വാഷിംഗ്ടൺ- അമേരിക്കയ്ക്ക് മുമ്പ് യൂറോപ്പിനെയും, ലോസ് ഏഞ്ചൽസ്, സാൻ ഡീഗോ തുടങ്ങിയ അമേരിക്കൻ നഗരങ്ങളെയും ലക്ഷ്യമിട്ട് ആക്രമണം നടത്താൻ ഇറാൻ പദ്ധതിയിട്ടതായി യു.എസ് പ്രസിഡന്റ് ഡൊണാൾഡ് ട്രംപ് വെളിപ്പെടുത്തി. ഇറാൻ ഒരു ആണവായുധം സ്വന്തമാക്കുന്നതിന്റെ അപകടങ്ങളെക്കുറിച്ച് മുന്നറിയിപ്പ് നൽകാനാണ് താൻ ഇത് ചൂണ്ടിക്കാണിച്ചതെന്ന് ട്രംപ് പിന്നീട് വ്യക്തമാക്കി. അതേസമയം, പ്രസ്താവനയെ പിന്തുണയ്ക്കുന്ന തെളിവുകളോ ആക്രമണ പദ്ധതിയെക്കുറിച്ചുള്ള വിശദാംശങ്ങളോ വൈറ്റ് ഹൗസ് പുറത്തുവിട്ടിട്ടില്ല.
ഇറാൻ മിസൈലുകൾക്ക് അമേരിക്കയുടെ പടിഞ്ഞാറൻ തീരത്തെ നഗരങ്ങൾ ലക്ഷ്യമിടാൻ ശേഷിയുണ്ടെന്ന ട്രംപിന്റെ പ്രസ്താവന യു.എസിൽ വലിയ വിവാദങ്ങൾക്ക് തിരികൊളുത്തിയിട്ടുണ്ട്. 2020ലെ യു.എസ് ഗവൺമെന്റ് വിലയിരുത്തൽ അനുസരിച്ച് ഇറാന്റെ ഏറ്റവും വലിയ ബാലിസ്റ്റിക് മിസൈലുകളുടെ ദൂരപരിധി 2,000 കിലോമീറ്ററാണ്. ഇവയ്ക്ക് അമേരിക്കൻ നഗരങ്ങളെ ആക്രമിക്കാനുള്ള ശേഷിയുണ്ടെന്ന് ഈ ഡാറ്റ തെളിയിക്കുന്നില്ലെന്ന് ചൂണ്ടിക്കാട്ടി കാലിഫോർണിയ ഉദ്യോഗസ്ഥർ രംഗത്തെത്തി. എന്നാൽ പ്രസ്താവന സന്ദർഭത്തിൽ നിന്ന് അടർത്തിയെടുത്തതാണെന്ന് യു.എസ് ഭരണകൂടം വാദിച്ചു.
അതേസമയം, അമേരിക്കയെ കാത്തിരിക്കുന്നത് ചരിത്രപരമായ പരാജയമാണെന്ന് ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മുഹ്‌സിൻ റെസായി പ്രതികരിച്ചു. ഇറാന്റെ കൈകളിൽ നിന്ന് പരാജയത്തിന്റെ കയ്പ്പ് അനുഭവിച്ച ശേഷം ചരിത്രത്തിന്റെ മറ്റൊരു പ്രധാന അധ്യായം വായിക്കുന്നത് നന്നായിരിക്കുമെന്ന് അദ്ദേഹം എക്‌സിൽ കുറിച്ചു. പണ്ടുകാലത്ത് സസാനിയൻ സാമ്രാജ്യത്തിലെ ഷാപൂർ ഒന്നാമന് മുന്നിൽ റോമൻ ചക്രവർത്തി മുട്ടുകുത്തിയ ചരിത്രം അമേരിക്ക ഓർക്കണമെന്നും അദ്ദേഹം മുന്നറിയിപ്പ് നൽകി.
ഗ്രീസിലെ ഏഥൻസിൽ വെച്ച് യു.എസ് സ്റ്റേറ്റ് സെക്രട്ടറി മാർക്കോ റൂബിയോ നടത്തിയ പ്രസ്താവനയ്ക്കുള്ള മറുപടിയായാണ് റെസായിയുടെ ഈ പ്രതികരണം. ഹോർമുസ് കടലിടുക്കിന്റെ മേലുള്ള നിയന്ത്രണം ഇറാന് പൂർണ്ണമായും നഷ്ടപ്പെട്ടതായും പ്രധാന സമുദ്രപാതകൾ നിയന്ത്രിക്കാനുള്ള ഏതൊരു ഒറ്റപ്പെട്ട രാജ്യത്തിന്റെ ശ്രമങ്ങളെയും അമേരിക്ക എതിർക്കുമെന്നും റൂബിയോ പറഞ്ഞിരുന്നു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group