മുക്കത്ത് ടൂറിസ്റ്റ് ബസിൽ കാറിടിച്ച് യുവാവിന് ദാരുണാന്ത്യം

(മുക്കം) കോഴിക്കോട് – നിർത്തിയിട്ട ടൂറിസ്റ്റ് ബസ്സിന്റെ പിറകിൽ സ്വിഫ്റ്റ് കാറിടിച്ച് മുക്കത്ത് യുവാവിന് ദാരുണാന്ത്യം. മുക്കം മാങ്ങാപൊയിലിൽ ശനിയാഴ്ച പുലർച്ചെ രണ്ടിനാണ് അപകടമുണ്ടായത്. എരഞ്ഞിമാവ് സ്വദേശി ഫഹദ് സമാൻ (24) ആണ് മരിച്ചത്.
പാതയോരത്ത് നിർത്തിയിട്ട ടൂറിസ്റ്റ് ബസിന് പിറകിൽ കാറിടിക്കുകയായിരുന്നു. ഉടനെ കോഴിക്കോട്ടെ സ്വകാര്യ ആശുപത്രയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്‌മോർട്ടത്തിനുശേഷം ബന്ധുക്കൾക്ക് കൈമാറുമെന്ന് പോലീസ് പറഞ്ഞു.
കൊച്ചിയിൽ ജോലി ചെയ്യുന്ന ഫഹദ് സുഹൃത്തിനെ കാണാൻ പോകുന്നതിനിടെയാണ് അപകടം. അപകടസമയത്ത് ഫഹദ് മാത്രമാണ് കാറിലുണ്ടായിരുന്നത്. രാത്രി പെയ്ത മഴയിൽ കാർ നിയന്ത്രണം വിട്ട് ബസിൽ ഇടിക്കുകയായിരുന്നുവെന്നാണ് പ്രാഥമിക നിഗമനം. അപകടത്തിൽ കാർ പൂർണമായും തകർന്നിട്ടുണ്ട്.