തെഹ്‌റാൻ: യു.എസ് ഇടക്കാല തെരഞ്ഞെടുപ്പിന് ശേഷം ഇറാനും അമേരിക്കയ്ക്കും ഇടയിൽ പുതിയ സമാധാന ചർച്ചകളൊന്നും നടന്നിട്ടില്ലെന്ന് ഇറാൻ വിദേശകാര്യ മന്ത്രി അബ്ബാസ് അറാഖ്ജി വ്യക്തമാക്കി. തെരഞ്ഞെടുപ്പിലുണ്ടായ തിരിച്ചടിയുടെ ആഘാതത്തിൽ നിന്നും യു.എസ് ഭരണകൂടം മുക്തമായിട്ടില്ലെന്നും ഇനി എങ്ങനെ മുന്നോട്ട് പോകണമെന്ന് അവർ തീരുമാനിക്കേണ്ടതുണ്ടെന്നും അദ്ദേഹം പറഞ്ഞു. ഒരു ഇറാനിയൻ സർക്കാർ ടെലിവിഷൻ ചാനലിന് നൽകിയ അഭിമുഖത്തിലാണ് അറാഖ്ജി ഇക്കാര്യം വ്യക്തമാക്കിയത്.
ഖത്തറും പാകിസ്ഥാനും ഉൾപ്പെടെയുള്ള രാജ്യങ്ങൾ മാധ്യസ്ഥ്യത്തിന് ശ്രമിക്കുന്നുണ്ടെങ്കിലും യുദ്ധം അവസാനിപ്പിക്കുന്നതിൽ ഇതുവരെ പുരോഗതിയുണ്ടായിട്ടില്ല. സംഘർഷം ചർച്ചകളിലൂടെ ലഘൂകരിക്കണമോ അതോ കടുത്ത യുദ്ധത്തിലേക്ക് നീങ്ങണമോ എന്ന് അമേരിക്ക തീരുമാനിക്കണമെന്ന് അറാഖ്ജി മുന്നറിയിപ്പ് നൽകി. ഇറാൻ മുന്നോട്ടുവെച്ച സമാധാന നിർദ്ദേശം അംഗീകരിക്കുക, അല്ലെങ്കിൽ ശക്തമായ സൈനിക തിരിച്ചടി നേരിടാൻ തയ്യാറാവുക എന്ന് അദ്ദേഹം എക്സ് (X) പ്ലാറ്റ്‌ഫോമിലൂടെ വൈറ്റ് ഹൗസിനോട് ആവശ്യപ്പെട്ടു.
ഗ്യാസ് ഉൽപ്പാദനത്തിൽ പ്രതിസന്ധിയെന്ന് പ്രസിഡന്റ്: അതേസമയം, യു.എസ്-ഇസ്രായേൽ ആക്രമണങ്ങളെത്തുടർന്ന് രാജ്യത്തെ ഗ്യാസ് ഉൽപ്പാദനത്തിൽ കടുത്ത പ്രതിസന്ധിയുണ്ടെന്ന് ഇറാൻ പ്രസിഡന്റ് മസൂദ് പെസെഷ്‌കിയാൻ പറഞ്ഞു. വരുന്ന തണുപ്പുകാലത്ത് രാജ്യത്ത് ഇന്ധന ഉപഭോഗം പരമാവധി നിയന്ത്രിക്കണമെന്നും ലാഭിക്കണമെന്നും അദ്ദേഹം പൗരന്മാരോട് അഭ്യർത്ഥിച്ചു. തെക്കൻ തെഹ്‌റാനിലെ ഒരു മസ്ജിദ് സന്ദർശിക്കുന്നതിനിടെയാണ് പ്രസിഡന്റ് ഇക്കാര്യം വ്യക്തമാക്കിയത്.