മലപ്പുറത്ത് അമ്മയുടെ വീട്ടിൽ വിരുന്നെത്തിയ പ്ലസ് ടു വിദ്യാർത്ഥിയെ കാണാനില്ല

മലപ്പുറം: മലപ്പുറം കാരാത്തോട് നിന്നും പ്ലസ് ടു വിദ്യാർത്ഥിയെ കാണാതായതായി പരാതി. കരുവാരക്കുണ്ട് നീലാഞ്ചേരി സ്വദേശി അനുവിന്ദിനെയാണ് കാണാതായത്. കുട്ടിയുടെ ബന്ധുക്കളുടെ പരാതിയിൽ കേസെടുത്ത് അന്വേഷണം ആരംഭിച്ചതായി വേങ്ങര പോലീസ് അറിയിച്ചു.

സ്‌കൂൾ അവധിയായതിനാൽ അമ്മയുടെ വീടായ കാരോത്തോട്ടിലേക്ക് ഇന്നലെയാണ് കുട്ടി വന്നത്. തുടർന്ന് ഇന്ന് രാവിലെ ആറോടെയാണ് കുട്ടിയെ കാണാതായത്. മൊബൈൽ ഫോൺ വീട്ടിൽ വച്ചാണ് പോയത്.

എല്ലാ വിഷയത്തിനും എ പ്ലസോടെയാണ് കുട്ടി എസ്.എസ്.എൽ.സി പാസായത്. എന്നാൽ, പ്ലസ് വണ്ണിലും പ്ലസ്ടൂവിലും അത്തരമൊരു റിസൾട്ടിലേക്ക് എത്തിയിരുന്നില്ല. ഇതിൽ പ്രയാസമുണ്ടായതായി പറയുന്നു. പഠനം ബുദ്ധിമുട്ടാണെന്ന കാര്യം സഹപാഠികളോടും മറ്റും പങ്കുവെച്ചതായും വിവരമുണ്ട്. മറ്റ് പ്രയാസങ്ങളൊന്നും കുട്ടിക്ക് ഇല്ലെന്നാണ് കുടുംബം പറയുന്നത്.