ദുബായ്: ദുബൈ കെ.എം.സി.സി തൃശൂർ നിയോജകമണ്ഡലം കമ്മിറ്റി ഏർപ്പെടുത്തിയ പ്രഥമ ‘സീതി സാഹിബ് കർമശ്രേഷ്ഠ പുരസ്കാരത്തിന്’ മുസ്ലിം ലീഗ് തൃശൂർ ജില്ലാ സെക്രട്ടറി പി.എ. ഷാഹുൽ ഹമീദ് അർഹനായി. മുൻ നിയമസഭാ സ്പീക്കർ സീതി സാഹിബിന്റെ സ്മരണാർത്ഥം, സാമൂഹിക സേവനരംഗത്ത് മാതൃകാപരമായ പ്രവർത്തനങ്ങൾ കാഴ്ചവെക്കുന്ന വ്യക്തിത്വങ്ങളെ ആദരിക്കുന്നതിനായാണ് ഈ പുരസ്കാരം ഏർപ്പെടുത്തിയിട്ടുള്ളത്.
തൃശൂർ ഗവ. മെഡിക്കൽ കോളേജ് കേന്ദ്രീകരിച്ച് പ്രവർത്തിക്കുന്ന സി.എച്ച് സെന്ററിന് നൽകിയ മികച്ച നേതൃത്വവും, ആശുപത്രി വികസന സമിതി അംഗമായി മൂന്ന് പതിറ്റാണ്ടിലേറെയായി നടത്തിവരുന്ന സ്തുത്യർഹമായ സേവനങ്ങളും ഉൾപ്പെടെയുള്ള നിസ്വാർത്ഥ ജീവകാരുണ്യ പ്രവർത്തനങ്ങൾ പരിഗണിച്ചാണ് അദ്ദേഹത്തെ അവാർഡിനായി പരിഗണിച്ചത്. കെ.എം.സി.സി സംസ്ഥാന പ്രവർത്തക സമിതി അംഗം മുഹമ്മദ് വെട്ടുകാട്, ജില്ലാ പ്രസിഡന്റ് ജമാൽ മനയത്ത്, ജനറൽ സെക്രട്ടറി ഗഫൂർ പട്ടിക്കര എന്നിവരടങ്ങിയ അവാർഡ് നിർണയ സമിതിയാണ് ജേതാവിനെ ഏകകണ്ഠമായി തെരഞ്ഞെടുത്തത്.
10,001 രൂപയും ശില്പവും പ്രശസ്തിപത്രവും അടങ്ങുന്നതാണ് പുരസ്കാരം. ആഗസ്റ്റ് 14 വെള്ളിയാഴ്ച വൈകുന്നേരം മൂന്നു മണിക്ക് തൃശൂർ സാഹിത്യ അക്കാദമി ഹാളിൽ നടക്കുന്ന ചടങ്ങിൽ മന്ത്രി എൻ. ഷംസുദ്ദീൻ പുരസ്കാരം സമ്മാനിക്കുമെന്ന് ഭാരവാഹികളായ ദുബൈ കെ.എം.സി.സി തൃശൂർ ജില്ലാ സെക്രട്ടറി ഷമീർ പണിക്കത്ത്, നിയോജകമണ്ഡലം പ്രസിഡന്റ് തൻവീർ കാളത്തോട്, ജനറൽ സെക്രട്ടറി മുഹമ്മദ് റസൂൽ ഖാൻ, ട്രഷറർ നൗഷാദ് പി. സലീം എന്നിവർ വാർത്താക്കുറിപ്പിൽ അറിയിച്ചു. മുസ്ലിം ലീഗ്, കെ.എം.സി.സി നേതാക്കൾ ഉൾപ്പെടെ രാഷ്ട്രീയ, സാമൂഹിക, സാംസ്കാരിക രംഗത്തെ പ്രമുഖർ ചടങ്ങിൽ സംബന്ധിക്കും.