റിയാദ്- രണ്ടാഴ്ച മുമ്പ് റിയാദില്‍ കാണാതായ തിരുവനന്തപുരം സ്വദേശിയെ റിയാദ് അന്താരാഷ്ട്ര വിമാനത്താവളത്തില്‍ നിന്ന് കണ്ടെത്തി. തിരുവനന്തപുരം വെഞ്ഞാറമൂട് സജികുമാറിനെയാണ് ഇന്ന് പുലര്‍ച്ചെ മൂന്നു മണിക്ക് വിമാനത്താവളത്തില്‍ റിയാദ് ഹെല്‍പ്‌ഡെസ്‌ക് കൂട്ടായ്മ അംഗങ്ങള്‍ കണ്ടെത്തിയത്.
മുഷിഞ്ഞ പാന്റും ഷര്‍ട്ടും ആണ് സജി കുമാര്‍ ധരിച്ചിരുന്നത്. കഴിഞ്ഞ ദിവസങ്ങളില്‍ കൃത്യമായ ഭക്ഷണവും ഉറക്കവും കിട്ടാത്തതിനാല്‍ വളരെ ക്ഷീണിതനായിരുന്നു. ഭക്ഷണവും ഡ്രസ്സും വാങ്ങി കൊടുത്ത് ശരീരമെല്ലാം കഴുകി വൃത്തിയാക്കി ഹോട്ടല്‍ റൂമില്‍ താമസിപ്പിച്ചിരിക്കുകയാണ്. ഇദ്ദേഹത്തെ നാട്ടില്‍ എത്തിക്കുന്നതിന് വേണ്ടിയുള്ള നിയമ നടപടികള്‍ ഇന്ത്യന്‍ എംബസിയുടെ സഹായത്തോടെ പൂര്‍ത്തീകരിച്ചുവരികയാണ്.
റിയാദ് ഹെല്‍പ് ഡെസ്‌ക് പ്രവര്‍ത്തകരായ ശിഹാബ് കൊട്ടുകാട്, നൗഷാദ് ആലുവ, സലാം പെരുമ്പാവൂര്‍, അലി ആലുവ, ബഷീര്‍ കാരോളം എന്നിവരുടെ നേതൃത്വത്തില്‍ ആണ് ഇദ്ദേഹത്തെ കണ്ടെത്തിയത്.