(എടക്കര) മലപ്പുറം: നിലമ്പൂരിനടുത്ത എടക്കരയിലെ പച്ചക്കറിക്കടയിൽ നിന്ന് പാമ്പ് കടിയേറ്റ് പ്ലസ് ടു വിദ്യാർത്ഥി മരിച്ചു. വഴിക്കടവ് ആനപ്പാറയിലെ പുത്തൻ വീട്ടിൽ നൗഷാദ്-സജ്‌ന ദമ്പതികളുടെ മകനും എടക്കര ഗവ. ഹയർ സെക്കൻഡറി സ്‌കൂളിലെ പ്ലസ് ടു വിദ്യാർത്ഥിയുമായ സിനാൻ (17) ആണ് മരിച്ചത്.
സ്‌കൂളിലെ എൻ.എസ്.എസ് വളണ്ടിയർ കൂടിയായ സിനാൻ, അവധി ദിവസങ്ങളിലും സ്‌കൂൾ വിട്ടശേഷവും എടക്കരയിലെ പച്ചക്കറിക്കടയിൽ സഹായത്തിന് പോകാറുണ്ട്. അതേപോലെ ഇന്ന് (തിങ്കൾ) വൈകീട്ടും പച്ചക്കറി കടയിൽ എത്തിയതായിരുന്നു. ഇവിടെനിന്ന് നാലിനും 4.30നും ഇടയിലാണ് പാമ്പിന്റെ കടിയേറ്റതായി സംശയിക്കുന്നത്. പാമ്പിനെ പിടികൂടാനായിട്ടില്ല. സിനാന് തളർച്ച അനുഭവപ്പെട്ടതിനെ തുടർന്ന് ഉടനെ എടക്കരയിലെ സ്വകാര്യ ആശുപത്രിയിലും പിന്നീട് വിഷ ചികിത്സാലയത്തിലും പ്രവേശിപ്പിക്കുകയായിരുന്നു. തുടർന്ന് നിലമ്പൂർ ജില്ല ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
പാമ്പ് കടിയേറ്റാണ് വിദ്യാർത്ഥി മരിച്ചതെന്ന് ജില്ല ആശുപത്രി അധികൃതർ പറഞ്ഞു. മൃതദേഹം നിലമ്പൂർ ജില്ല ആശുപത്രി മോർച്ചറിയിലേക്ക് മാറ്റി. ഖബറടക്കം നാളെ (ചൊവ്വ) ആനപ്പാറ ജുമാ മസ്ജിദ് ഖബർസ്ഥാനിൽ നടക്കുമെന്ന് ബന്ധുക്കൾ അറിയിച്ചു. മാമാങ്കര എ.യു.പി സ്‌കൂളിലെ ഏഴാംക്ലാസ് വിദ്യാർത്ഥി സിഫാൻ സഹോദരനാണ്.