നിയമസഹായം തേടിയെത്തിയ യുവതിയെ വിവാഹവാഗ്ദാനം നൽകി പീഡിപ്പിച്ചു; അഭിഭാഷകനെതിരേ കേസ്

കാസർക്കോട്: വിവാഹ മോചനത്തിന് നിയമസഹായം തേടിയ യുവതിയെ അഭിഭാഷകൻ പ്രണയം നടിച്ച് പീഡിപ്പിച്ചതായി പരാതി. കാസർക്കോട്ടെ അഭിഭാഷകനായ നിഖിൽ നാരായണന് എതിരെയാണ് 32-കാരി പോലീസിൽ പരാതി നല്കിയത്.
ഭർത്താവുമായുള്ള പ്രശ്‌നത്തെ തുടർന്ന് വിവാഹമോചനത്തിന് കേസ് നൽകാനാണ് യുവതി അഡ്വ. നിഖിൽ നാരായണനെ സമീപിച്ചത്. എന്നാൽ, പ്രണയം നടിച്ച് വിവാഹം കഴിക്കാമെന്ന് വാഗ്ദാനം നല്കിയ അഭിഭാഷകൻ പിന്നീട് ബന്ധത്തിൽനിന്ന് പിൻമാറുകയായിരുന്നുവെന്ന് യുവതി പറഞ്ഞു. 2023 ജനുവരി മുതൽ 2024 ഏപ്രിൽ വരെ അഭിഭാഷകൻ പീഡിപ്പിച്ചതായും യുവതി പരാതിപ്പെട്ടു.
ഇരുവരും ഒരുമിച്ചായിരുന്നു താമസം. പിന്നീട് ബന്ധത്തിൽനിന്ന് പിന്മാറിയതോടെ അഭിഭാഷകൻ മർദ്ദിച്ചതായും പരാതിയിലുണ്ട്. അഭിഭാഷകൻ ഏർപ്പാടാക്കിയ വീട്ടിലാണ് യുവതി ഇപ്പോൾ താമസിക്കുന്നത്. ഇവിടെ നിന്ന് ഇറങ്ങിപ്പോകണമെന്നാവശ്യപ്പെട്ട് കഴിഞ്ഞദിവസം ഒരു സംഘം ആക്രമിച്ചതായും യുവതി പറഞ്ഞു.
യുവതിയുടെ പരാതിയിൽ, അഭിഭാഷകനെതിരേ കേസെടുത്ത് അന്വേഷണം ആരംഭിച്ചതായി കാസർകോട് വനിതാ പോലീസ് പ്രതികരിച്ചു. കാസർകോട് ബാർ അസോസിയേഷനിലും പരാതി നല്കിയതായി യുവതി അറിയിച്ചു.