അബഹ – അസീര്‍ പ്രവിശ്യയിലെ ഖമീസ് മുശൈത്തില്‍ ഉദ്ഘാടത്തോടനുബന്ധിച്ച് വന്‍തോതില്‍ ഓഫറുകള്‍ പ്രഖ്യാപിച്ച വ്യാപാര സ്ഥാപനത്തില്‍ അനിയന്ത്രിതമായി ഉപയോക്താക്കള്‍ ഇടിച്ചുകയറി. ആലമുത്തൗഫീര്‍ എന്ന സ്ഥാപനമാണ് ഉദ്ഘാടനത്തോടനുബന്ധിച്ച് ഉപയോക്താക്കളെ ആകര്‍ഷിക്കാന്‍ വലിയ ഓഫറുകള്‍ പ്രഖ്യാപിച്ചത്. ഓഫറുകൾ സംബന്ധിച്ച് വിവിധ മാധ്യമങ്ങളിലൂടെ സ്ഥാപനം പരസ്യം ചെയ്തിരുന്നു. ഇതേ കുറിച്ച് സ്ഥാപനം വിവിധ മാധ്യമങ്ങളിലൂടെ വന്‍തോതില്‍ പരസ്യം പ്രസിദ്ധീകരിക്കുകയും ചെയ്തു.
ഓഫര്‍ കേട്ടറിഞ്ഞ് ഉദ്ഘാടന സമയത്ത് ആയിരക്കണക്കിനാളുകള്‍ സ്ഥാപനത്തിനു മുന്നില്‍ തടിച്ചുകൂടി. പ്രധാന കവാടം തുറന്നതോടെ ഇവര്‍ കൂട്ടത്തോടെ സ്ഥാപനത്തിലേക്ക് ഇരച്ചുകയറി ഓഫറിലുള്ള ഉല്‍പന്നങ്ങള്‍ കൈക്കലാക്കാന്‍ മത്സരിച്ചു. ഇതിനിടെ തിക്കിലും തിരക്കിലും സ്ഥാപനത്തിലെ റാക്കുകളില്‍ പ്രദര്‍ശിപ്പിച്ചിരുന്ന ഫ്‌ളാസ്‌കുകളും പാത്രങ്ങളും അടക്കമുള്ളവ ഒന്നാകെ നിലത്തുവീഴുകയും പൊട്ടുകയും ചെയ്തു. നിലത്തുവീണ ഉല്‍പന്നങ്ങളില്‍ ഉപയോക്താക്കള്‍ ചവിട്ടിനടന്നു. ഇതിന്റെ ദൃശ്യങ്ങള്‍ അടങ്ങിയ വീഡിയോ സാമൂഹികമാധ്യമങ്ങളില്‍ വൈറലായി.