മസ്‌കത്ത്- ഒമാൻ ഉൾക്കടലിൽ യു.എസ് നാവികസേനാ കപ്പലുകളെ നിരീക്ഷിക്കുകയും ലക്ഷ്യമിടുകയും ചെയ്ത ഇറാൻ ബന്ധമുള്ള പരമ്പരാഗത പായ്ക്കപ്പൽ യു.എസ് സേന തകർത്തു. ഒക്ടോബർ 6-ന് നടന്ന സംഭവം ഒമ്പത് ദിവസത്തിന് ശേഷമാണ് യു.എസ് സെൻട്രൽ കമാൻഡ് എക്‌സ് പ്ലാറ്റ്ഫോമിലൂടെ ഔദ്യോഗികമായി പുറത്തുവിട്ടത്.
പായ്ക്കപ്പൽ തകർക്കുന്നതിന് മുമ്പ് അതിലുണ്ടായിരുന്ന ജീവനക്കാരെ സുരക്ഷിതമായി ഒഴിപ്പിച്ചിരുന്നുവെന്നും ഇവരെ സ്വന്തം നാട്ടിലെത്തിക്കാനുള്ള നടപടികൾ പുരോഗമിക്കുകയാണെന്നും യു.എസ് സൈനിക നേതൃത്വം അറിയിച്ചു. ഹെലികോപ്റ്ററുകൾ ഉപയോഗിച്ച് ആക്രമണം നടത്തുന്നതിന്റെയും തുടർന്ന് കപ്പലിൽ തീ പടരുന്നതിന്റെയും വീഡിയോ ദൃശ്യങ്ങളും സേന പുറത്തുവിട്ടിട്ടുണ്ട്. കഴിഞ്ഞ ഏഴ് മാസമായി മേഖലയിലെ കടൽപ്പാതകളിൽ സാധാരണ കപ്പലുകളെയും യു.എസ് യുദ്ധക്കപ്പലുകളെയും ഇറാൻ റെവല്യൂഷണറി ഗാർഡ് തുടർച്ചയായി ലക്ഷ്യമിടുകയാണെന്ന് യു.എസ് ആരോപിച്ചു.
ഇറാന്റെ തന്ത്രമാറ്റം
അമേരിക്കൻ ആക്രമണങ്ങളിൽ റഡാർ സംവിധാനങ്ങൾക്ക് വൻ നാശനഷ്ടം സംഭവിച്ചതിനെ തുടർന്ന് ഇറാൻ തങ്ങളുടെ തന്ത്രങ്ങളിൽ മാറ്റം വരുത്തിയതായി റോയിട്ടേഴ്സ് റിപ്പോർട്ട് ചെയ്തു. ആയുധങ്ങളില്ലാത്ത നിരീക്ഷകരെ പരമ്പരാഗത തടി പായ്ക്കപ്പലുകളിലും ചെറിയ ബോട്ടുകളിലും ഇരുത്തി ഹോർമുസ് കടലിടുക്കിലും പരിസരത്തും യു.എസ് കപ്പലുകളെ നിരീക്ഷിക്കുകയും, ഈ വിവരങ്ങൾ റെവല്യൂഷണറി ഗാർഡിന് കൈമാറുകയുമാണ് ഇറാൻ ചെയ്യുന്നതെന്ന് യു.എസ് സൈനിക ഉദ്യോഗസ്ഥർ വ്യക്തമാക്കി. ഇത്തരത്തിൽ വിവരങ്ങൾ ശേഖരിച്ച പായ്ക്കപ്പലാണ് ഉപേക്ഷിക്കാൻ ആവശ്യപ്പെട്ട ശേഷം യു.എസ് സേന തകർത്തത്.
On Oct. 6, U.S. forces destroyed an Iranian-affiliated dhow conducting surveillance and targeting U.S. Navy ships in the Gulf of Oman. Over the past seven months, Iran’s Islamic Revolutionary Guard Corps has continued to indiscriminately target thousands of civilian mariners transiting regional waters in addition to U.S. Navy warships. Crew members were safely removed prior to destruction of the dhow. Repatriation efforts are ongoing.
— U.S. Central Command (@CENTCOM) October 14, 2026
ഹോർമുസ് കടലിടുക്കിന് പുറത്തുള്ള കപ്പലുകളെയും ഇറാൻ ലക്ഷ്യമിടുന്നുണ്ടെന്നാണ് യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് സെന്ററിന്റെ സുരക്ഷാ വിശകലനങ്ങൾ സൂചിപ്പിക്കുന്നത്. അന്താരാഷ്ട്ര വിപണിയിൽ എണ്ണവില ഉയർന്ന നിലയിൽ നിലനിർത്താനും യു.എസ് ഇടക്കാല തെരഞ്ഞെടുപ്പിനെ സ്വാധീനിക്കാനുമാണ് ഇറാൻ ഇത്തരം പുതിയ നീക്കങ്ങൾ നടത്തുന്നതെന്ന് മുതിർന്ന ഇറാൻ ഉദ്യോഗസ്ഥരെ ഉദ്ധരിച്ച് റിപ്പോർട്ടുകൾ വ്യക്തമാക്കുന്നു.
അതേസമയം, ഓരോ രാത്രിയിലും അഞ്ചോ ആറോ കപ്പലുകളെ ഇറാൻ ലക്ഷ്യമിടുന്നുണ്ടെന്നും ഹോർമുസ് കടലിടുക്ക് തങ്ങളുടെ പൂർണ്ണ നിയന്ത്രണത്തിലാണെന്നും ഇറാൻ ഭരണകൂട പ്രതിനിധി മുഹ്‌സിൻ റെസായി വ്യക്തമാക്കി. ഹോർമുസിന് പുറത്തുവെച്ച് കപ്പലുകൾ തമ്മിൽ അസംസ്‌കൃത എണ്ണ കൈമാറ്റം ചെയ്യുന്ന ‘ഷട്ടിൽ സംവിധാനം’ ഇറാൻ പ്രധാനമായും ലക്ഷ്യമിടുന്നുണ്ട്.