ദുബായ്: ജോലിക്കായി ദുബായിൽ നിന്ന് തായ്‌ലാൻഡിലെത്തിയ രണ്ട് മലപ്പുറം സ്വദേശികളെ കാണാനില്ലെന്ന് പരാതി. മലപ്പുറം മങ്കട വള്ളിക്കാപ്പറ്റ കുട്ടീരി ഹൗസിൽ അബൂബക്കറിന്റെ മകൻ ശുഹൈബ്, കൂരിമണ്ണിൽ പുളിക്കാമത്ത് സഫീർ എന്നിവരെയാണ് കഴിഞ്ഞ 22 മുതൽ കാണാതായത്. ഓൺലൈൻ വഴി ലഭിച്ച ജോലിക്കായി ദുബായിൽ നിന്ന് തായ്‌ലാൻഡിലേക്ക് പോയതാണിവർ.
എന്നാൽ ഒരാഴ്ചയിലേറെയായി ഇവരുടെ വിവരമില്ലെന്നാണ് കുടുംബം പറയുന്നത്.
മാർച്ച് 27നാണ് ഇരുവരും വിസിറ്റ് വിസയിൽ ദുബായിലെത്തുന്നത്. ഇരുവരും നേരത്തെ ഗൾഫിൽ ജോലി ചെയ്തിട്ടുള്ളതായും കുടുംബം പറയുന്നു. ജോലിക്കായി ശ്രമിക്കുന്നതിനിടെ ഓൺലൈൻ വഴി ജോലി ലഭിച്ചപ്പോൾ ഇരുവരും തായ്‌ലാൻഡിലേക്ക് പോയതാണ് വിവരം.
അന്വേഷണം ആവശ്യപ്പെട്ട് മുഖ്യമന്ത്രിക്കും ഇന്ത്യൻ എംബസികും നോർക്ക റൂട്ട്സിനും ജില്ലാ പോലീസ് മേധാവിക്കും കുടുംബം പരാതി നൽകിയിരിക്കുകയാണ്. ഇവരെ കണ്ടെത്താനുള്ള ശ്രമങ്ങൾക്കായി നാട്ടുകാരുടെ നേതൃത്വത്തിലുള്ള ആക്ഷൻ കൗൺസിലും രൂപീകരിച്ചിട്ടുണ്ട്.