തെൽഅവീവ്- മിഡിൽ ഈസ്റ്റിൽ പുതിയ സംഘർഷങ്ങൾ ഉടലെടുത്തേക്കുമെന്ന ആശങ്കകൾക്കിടയിൽ ഇസ്രായേലിൽ ഏകദേശം 3,000 യു.എസ് സൈനികരെ വിന്യസിച്ചതായി റിപ്പോർട്ട്. ഇസ്രായേലി വാർത്താ സൈറ്റായ ‘വല്ല’ ആണ് സുരക്ഷാ സ്രോതസ്സുകളെ ഉദ്ധരിച്ച് ഈ വിവരങ്ങൾ പുറത്തുവിട്ടത്. വരും ആഴ്ചകളിൽ കൂടുതൽ സേനയെയും യുദ്ധവിമാനങ്ങളെയും ഇസ്രായേലിലേക്ക് അയക്കാൻ അമേരിക്ക തയ്യാറെടുക്കുന്നതായും റിപ്പോർട്ടിൽ വ്യക്തമാക്കുന്നു.
നിലവിലുള്ള 3,000 സൈനികരും ഒരേസമയം എത്തിയവരല്ല. വ്യോമ പ്രതിരോധ സംവിധാനങ്ങൾ പ്രവർത്തിപ്പിക്കുക, പൈലറ്റുമാർ, സപ്പോർട്ട് ക്രൂകൾ, ലോജിസ്റ്റിക്സ് യൂണിറ്റുകൾ, കമാൻഡ് ആൻഡ് സ്റ്റാഫ് ഉദ്യോഗസ്ഥർ എന്നീ നിലകളിൽ വിവിധ ദൗത്യങ്ങളിലായി സേവനമനുഷ്ഠിക്കുന്നവരുടെ മൊത്തം കണക്കാണിത്. ഇറാനുമായുള്ള പുതിയ ഏറ്റുമുട്ടലുകൾ പൊട്ടിപ്പുറപ്പെടാനുള്ള സാധ്യതയും, മിസൈൽ ആക്രമണങ്ങളെ പ്രതിരോധിക്കാനുള്ള തയ്യാറെടുപ്പുകളുമാണ് ഇതിന് പിന്നിലെന്നാണ് സൂചന.
ഇറാൻ ഇസ്രായേലിലേക്കോ ജോർദാനിലേക്കോ മിസൈലുകൾ വിക്ഷേപിക്കാനുള്ള സാധ്യത മുൻകൂട്ടി കണ്ടുകൊണ്ട് ഇസ്രായേൽ സൈന്യവും യു.എസ് സെൻട്രൽ കമാൻഡും തമ്മിൽ ശക്തമായ ഏകോപനം തുടരുന്നുണ്ട്. സൈനിക തയ്യാറെടുപ്പുകൾക്കൊപ്പം അമേരിക്കയും ഇറാനും തമ്മിലുള്ള പരോക്ഷ ആശയവിനിമയങ്ങളും നയതന്ത്ര ശ്രമങ്ങളും തുടരുന്നുണ്ടെന്ന് സുരക്ഷാ വൃത്തങ്ങൾ അറിയിച്ചു. സാധ്യമായേക്കാവുന്ന വലിയ തോതിലുള്ള പ്രതിസന്ധികളും പ്രത്യാക്രമണങ്ങളും നേരിടാൻ ഇസ്രായേൽ സൈന്യം പൂർണ്ണ സജ്ജമായിക്കഴിഞ്ഞുവെന്നാണ് നിലവിലെ സംഭവവികാസങ്ങൾ നൽകുന്ന സൂചന.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group