തബൂക്ക്: ദുരിതപ്പെയ്ത്തിൽ ദുരന്തത്തിലായ വയനാട്ടിലെ ജനങ്ങളെ സഹായിക്കുന്നതിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് തന്റെ മൂന്ന് വർഷത്തെ കുടുക്ക സമ്പാദ്യം നൽകി തബൂക്കിലെ വർക്ക്ഷോപ്പ് ജീവനക്കാരൻ. തബൂക്ക് സനയ്യയിലെ വാഹന വർക്ക്ഷോപ്പിലെ തൊഴിലാളി ഷമീർ ആണ് തന്റെ സഹജീവികളുടെ സ്വാന്തനത്തിനായി മൂന്ന് വർഷത്തെ കുടുക്ക സമ്പാദ്യം നൽകിയത്. നേരത്തെയും നിരവധി ജീവകാരുണ്യ പ്രവർത്തനങ്ങൾക്ക് നേരിട്ടിറങ്ങിയിട്ടുള്ള ഷമീർ തബൂക്കിലെ പ്രമുഖ സാംസ്‌കാരിക-ജീവകാരുണ്യ സംഘടനയായ മാസ്സ് തബൂക്ക് കേന്ദ്ര കമ്മറ്റിയംഗവും സനയ്യ ഏരിയ സെക്രട്ടറിയും കൂടിയാണ്.
മാസ്സ് തബൂക്കിന്റെ നേതൃത്വത്തിൽ നടക്കുന്ന “വയനാട് ജനതയ്ക്ക് മാസ്സിന്റെ കൈത്താങ്ങ്” ക്യാമ്പയിനിന്റെ ഭാഗമായി മുഖ്യമന്ത്രിയുടെ ദുരിതാശ്വാസ നിധിയിലേക്കാണ് സംഭാവന നൽകിയത്. സമ്പാദ്യ കുടുക്ക മാസ്സ് തബൂക്ക് സെക്രട്ടറി ഉബൈസ് മുസ്തഫ ഏറ്റുവാങ്ങി. ലോകകേരള സഭാംഗം ഫൈസൽ നിലമേൽ, മാസ്സ് രക്ഷാധികാരി സമിതിയംഗം മാത്യു തോമസ് നെല്ലുവേലിൽ, സനയ്യ ഏരിയ പ്രസിഡന്റ് വിശ്വൻ പാലക്കാട്, മുസ്തഫ തെക്കൻ, ചന്ദ്രശേഖരകുറുപ്പ് , ലിയോൺ തുടങ്ങിയവർ സംബന്ധിച്ചു. നേരത്തെ മാസ്സിന്റെ ആദ്യ ഗഡു തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് മാസ്സ് കേന്ദ്ര കമ്മറ്റിയംഗം സുരേഷ്‌കുമാർ മുഖ്യമന്ത്രിയുടെ ഓഫീസിലെത്തി നേരിട്ട് നൽകിയിരുന്നു.