ജിദ്ദ – സൗദി അറേബ്യയുടെ വിവിധ പ്രവിശ്യകളില് ഒരാഴ്ചക്കിടെ സുരക്ഷാ വകുപ്പുകള് നടത്തിയ പരിശോധനകളില് 20,000 ലേറെ നിയമ ലംഘകര് പിടിയിലായതായി ആഭ്യന്തര മന്ത്രാലയം അറിയിച്ചു. ഈ മാസം നാലു മുതല് പത്തു വരെയുള്ള ദിവസങ്ങളില് 12,460 ഇഖാമ നിയമ ലംഘകരും 5,400 നുഴഞ്ഞുകയറ്റക്കാരും 2,233 തൊഴില് നിയമ ലംഘകരും അടക്കം ആകെ 20,093 നിയമ ലംഘകരാണ് പിടിയാലയത്. ഇക്കാലയളവില് അതിര്ത്തികള് വഴി രാജ്യത്ത് നുഴഞ്ഞുകയറാന് ശ്രമിച്ച 1,737 പേരും അറസ്റ്റിലായി. ഇക്കൂട്ടത്തില് 42 ശതമാനം പേര് യെമനികളും 57 ശതമാനം പേര് എത്യോപ്യക്കാരും ഒരു ശതമാനം പേര് മറ്റു രാജ്യക്കാരുമാണ്.
ഒരാഴ്ചക്കിടെ അതിര്ത്തികള് വഴി അനധികൃത രീതിയില് രാജ്യം വിടാന് ശ്രമിച്ച 49 പേരും സുരക്ഷാ വകുപ്പുകളുടെ പിടിയിലായി. ഇഖാമ, തൊഴില് നിയമ ലംഘകര്ക്കും നുഴഞ്ഞുകയറ്റക്കാര്ക്കും താമസ, യാത്രാ സൗകര്യങ്ങളും ജോലിയും നല്കിയ 16 പേരെയും ഏഴു ദിവസത്തിനിടെ അറസ്റ്റ് ചെയ്തു. നിലവില് വിവിധ പ്രവിശ്യകളിലെ ഡീപോര്ട്ടേഷന് സെന്ററുകളില് കഴിയുന്ന 19,841 നിയമ ലംഘകര്ക്കെതിരെ നിയമാനുസൃത നടപടികള് സ്വീകരിച്ചുവരികയാണ്. ഇക്കൂട്ടത്തില് 18,209 പേര് പുരുഷന്മാരും 1,632 പേര് വനിതകളുമാണ്.
ഒരാഴ്ചക്കിടെനിയമ 11,655 ലംഘകരെ സൗദിയില് നിന്ന് നാടുകടത്തി. സ്വദേശങ്ങളിലേക്ക് തിരിച്ചയക്കുന്നതിനു മുന്നോടിയായി യാത്രാ രേഖകളില്ലാത്ത 9,438 നിയമ ലംഘകര്ക്ക് എംബസികളുമായും കോണ്സുലേറ്റുകളുമായും സഹകരിച്ച് താല്ക്കാലിക യാത്രാ രേഖകള് സംഘടിപ്പിക്കാന് ശ്രമം തുടരുന്നു. 3,833 പേര്ക്ക് ടിക്കറ്റ് ബുക്ക് ചെയ്യാന് നടപടികള് സ്വീകരിക്കുന്നതായും ആഭ്യന്തര മന്ത്രാലയം പറഞ്ഞു.