കോഴിക്കോട്: സി.എം.ആർ.എൽ (CMRL) – എക്സാലോജിക് സാമ്പത്തിക ഇടപാടുമായി ബന്ധപ്പെട്ട കേസിൽ അന്വേഷണം ഊർജ്ജിതമാക്കി എൻഫോഴ്സ്മെന്റ് ഡയറക്ടറേറ്റ് (ഇ.ഡി). കേസുമായി ബന്ധപ്പെട്ട് കോഴിക്കോട്ടെ വ്യവസായി ഫെബീഷിനെ ഇ.ഡി മണിക്കൂറുകളോളം ചോദ്യം ചെയ്യുകയും അദ്ദേഹത്തിന്റെ ബാങ്ക് ലോക്കറിൽ പരിശോധന നടത്തുകയും ചെയ്തു. പരിശോധനയിൽ ലോക്കറിൽ നിന്ന് 50 പവനോളം സ്വർണം കണ്ടെത്തിയതായാണ് വിവരം. മുൻ മന്ത്രിയും ജനപ്രതിനിധിയുമായ പി.എ. മുഹമ്മദ് റിയാസിന്റെ സുഹൃത്താണ് ഫെബീഷ്. തിങ്കളാഴ്ചയാണ് ഫെബീഷിനെ ഇ.ഡി ചോദ്യം ചെയ്തത്.
അതേസമയം, ഇ.ഡി പരിശോധനയെയും മാധ്യമങ്ങളിലൂടെ പുറത്തുവരുന്ന വാർത്തകളെയും തള്ളി മുഹമ്മദ് റിയാസ് രംഗത്തെത്തി. കേസിന്റെ പേരിൽ രാഷ്ട്രീയ ലക്ഷ്യങ്ങളോടെയുള്ള പ്രചാരണങ്ങളാണ് നടക്കുന്നതെന്നും മാധ്യമങ്ങൾ സൃഷ്ടിക്കുന്ന ബിഗ് ബോസ് മോഡൽ കഥകൾക്ക് മറുപടി നൽകാനില്ലെന്നും അദ്ദേഹം വ്യക്തമാക്കി.