ലണ്ടന്‍: ഇംഗ്ലിഷ് പ്രീമിയര്‍ റൂബന്‍ അമോറിമിനു കീഴിലുള്ള ആദ്യ മത്സരത്തില്‍ മാഞ്ചസ്റ്റര്‍ യുണൈറ്റഡിന് നിരാശപ്പെടുത്തുന്ന സമനില. പോയിന്റ് പട്ടികയില്‍ അവസാന സ്ഥാനങ്ങളിലുള്ള ഇപ്‌സ്വിച്ച് ടൗണാണ് മാഞ്ചസ്റ്റര്‍ യുണൈറ്റഡിനെ സമനിലയില്‍ കുരുക്കിയത്. മാര്‍ക്കസ് റാഷ്‌ഫോര്‍ഡിന്റെ ഗോളില്‍ 2ാം മിനിറ്റില്‍ത്തന്നെ മുന്നില്‍ക്കയറിയ യുണൈറ്റഡിനെതിരെ, 43ാം മിനിറ്റില്‍ ഒമാറി ഹച്ചിന്‍സനാണ് ഇപ്‌സ്വിച്ചിന് സമനില സമ്മാനിച്ചത്.
പോയിന്റ് പട്ടികയില്‍ ഒന്നാമന്‍മാരായ ലിവര്‍പൂള്‍, സതാംപ്ടനെ വീഴ്ത്തി രണ്ടാം സ്ഥാനത്തുള്ള മാഞ്ചസ്റ്റര്‍ സിറ്റിയുമായുള്ള ദൂരം വര്‍ധിപ്പിച്ചു. 3-2നാണ് ലിവര്‍പൂളിന്റെ വിജയം. ഒരു ഘട്ടത്തില്‍ 2-1ന് പിന്നിലായിരുന്നു ലിവര്‍പൂളിന്, സൂപ്പര്‍താരം മുഹമ്മദ് സലായുടെ ഇരട്ടഗോളാണ് ആവേശ ജയം സമ്മാനിച്ചത്.
65, 83 മിനിറ്റികളിലാണ് സലാ ലക്ഷ്യം കണ്ടത്. ഇതില്‍ രണ്ടാം ഗോള്‍ പെനല്‍റ്റിയില്‍ നിന്നായിരുന്നു. ലിവര്‍പൂളിന്റെ ആദ്യ ഗോള്‍ 30ാം മിനിറ്റില്‍ ഡൊമിനിക് സൊബോസ്ലായ് നേടി. സതാംപ്ടന്റെ ഗോളുകള്‍ ആദം ആംസ്‌ട്രോങ് (42ാം മിനിറ്റ്), മത്തേയൂസ് ഫെര്‍ണാണ്ടസ് (56) എന്നിവര്‍ നേടി.വിജയത്തോടെ 12 കളികളില്‍നിന്ന് 10 ജയവും ഒരു സമനിലയും സഹിതം 31 പോയിന്റുമായാണ് ലിവര്‍പൂള്‍ ഒന്നാം സ്ഥാനത്തു തുടരുന്നു.