വാഷിംഗ്ടൺ: യു.എസ് പ്രസിഡന്റ് ഡൊണാൾഡ് ട്രംപിൽ നിന്ന് ഉത്തരവ് ലഭിച്ചാൽ 96 മണിക്കൂറിനുള്ളിൽ ഇറാനെതിരെ വിപുലമായ സൈനിക നടപടികൾ ആരംഭിക്കാൻ മിഡിൽ ഈസ്റ്റിലെ യു.എസ് സേന പൂർണ്ണ സജ്ജമാണെന്ന് സി.എൻ.എൻ റിപ്പോർട്ട് ചെയ്തു. ആക്രമണങ്ങൾക്കായി ആവശ്യമായ സൈനിക വിന്യാസം മേഖലയിൽ ഇതിനകം പൂർത്തിയാക്കിയിട്ടുണ്ടെന്ന് രണ്ട് യു.എസ് ഉദ്യോഗസ്ഥരെ ഉദ്ധരിച്ചാണ് റിപ്പോർട്ട്.
ഇറാനിലെ റഡാറുകൾ, മിസൈൽ വിക്ഷേപണ കേന്ദ്രങ്ങൾ മറ്റ് സൈനിക ആസ്തികൾ എന്നിവയ്‌ക്കെതിരായ പരിമിതമായ ആക്രമണങ്ങൾക്കപ്പുറം വലിയ രീതിയിലുള്ള പ്രതികരണമായിരിക്കും ഇതെന്ന് ഉദ്യോഗസ്ഥർ സി.എൻ.എന്നിനോട് പറഞ്ഞു. ട്രംപ് ഒരു ഉത്തരവ് പുറപ്പെടുവിക്കുമോ എന്നതല്ല, എന്ന് പുറപ്പെടുവിക്കും എന്നത് മാത്രമാണ് ഇനി അറിയാനുള്ളതെന്ന് സൈനിക ആസൂത്രണ ചർച്ചകളിൽ പങ്കാളികളായ മറ്റ് ഉദ്യോഗസ്ഥരും വ്യക്തമാക്കി.
ഈ വർഷം അവസാനിക്കുന്നതിന് മുമ്പ് എന്ന് വേണമെങ്കിലും ട്രംപിന്റെ ഉത്തരവ് ഉണ്ടായേക്കാം. എന്നാൽ, യു.എസ് ഇടക്കാല തെരഞ്ഞെടുപ്പിന് ശേഷമായിരിക്കും ഇതിനുള്ള സാധ്യതയെന്നും സി.എൻ.എൻ റിപ്പോർട്ട് ചെയ്യുന്നു. അതേസമയം, യു.എസ് തന്ത്രങ്ങളെക്കുറിച്ച് ഇറാന് ധാരണയുള്ളതിനാൽ ലക്ഷ്യമിടുന്ന കേന്ദ്രങ്ങൾ പൂർണ്ണമായും തകർക്കുക എന്നത് കൂടുതൽ വെല്ലുവിളിയാണെന്ന് ഉദ്യോഗസ്ഥർ സമ്മതിക്കുന്നു. എങ്കിലും, യു.എസ് സെൻട്രൽ കമാൻഡും പെന്റഗണും ചേർന്ന് ഇറാന്റെ ഊർജ്ജ അടിസ്ഥാന സൗകര്യങ്ങൾ, സൈനിക കേന്ദ്രങ്ങൾ, ആണവ നിലയങ്ങൾ എന്നിവ ഉൾപ്പെടുന്ന വിപുലമായ ലക്ഷ്യപ്പട്ടിക തയ്യാറാക്കിയിട്ടുണ്ട്.
ഇടക്കാല തെരഞ്ഞെടുപ്പിന് ശേഷമുള്ള നടപടികളിൽ ട്രംപ് അന്തിമ തീരുമാനമെടുത്തിട്ടില്ലെങ്കിലും, വലിയ സൈനിക നടപടികളിലേക്ക് കടക്കാനാണ് അദ്ദേഹത്തിന് താല്പര്യമെന്നാണ് സൂചന. മുൻപും ഇത്തരം ഘട്ടങ്ങളിൽ തീരുമാനത്തിൽ നിന്ന് ട്രംപ് അവസാന നിമിഷം പിന്മാറിയിട്ടുണ്ടെന്നും ഉദ്യോഗസ്ഥർ ഓർമ്മിപ്പിച്ചു.