മലപ്പുറം: മുഖ്യമന്ത്രി പിണറായി വിജയനും പാർട്ടി നേതാക്കൾക്കും എ.ഡി.ജി.പി അടക്കമുള്ള ചില ഉന്നത പോലീസ് ഉദ്യോഗസ്ഥർക്കുമെതിരേ ഗുരുതരമായ ആരോപണം ഉയർത്തിയതിന് പിന്നാലെ സി.പി.എം തള്ളിപ്പറഞ്ഞ നിലമ്പൂർ എം.എൽ.എ പി.വി അൻവറിനോട് ബൈബ ബൈ പറഞ്ഞ് അദ്ദേഹത്തിന്റെ എഫ്.ബി അഡ്മിനും രംഗത്ത്.
പാർട്ടി നേതൃത്വം തള്ളിപ്പറഞ്ഞതിന് പിന്നാലെയാണ് പി.വി അൻവറിന്റെ ഫേസ്ബുക്ക് പേജ് കൈകാര്യം ചെയ്യുന്നതിൽനിന്ന് ഒഴിയുന്നുവെന്ന് വ്യക്തമാക്കി അഡ്മിൻ കെ.എസ് സലിത്ത് കുറിപ്പിട്ടത്. ഒരുപാട് കഷ്ടപ്പെട്ട് വളർത്തിയ ഒരു കട പൂട്ടി പോകേണ്ടി വന്നതിൽ നല്ല മാനസിക സംഘർഷമുണ്ടെന്നും പാർട്ടിക്കൊപ്പം മാത്രമാണെന്നും സലിത്ത് വ്യക്തമാക്കി.
എം.എൽ.എയുടെ എഫ്.ബി പേജിന്റെ അഡ്മിനായിരുന്ന സലിത്ത് കട പൂട്ടുന്നുവെന്ന് പറഞ്ഞ് പ്രസ്തുത സ്ഥാനത്തുനിന്ന് മാറിയെങ്കിലും പി.വി അൻവറിന്റെ എഫ്.ബി പേജ് ഇപ്പോഴും നിലവിലുണ്ട്. നാളെ നിലമ്പൂരിൽ നടക്കാനിരിക്കുന്ന പൊതുസമ്മേളനം ഉണർത്തിയുള്ള എം.എൽ.എയുടെ വീഡിയോ പോസ്റ്റുകൾ അടക്കമുള്ള പുതിയ പോസ്റ്റുകളും എഫ്.ബി പേജിൽ വന്നിട്ടുണ്ട്.
സലിത്തിന്റെ എഫ്.ബി കുറിപ്പ് ഇങ്ങനെ:
ഓരോ വ്യക്തികൾക്കും അവരുടേതായ വ്യക്തി സ്വാതന്ത്ര്യവും, രാഷ്ട്രീയനിലപാടുകളും ഉണ്ട്. അങ്ങനെ ഒരേ നിലപാടുള്ള കാലത്ത്, ആശയപരമായും മാനസികമായും പലരോടും നമ്മൾ ഐക്യപ്പെട്ടെന്നിരിക്കും. അതേ ചെയ്തിട്ടുള്ളൂ എന്ന ബോധ്യം എനിക്കുണ്ട്. അവർക്കൊപ്പം നിന്ന് പറഞ്ഞതൊക്കെയും എന്റെ കൂടി രാഷ്ട്രീയ ബോധ്യങ്ങളാണ്. ആ അഭിപ്രായങ്ങൾ പ്രകടിപ്പിക്കാൻ ഒരു സ്‌ക്രീനിംഗുമില്ലാതെ വേദി തന്നു എന്നത് പറയാതിരിക്കാൻ പറ്റില്ല.
എന്റെ ബോധ്യങ്ങളിൽ അന്നും ഇന്നും അണുവിട മാറ്റമില്ല. ഇത് ഇവിടെ പറയാതിരിക്കാം. നിശബ്ദനായിരിക്കാം. പക്ഷേ, ഈ വ്യക്തിബന്ധത്തെയും സ്വാധീനിച്ചത് എല്ലാത്തിലുമുപരി സമാന ചിന്താഗതിയായിരുന്നു. ഇന്ന് അത് ഉണ്ടെന്ന് എനിക്ക് എന്റെ ബോധ്യത്തിൽ തോന്നുന്നില്ല. ഒരുപാട് കഷ്ടപ്പെട്ട് നമ്മൾ കൂടി വളർത്തിയ ഒരു കട പൂട്ടി പോകേണ്ടി വരുന്നതിൽ നല്ല മാനസികസംഘർഷമുണ്ട്. മറ്റാർക്കും ഊഹിക്കാൻ കഴിയുന്നതിലും അപ്പുറം. പാർട്ടിക്കൊപ്പമാണ്…പാർട്ടിക്കൊപ്പം മാത്രമാണ്.
…………………………………..
നീതീകരിക്കാൻ കഴിയുന്ന എന്തെങ്കിലും എലമെന്റ്‌സ് ബാക്കി ഉണ്ടായിരുന്നെങ്കിൽ, അതിന്റെ എല്ലാം മെറിറ്റും കൂടി ഇന്നത്തോടെ റദ്ദ് ചെയ്യപ്പെട്ടിട്ടുണ്ടെന്ന് പറഞ്ഞ് മറ്റൊരു ഫേസ്ബുക്ക് പോസ്റ്റും സലിത്ത് പങ്കുവച്ചിട്ടുണ്ട്. ഒരിക്കലും ഒരാൾ എന്തൊക്കെ പറയാൻ പാടില്ല എന്നതിന്റെ ജീവിച്ചിരിക്കുന്ന സ്‌പെസിമെൻ എന്നും സലിത്ത് വ്യക്തമാക്കി.