ന്യൂഡൽഹി: രാജ്യത്തുടനീളമുള്ള വിവിധ ജനകീയ പോരാട്ടങ്ങളെയും പ്രതിഷേധങ്ങളെയും ഒരു കുടക്കീഴിൽ അണിനിരത്തുന്നതിനായി ‘സത്യഗ്രഹ’ എന്ന ഡിജിറ്റൽ സംരംഭത്തിന് തുടക്കമിട്ട് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. അനീതിക്കെതിരെ പോരാടുന്ന സാധാരണക്കാരുടെയും വിവിധ വിഭാഗങ്ങളുടെയും ശബ്ദങ്ങൾ ഏകോപിപ്പിച്ച് ഡിജിറ്റൽ ഭൂപടത്തിൽ (Digital Map) ലഭ്യമാക്കുകയാണ് പദ്ധതിയുടെ ലക്ഷ്യം.
യുവജനങ്ങൾ, വിദ്യാർത്ഥികൾ, കർഷകർ, ആദിവാസികൾ, ദളിതർ, സ്ത്രീകൾ തുടങ്ങി വിവിധ വിഭാഗങ്ങൾ തങ്ങളുടെ അവകാശങ്ങൾക്കായി നടത്തുന്ന ഒറ്റപ്പെട്ട പോരാട്ടങ്ങളെ ഒന്നിച്ചു കൊണ്ടുവരാനാണ് ശ്രമിക്കുന്നത്. രാജ്യത്തെമ്പാടുമുള്ള ഇത്തരം പോരാട്ടങ്ങളുടെ കഥകൾ രണ്ടു മിനിറ്റുകൊണ്ട് പോർട്ടലിൽ പങ്കുവെക്കാൻ രാഹുൽ ഗാന്ധി ആഹ്വാനം ചെയ്തു.
“സത്യമാണ് ഏറ്റവും വലിയ ആയുധമെന്ന് മഹത്മാ ഗാന്ധി നമ്മെ പഠിപ്പിച്ചിട്ടുണ്ട്. എന്നാൽ ആ സത്യത്തോടൊപ്പം ചേർന്നു നിൽക്കുന്നതാണ് അതിലും വലിയ ആയുധം. അനീതിക്കെതിരായ ഈ പോരാട്ടങ്ങൾ ഡിജിറ്റൽ ഭൂപടത്തിൽ തെളിയുമ്പോൾ നിങ്ങളെപ്പോലെ പോരാടുന്ന മറ്റുള്ളവരെ തിരിച്ചറിയാൻ സാധിക്കും. പ്രതിപക്ഷ നേതാവെന്ന നിലയിൽ പാർലമെന്റിലും തെരുവുകളിലും കത്തുകളിലൂടെയും ആവശ്യമുള്ള ഇടങ്ങളിലൊക്കെ നിങ്ങൾക്കൊപ്പം നിൽക്കുക എന്നത് എന്റെ ഉത്തരവാദിത്തമാണ്,” എന്ന് രാഹുൽ ഗാന്ധി വ്യക്തമാക്കി.
വെബ്‌‌സൈറ്റിലൂടെ ലഭിക്കുന്ന വിവരങ്ങളുടെ അടിസ്ഥാനത്തിൽ ജനകീയ പ്രശ്‌നങ്ങളിൽ നേരിട്ട് ഇടപെടാനും പാർലമെന്റിലും പുറത്തും പിന്തുണ നൽകാനുമാണ് കോൺഗ്രസ് നീക്കം.