തെഹ്‌റാൻ: യു.എസ് ഉപരോധങ്ങളും നിയന്ത്രണങ്ങളും കർശനമാക്കിയതോടെ ഇറാനിൽ കര വഴിയുള്ള വിദേശ വ്യാപാരം കടുത്ത പ്രതിസന്ധിയിൽ. അയൽരാജ്യങ്ങളുമായുള്ള അതിർത്തികളിൽ പതിനായിരക്കണക്കിന് ചരക്ക് ട്രക്കുകൾ കുടുങ്ങിക്കിടക്കുന്നതോടെ രാജ്യത്ത് ഭക്ഷ്യവസ്തുക്കളുടെ വിലയിൽ 128 ശതമാനം വർധനവുണ്ടായതായി ‘ദി വാൾ സ്ട്രീറ്റ് ജേണൽ’ റിപ്പോർട്ട് ചെയ്തു.
യു.എസ് ഉപരോധം കണക്കിലെടുത്ത് പാകിസ്ഥാൻ രണ്ട് അതിർത്തി ക്രോസിംഗുകൾ വഴി ഇറാനിൽ നിന്നുള്ള ട്രക്കുകൾ തടഞ്ഞുവെച്ചിരിക്കുകയാണ്. ഇതോടെ പാകിസ്ഥാനിലേക്കുള്ള ഇറാന്റെ കയറ്റുമതി താത്കാലികമായി നിർത്തിവെച്ചു. ഇതിനുപുറമെ തുർക്കി, അഫ്ഗാനിസ്ഥാൻ, അസർബൈജാൻ എന്നീ രാജ്യങ്ങളുമായുള്ള അതിർത്തികളിലായി 17,000-ത്തിലധികം ട്രക്കുകൾ കുടുങ്ങിക്കിടക്കുകയാണെന്ന് ഇറാൻ അധികൃതർ സ്ഥിരീകരിച്ചു.
കര മാർഗമുള്ള ഗതാഗതം തടസ്സപ്പെട്ടത് ഇറാന്റെ സമ്പദ്‌വ്യവസ്ഥയെ കടുത്ത സാമ്പത്തിക സമ്മർദ്ദത്തിലേക്ക് തള്ളിയിട്ടിരിക്കുകയാണ്. ചർച്ചകൾക്ക് വാതിൽ തുറന്നിട്ടിട്ടുണ്ടെങ്കിലും ഇറാൻ കരാറിലെത്തിയില്ലെങ്കിൽ പുതിയ സൈനിക നടപടികളിലേക്ക് കടക്കുമെന്ന് യു.എസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിട്ടുണ്ട്. അതിർത്തികളിലെ പ്രതിസന്ധി എത്രനാൾ നീണ്ടുനിൽക്കുമെന്നതിൽ വ്യക്തതയില്ലാത്തതിനാൽ വരും ദിവസങ്ങളിൽ ഇറാന്റെ ആഭ്യന്തര വിപണിയിൽ കൂടുതൽ വിലക്കയറ്റമുണ്ടാകുമെന്നാണ് വിലയിരുത്തൽ.