റിയാദ്- റിയാദിലെ പ്രാദേശിക കൂട്ടായ്മകളുടെ പൊതുവേദിയായ ഫെഡറേഷൻ ഓഫ് റീജിണൽ കേരളയിറ്റ് അസോസിയേഷൻ (ഫോർക) യുടെ ഇരുപതാം വാർഷികാഘോഷം ‘ഫോർക മെഗാമേള ട്വന്റി 26’ ആൻഡ് ‘ഫുഡ് ഫെസ്റ്റ്’ ഒക്ടോബർ 9 വെള്ളിയാഴ്ച റിയാദിലെ ഷോല മാളിൽ നടക്കും. സൗദി അറേബ്യയിലെ ഇന്ത്യൻ അംബാസഡർ വിപുൽ മുഖ്യാതിഥിയായി പങ്കെടുക്കും.
ഹൈപ്പർ അൽ വഫയുടെ സഹകരണത്തോടെ സംഘടിപ്പിക്കുന്ന പരിപാടി ഉച്ചയ്ക്ക് രണ്ടിന് ആരംഭിക്കും. അമ്പതോളം ടീമുകൾ ഫുഡ് ഫെസ്റ്റിൽ മാറ്റുരക്കും. പ്രമുഖ ഷെഫ് ഷിയാസ് അൽ സാജിന്റെ നേതൃത്വത്തിലുള്ള വിധികർത്താക്കളാണ് വിജയികളെ കണ്ടെത്തുന്നത്. മത്സരത്തിൽ ഒന്നും രണ്ടും മൂന്നും വിജയികൾക്ക് ഒരു പവൻ, അര പവൻ, കാൽ പവൻ സമ്മാനവും കൂടാതെ പങ്കെടുക്കുന്നവർക്കെല്ലാം പ്രോത്സാഹന സമ്മാനങ്ങളും നൽകും. ഫുഡ് ഫെസ്റ്റ് മത്സരങ്ങളും കുട്ടികൾക്കായുള്ള കളറിംഗ്, പെൻസിൽ ഡ്രോയിംഗ് മത്സരങ്ങളും മൂന്ന് മണിക്ക് ആരംഭിക്കും.
നാലുമണിക്ക് പ്രാദേശിക കലാകാരൻമാരുടെ പരിപാടികൾ വേദിയിൽ അരങ്ങേറും. അഞ്ച് മണിക്ക് നടക്കുന്ന സാംസ്‌കാരിക പരിപാടിയിൽ ഫോർകയുടെ 38 അംഗസംഘടനകളിൽ നിന്നും ഏറ്റവും കൂടുതൽ കാലം പ്രവാസം നയിച്ച അംഗസംഘടന നിർദേശിക്കുന്ന ഒരാളെ വീതം 38 പേരെ ചടങ്ങിൽ ആദരിക്കും. കൂടാതെ അംഗസംഘടനകളുടെ കഴിഞ്ഞ മൂന്നു വർഷത്തെ മികച്ച പ്രവർത്തന റിപ്പോർട്ട് അടിസ്ഥാനമാക്കി മൂന്നു സംഘടനകളെ തെരഞ്ഞെടുത്തു പ്രത്യേകം ആദരിക്കും. കൂടാതെ ഫോർകയുടെ മുൻകാല പ്രധാന നേതാക്കളെയും ചടങ്ങിൽ ആദരിക്കും. തുടർന്ന് ഗായകരായ സലീം കോടത്തൂർ, ഷെയ്ക്ക അബ്ദുള്ള, സജീർ പട്ടുറുമാൽ എന്നിവർ നയിക്കുന്ന ഗാനമേളയും വിവിധ കലാപരിപാടികളും അരങ്ങേറും.
2006ൽ രൂപീകൃതമായ ഫോർക അംഗ സംഘടനകളുടെ കോ ഓർഡിനേഷൻ ഗ്രൂപ്പായി പ്രവർത്തിക്കുന്നതിനൊപ്പം റിയാദിലെ പ്രവാസി സമൂഹത്തിന്റെ പൊതു വിഷയങ്ങളിൽ മുൻപന്തിയിൽ നിന്ന് പ്രവർത്തിക്കുന്ന കൂട്ടായ്മയാണ്.
വാർത്താ സമ്മേളനത്തിൽ ഫോർക ചെയർമാൻ റഹ്‌മാൻ മുനമ്പത്ത്, ജനറൽ കൺവീനർ ഉമ്മർ മുക്കം, രക്ഷാധികാരികളായ ഷിഹാബ് കൊട്ടുകാട്, സെയ്ഫ് കായംകുളം, പ്രോഗ്രാം കൺവീനർ കരീം കാനാമ്പുറം, ഹൈപ്പർ അൽ വഫ ഡയറക്ടർ നാസർ, മാർക്കറ്റിങ് മാനേജർ ഫഹദ്, ഫോർക വൈസ് ചെയർമാൻ ജയൻ കൊടുങ്ങല്ലൂർ, ഫുഡ് ഫെസ്റ്റ് കൺവീനർ അലക്സ് കൊട്ടാരക്കര, ആക്ടിങ് കൺവീനർ വിനോദ് കൃഷ്ണ, ജോയിന്റ് കൺവീനർ അഖിനാസ് കരുനാഗപ്പള്ളി, ജോയിന്റ് ട്രഷറർ മുഹമ്മദ് ഖാൻ റാന്നി എന്നിവർ പങ്കെടുത്തു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group