ജിദ്ദ- ജിദ്ദയെ ഇളക്കിമറിച്ച് സിനിമാതാരം ദിലീപും സംവിധായകൻ നാദിർഷായും. മദീന റോഡ് റുവൈസിലെ ദേ പുട്ട് ഉദ്ഘാടനത്തിന് എത്തിയ ദിലീപിനെ ഏറെ ആവേശത്തോടെയാണ് ആരാധകർ വരവേറ്റത്. മദീന റോഡ് ലുലു കെട്ടിടത്തിലാണ് ഗുഡ്ഹോപ്പ് ഇന്റർനാഷണലിന്റെ കീഴിൽ ദേ പുട്ട് റസ്റ്റോറന്റ് പ്രവർത്തനം ആരംഭിച്ചത്. താരത്തെ കാണുന്നതിനായി ഏറെ നേരത്തെ തന്നെ നിരവധി പേർ സ്ഥലത്തെത്തിയിരുന്നു. വൈകിട്ട് ആറുമണിയോടെ വേദിയിലെത്തിയ ദിലീപിനെ ജനം ആർപ്പുവിളികളോടെ സ്വീകരിച്ചു.
സ്ത്രീകളും കുട്ടികളുമടക്കം ഒട്ടേറെ പേരാണ് ചടങ്ങിനെത്തിയത്. ദേ പുട്ടിന്റെ സൗദി അറേബ്യയിലെ ആദ്യത്തെ ഔട്ട്ലെറ്റാണ് ജിദ്ദയിൽ പ്രവർത്തനം ആരംഭിച്ചത്. സംവിധായകനും നടനുമായ നാദിർഷായും ദിലീപിനൊപ്പം ഉദ്ഘാടന ചടങ്ങിൽ പങ്കെടുത്തു.
സൗദി, സൗത്ത് ഇന്ത്യൻ, നോർത്ത് ഇന്ത്യൻ കോണ്ടിനെന്റൽ വിഭവങ്ങളാൽ സമൃദ്ധമായിരിക്കും ദേ പുട്ടിന്റെ മെനുവെന്ന് ഗുഡ്ഹോപ്പ് ഇന്റർനാഷണൽ മാനേജിംഗ് ഡയറക്ടർ ജുനൈസ് ബാബു ഉദ്ഘാടന ചടങ്ങിൽ അറിയിച്ചു. ഇതിന് പുറമെ മലയാളികൾ അടക്കമുള്ളവർക്ക് ഗൃഹാതുരത സമ്മാനിക്കുന്ന തനത് വിഭവങ്ങളും ദേ പുട്ടിലുണ്ടായിരിക്കുമെന്നും അദ്ദേഹം പറഞ്ഞു. മുഴുവൻ ആരാധകർക്കുമൊപ്പം സെൽഫിയെടുത്താണ് ഉദ്ഘാടന ദിവസം ദിലീപ് ദേ പുട്ടിൽനിന്ന് തിരിച്ചത്.