്. പി എം വൈ കെ മുണ്ടുപറമ്പിനു വേണ്ടി രംഗത്തിറങ്ങിയ കനിവ് റിയാദ് രണ്ടാം സ്ഥാനം സ്വന്തമാക്കി. നിലമ്പൂർ മണ്ഡലം കെഎംസിസി മൂന്നാം സ്ഥാനവും യു.എ.ഇയിൽ നിന്ന് ജിദ്ദയിലെത്തിയ സ്റ്റാർ അൽ ഐൻ നാലാം സ്ഥാനവും കരസ്ഥമാക്കി.

വടംവേലിമേളക്ക് മുന്നോടിയായി വിവിധ കലാപ്രകടനങ്ങൾ നടന്നു. ജിദ്ദ കെ.എം.സി.സി വനിതാ വിങ്ങിലെ അംഗങ്ങളുടെ മക്കൾ അവതരിപ്പിച്ച ഡാൻസ്, കണ്ണൂർ ജില്ലാ കെ.എം.സി.സിയുടെ ഹരിത കലാ വേദി ഗ്രീൻസ് മുട്ടിപ്പാട്ട്, സ്കൂൾ കുട്ടികൾ അവതരിപ്പിച്ച ഒപ്പന- അറേബ്യൻ നൃത്തം എന്നിവ മേളക്ക് കൊഴുപ്പേകി.
കളിനിയന്ത്രിക്കാൻ നാട്ടിൽനിന്നെത്തിയ അഖില കേരള വടംവലി അസോസിയേഷൻ ചെയർമാൻ ആവാസ് നടത്തിയ കമന്ററി മേളയിൽ ആവേശമുയർത്തി. ഒന്നാം സ്ഥാനക്കാർക്ക് പതിനായിരം, രണ്ടാം സ്ഥാനക്കാർക്ക് ആറായിരം, മൂന്നാം സ്ഥാനം നാലായിരം, നാലാം സ്ഥാനം രണ്ടായിരം എന്നിങ്ങനെയാണ് പ്രൈസ്മണി നൽകിയത്. അന്താരാഷ്ട്ര വടംവലി നിലവാരത്തിലുള്ള വടംവലികോർട്ട്, സാങ്കേതിക വിദഗ്ധരുടെ മേൽനോട്ടം എന്നിവ ടൂർണമെന്റിന്റെ ആധികാരികത വിളിച്ചോതുന്നു.
സൗദി കെ.എം.സി.സി നാഷണൽ കമ്മറ്റി പ്രസിഡന്റ് കുഞ്ഞിമോൻ കാക്കിയ മേള ഉദ്ഘാടനം ചെയ്തു. സി കെ റസാഖ് മാസ്റ്റർ അദ്ധക്ഷത വഹിച്ചു. അഹമ്മദ് പാളയാട്ട്, വിപി മുസ്തഫ, ഇസ്മായിൽ മുണ്ടക്കുളം, നിസാം മമ്പാട്, നാസർ വെളിയംകോട്, മുജീബ് പൂക്കോട്ടൂർ, സി കെ ശാക്കിർ, അൻവർ ചേരങ്കൈ, ഷിബു തിരുവനന്തപുരം, ഹകീം പാറക്കൽ, സയീദ് സലേഹ് അൽ സൈറി, അബ്ദുറഹിമാൻ ഒതൈബി, ഹമീദ് ഉബൈദ് അൽ ഹർസി, തുടങ്ങിയവർ പങ്കെടുത്തു.
ഷൗക്കത്ത് ഞാറക്കോടൻ, സുബൈർ വട്ടോളി, ലത്തീഫ് വെള്ളമുണ്ട, നാസർ മച്ചിങ്ങൽ, അഷ്റഫ് താഴേക്കോട്, സിറാജ് കണ്ണവം, ശിഹാബ് താമരക്കുളം, ലത്തീഫ് മുസ്ലിയാരങ്ങാടി, സാബിൽ മമ്പാട്, ജലാൽ തേഞ്ഞിപ്പലം, എ കെ ബാവ, ഹസ്സൻ ബത്തേരി, ലത്തീഫ് കളരാന്തിരി, സക്കീർ നാലകത്ത്, ഫത്താഹ് താനൂർ, സകരിയ്യ ആറളം തുടങ്ങിയവർ നേതൃത്വം നൽകി.