മോദീ, നിങ്ങൾ വല്ലാതെ ഭയപ്പെടുന്നുണ്ടോ, ധൈര്യമുണ്ടെങ്കിൽ ഇ.ഡിയെ വിട്ട് അന്വേഷിപ്പിക്കൂ-വെല്ലുവിളിച്ച് രാഹുൽ

ന്യൂദൽഹി: വ്യവസായികളായ അദാനിയും അംബാനിയും കോൺഗ്രസിന് കള്ളപ്പണം അയച്ചിട്ടുണ്ടോയെന്ന് സി.ബി.ഐയോ ഇ.ഡിയോ അന്വേഷിക്കണമെന്ന് ഉത്തരവിടാൻ പ്രധാനമന്ത്രി നരേന്ദ്ര മോഡിയെ വെല്ലുവിളിച്ച് കോൺഗ്രസ് നേതാവ് രാഹുൽ ഗാന്ധി രംഗത്തെത്തി. നിങ്ങൾ വല്ലാതെ പേടിച്ചിട്ടുണ്ടല്ലോ എന്നും രാഹുൽ ചോദിച്ചു.

അദാനിയെയും അംബാനിയെയും അധിക്ഷേപിക്കുന്നത് എന്തുകൊണ്ടാണ് രാഹുൽ നിർത്തിയതെന്നും അതിന് പകരം അവരിൽ നിന്ന് പണം വാങ്ങിയോ എന്നും മോഡി ചോദിച്ചിരുന്നു. ഇതിനുള്ള മറുപടിയിലാണ് രാഹുൽ ഇക്കാര്യം പറഞ്ഞത്.

“മോദിജി, നിങ്ങൾക്ക് അൽപ്പം ഭയമുണ്ടോ? സാധാരണ നിങ്ങൾ അടഞ്ഞ വാതിലുകൾക്ക് പിന്നിൽ അദാനിയെയും അംബാനിയെയും കുറിച്ച് സംസാരിക്കും, എന്നാൽ നിങ്ങൾ ആദ്യമായി പരസ്യമായി അദാനിയെയും അംബാനിയെയും കുറിച്ച് പുറത്തുപറയുന്നു.

“അവർ ടെമ്പോയിൽ പണം തരുന്നത് നിങ്ങൾക്ക് അറിയുമോ. അത് നിങ്ങളുടെ വ്യക്തിപരമായ അനുഭവമാണോ?”
“ഒരു കാര്യം ചെയ്യൂ – സിബിഐയെയും ഇഡിയെയും അവരുടെ അടുത്തേക്ക് അയച്ച് സമഗ്രമായ അന്വേഷണം നടത്തുക, ഭയപ്പെടരുത്,” അദ്ദേഹം പറഞ്ഞു.
‘ബിജെപിയുടെ അഴിമതിയുടെ സാരഥിയും സഹായിയും ആരാണെന്ന് രാജ്യത്തിന് അറിയാം,’ എക്‌സിൽ ഹിന്ദിയിൽ എഴുതിയ പോസ്റ്റിൽ ഗാന്ധി പറഞ്ഞു.

എഐസിസി ജനറൽ സെക്രട്ടറി ജയറാം രമേശും മോദിക്കെതിരെ രംഗത്തെത്തി. വ്യക്തമായ ഭൂരിപക്ഷം ലഭിക്കാത്തതിനാൽ പ്രധാനമന്ത്രി പരിഭ്രമത്തിലാണെന്നും ഇപ്പോൾ സ്വന്തം സുഹൃത്തുക്കളെ ആക്രമിക്കുകയാണെന്നും ജയറാം രമേശ് പറഞ്ഞു. “ഹം ദോ, ഹമാരേ ദോ’ എന്ന ‘പാപ്പ’ ഇന്ന് എന്താണ് പറഞ്ഞത്. തൻ്റെ രണ്ട് സുഹൃത്തുക്കളായ അദാനിക്കും അംബാനിക്കും കള്ളപ്പണത്തിൻ്റെ ടെമ്പോ ഉണ്ടെന്നാണ് അദ്ദേഹം പറയുന്നത്.”

“പ്രധാനമന്ത്രി, താങ്കളുടെ സെൻസേഷണൽ പ്രസ്താവനയിൽ നിന്ന് ചില ചോദ്യങ്ങൾ ഉയർന്നുവരുന്നു. 2016 നവംബർ 8 ന് നോട്ട് നിരോധനം പ്രഖ്യാപിക്കാൻ നിങ്ങൾ ടിവിയിൽ വന്നതാണ്. എട്ട് വർഷത്തിന് ശേഷം ഇന്ന് നിങ്ങൾ പറയുന്നത് ഈ രണ്ട് ബിസിനസുകാർക്ക് ബാഗുകൾ നിറയെ കള്ളപ്പണമുണ്ടെന്നാണ്.
ഈ രണ്ട് പേരുടെയും പക്കൽ ഇത്രയധികം കള്ളപ്പണമുണ്ടെങ്കിൽ, നിങ്ങൾ രണ്ട് മുഖ്യമന്ത്രിമാരെ അഴിമതിക്കേസിൽ ജയിലിലാക്കിയിട്ടും അവർക്കെതിരെ എന്തുകൊണ്ട് ഇഡിയും സിബിഐയും നടപടിയെടുക്കുന്നില്ല? ഇഡിയും സിബിഐയും കുംഭകർണനെ പോലെ ഉറങ്ങുകയാണോ?” ജയറാം രമേശ് ചോദിച്ചു.

“യഥാർത്ഥ കാര്യം നിങ്ങൾ ആശയക്കുഴപ്പത്തിലാണ് എന്നതാണ്. ജൂൺ 4 ന് നിങ്ങൾക്ക് വ്യക്തമായ ഭൂരിപക്ഷം ലഭിക്കുന്നില്ലെന്ന് നിങ്ങൾക്കറിയാം, അതിനാലാണ് നിങ്ങൾ അനാവശ്യ കാര്യങ്ങൾ ഉന്നയിക്കുന്നതെന്നും അദ്ദേഹം പറഞ്ഞു.