ഏദൻ: യെമൻ വിദേശ, പ്രവാസികാര്യ മന്ത്രിയായി അഫ്ര്റാഹ് അൽസൗബയെ നിയമിച്ച് പ്രസിഡന്റ് ഉത്തരവിറക്കി. യെമന്റെ ചരിത്രത്തിൽ ഈ പദവിയിലെത്തുന്ന ആദ്യ വനിതയാണ് അഫ്റാഹ്. മന്ത്രിസഭാ പുനഃസംഘടനയുടെ ഭാഗമായാണ് ഈ പുതിയ നിയമനം. പുതിയ മാറ്റങ്ങളോടെ ബദർ ബാസൽമയെ ആസൂത്രണ, അന്താരാഷ്ട്ര സഹകരണ മന്ത്രിയായും ഡോ. അഹദ് ജഅ്സൂസിനെ തദ്ദേശ ഭരണ മന്ത്രിയായും നിയമിച്ചിട്ടുണ്ട്.
ഇതുവരെ പ്രധാനമന്ത്രി തന്നെയാണ് വിദേശ, പ്രവാസികാര്യ മന്ത്രാലയത്തിന്റെ ചുമതലയും വഹിച്ചിരുന്നത്. കഴിഞ്ഞ ഫെബ്രുവരിയിൽ നിലവിൽ വന്ന യെമൻ സർക്കാരിൽ ആസൂത്രണ, അന്താരാഷ്ട്ര സഹകരണ മന്ത്രിയായിരുന്ന അഫ്ര്റാഹ്, ആ പദവിയിലെത്തുന്ന ആദ്യ വനിത കൂടിയായിരുന്നു. 2015-ന് ശേഷം യെമൻ മന്ത്രിസഭയിലേക്ക് ഒരു വനിതയുടെ ആദ്യ തിരിച്ചുവരവ് കൂടിയായിരുന്നു ഇത്.
പൊതുഭരണം, കോർപ്പറേറ്റ് ഭരണം, സാമ്പത്തിക വികസനം എന്നീ മേഖലകളിൽ 25 വർഷത്തിലേറെ പരിചയസമ്പത്തുള്ള വിദഗ്ദ്ധയാണ് അഫ്ര്റാഹ് അൽസൗബ. ദാതാക്കളുമായുള്ള പങ്കാളിത്തം കെട്ടിപ്പടുക്കുന്നതിലും അന്താരാഷ്ട്ര സഹകരണത്തിലും യെമനിലെ മുൻനിര വ്യക്തിത്വങ്ങളിൽ ഒരാളായ ഇവർ, ദാതാക്കളുടെ വാഗ്ദാനങ്ങൾ വേഗത്തിൽ ലഭ്യമാക്കുന്നതിനും പരിഷ്കരണ നയങ്ങൾ നടപ്പിലാക്കുന്നതിനുമുള്ള എക്സിക്യൂട്ടീവ് യൂണിറ്റിന്റെ ഡയറക്ടറായും മുൻപ് സേവനമനുഷ്ഠിച്ചിട്ടുണ്ട്. ഈ കാലയളവിൽ ലോകബാങ്ക്, അന്താരാഷ്ട്ര നാണയ നിധി (IMF), സൗദി വികസന പുനർനിർമ്മാണ പ്രോഗ്രാം തുടങ്ങിയ അന്താരാഷ്ട്ര പങ്കാളികളും യെമൻ സർക്കാരും തമ്മിലുള്ള ഉയർന്നതല ഏകോപനത്തിന് ഇവർ നേതൃത്വം നൽകി.
ദേശീയ പരിവർത്തന കാലഘട്ടത്തിൽ സമഗ്ര ദേശീയ സംവാദ സമ്മേളനത്തിന്റെ ഡെപ്യൂട്ടി സെക്രട്ടറി ജനറലായും ഭരണഘടനാ കരട് തയ്യാറാക്കൽ സമിതി അംഗമായും ഇവർ പ്രവർത്തിച്ചിട്ടുണ്ട്. മാനുഷിക ദുരിതാശ്വാസ, വികസന പ്രോഗ്രാമുകളിൽ പ്രധാനമന്ത്രിയുടെ ഉപദേഷ്ടാവായി സേവനമനുഷ്ഠിക്കുകയും വിവിധ അന്താരാഷ്ട്ര വേദികളിൽ യെമനെ പ്രതിനിധീകരിക്കുകയും ചെയ്ത അഫ്ര്റാഹ്, യുണൈറ്റഡ് സ്റ്റേറ്റ്സ് ഏജൻസി ഫോർ ഇന്റർനാഷണൽ ഡെവലപ്മെന്റുമായി (USAID) ചേർന്ന് ജനാധിപത്യം, ദാരിദ്ര്യ നിർമ്മാർജ്ജനം, കമ്മ്യൂണിറ്റി വികസനം എന്നീ മേഖലകളിലും അനുഭവം നേടിയിട്ടുണ്ട്.
സൻആ സർവകലാശാലയിൽ നിന്ന് ഫാർമസിയിൽ ബിരുദം നേടിയ അഫ്ര്റാഹ്, സൻആ സയൻസ് ആൻഡ് ടെക്നോളജി സർവകലാശാലയിൽ നിന്ന് ബിസിനസ് അഡ്മിനിസ്ട്രേഷനിൽ മാസ്റ്റർ ബിരുദവും മലേഷ്യയിലെ കെബാങ്സാൻ സർവകലാശാലയിൽ നിന്ന് കമ്മ്യൂണിറ്റി ഹെൽത്ത് ആൻഡ് ഹെൽത്ത് ഇക്കണോമിക്സിൽ ബിരുദാനന്തര ബിരുദവും കരസ്ഥമാക്കിയിട്ടുണ്ട്.