മദീന– മദീനയിലെ അൽമതാർ ഡിസ്ട്രിക്ടിൽ സൗദി കുടുംബത്തിന്റെ അപ്പാർട്ട്‌മെന്റിലുണ്ടായ തീപിടുത്തത്തിൽ പരിക്കേറ്റ നാലാമത്തെ കുട്ടിയും മരിച്ചു. നാഷണൽ ഗാർഡ് ആശുപത്രിയിൽ ചികിത്സയിലായിരുന്ന ദാനയാണ് (12 ദിവസമായി ചികിത്സയിൽ) മരണമടഞ്ഞത്. പ്രവാചക പള്ളിയിലെ മയ്യിത്ത് നമസ്കാരത്തിന് ശേഷം ജന്നത്തുൽ ബഖീഇൽ സംസ്കരിച്ചു.
രണ്ടാഴ്ച മുമ്പ് പിതാവ് മുനവർ അൽഅസീസിയും മാതാവും പുറത്തുപോയ സമയത്ത് കുട്ടികൾ ഉറങ്ങിക്കിടക്കുമ്പോൾ എയർകണ്ടീഷണറിലുണ്ടായ ഷോർട്ട് സർക്യൂട്ടാണ് ദുരന്തത്തിന് കാരണമായത്. സിയാദ്, ദീം, അബ്ദുൽ അസീസ് എന്നീ സഹോദരങ്ങൾ സംഭവദിവസവും തുടർന്നുള്ള ദിവസങ്ങളിലുമായി നേരത്തെ മരണപ്പെട്ടിരുന്നു. ഇതോടെ മാതാപിതാക്കൾക്ക് തങ്ങളുടെ നാല് മക്കളെയും ഈ ദുരന്തത്തിൽ നഷ്ടമായി.
റിയാദിൽ മറ്റൊരു കുടുംബ ദുരന്തം കൂടി
മാസങ്ങൾക്ക് മുമ്പ് വീടുകളിൽ ഉണ്ടായ തീപിടുത്തത്തിൽ ഭാര്യയെയും മക്കളെയും നഷ്ടപ്പെട്ട റിയാദിലെ അഭിഭാഷകൻ മാജിദ് ബിൻ ദാവി അൽഉതൈ വെള്ളിയാഴ്ച വൈകുന്നേരം അന്തരിച്ചു. കുടുംബത്തിന്റെ വിയോഗത്തിന് ശേഷം മാനസികമായി തളർന്ന അദ്ദേഹം ഏഴ് മാസങ്ങൾക്ക് ശേഷമാണ് മരണത്തിന് കീഴടങ്ങിയത്.
കഴിഞ്ഞ വർഷം ചെറിയ പെരുന്നാളിന്റെ രണ്ടാം ദിവസം പുലർച്ചെയുണ്ടായ തീപിടുത്തത്തിൽ മാജിദിന്റെ ഭാര്യയും മുഴുവൻ കുട്ടികളും ദാരുണമായി കൊല്ലപ്പെട്ടിരുന്നു. അപകടത്തിൽ നിന്ന് തലനാരിഴയ്ക്ക് രക്ഷപ്പെട്ട മാജിദ് പിന്നീട് കടുത്ത മാനസിക വിഷമത്തിലായിരുന്നു. റിയാദ് അൽരാജ്ഹി ജുമാമസ്ജിദിൽ മയ്യിത്ത് നമസ്കാരത്തിന് ശേഷം അൽനസീം ഖബർസ്ഥാനിൽ സംസ്കാരം നടന്നു.