തെഹ്റാന് – ഹോര്മുസ് കടലിടുക്കിന്റെ തെക്ക് ഭാഗത്തുകൂടി സഞ്ചരിക്കുന്നതിനിടെ മൈനുകളില് തട്ടി രണ്ട് എണ്ണ ടാങ്കറുകളില് സ്ഫോടനവും അഗ്നിബാധയുമുണ്ടായതായി ഇറാന് റെവല്യൂഷണറി ഗാര്ഡ് പ്രസ്താവനയില് അറിയിച്ചു. യു.എസ് രഹസ്യാന്വേഷണ ഏജന്സികളുടെ വഞ്ചനയിലും തെറ്റായ വിവരങ്ങളിലും കുടുങ്ങി ഹോര്മുസ് കടലിടുക്കിന് തെക്ക് ഭാഗത്തുള്ള മൈന്ഫീല്ഡ് കടക്കാന് ശ്രമിച്ച രണ്ട് എണ്ണ ടാങ്കറുകളില് സ്ഫോടനവും അഗ്നിബാധയുമുണ്ടാവുകയായിരുന്നെന്ന് പ്രസ്താവന അവകാശപ്പെട്ടു. അതേസമയം, ഹോര്മുസ് കടലിടുക്കിലെ അന്താരാഷ്ട്ര ജലപാതയില് മൈനുകളില് ഇടിച്ചതിനെ തുടര്ന്ന് രണ്ട് എണ്ണ ടാങ്കറുകളില് സ്ഫോടമുണ്ടായെന്ന റെവല്യൂഷണറി ഗാര്ഡിന്റെ അവകാശവാദങ്ങള് യു.എസ് സെന്ട്രല് കമാന്ഡ് നിഷേധിച്ചു. മിക്ക റെവല്യൂഷണറി ഗാര്ഡ് അവകാശവാദങ്ങളെയും പോലെ, ഈ അവകാശവാദവും തെറ്റാണെന്ന് എക്സിലെ പോസ്റ്റില് യു.എസ് സെന്ട്രല് കമാന്ഡ് കൂട്ടിച്ചേര്ത്തു.
ഇറാന് തുറമുഖങ്ങള്ക്കെതിരായ ഉപരോധം പൂര്ണ്ണമായി പാലിക്കുന്നുണ്ടെന്ന് ഉറപ്പാക്കാന് മൂന്ന് വാണിജ്യ കപ്പലുകള് വഴിതിരിച്ചുവിട്ടതായും ഒന്ന് ആക്രമിച്ച് പ്രവര്ത്തനരഹിതമാക്കിയതായും മറ്റൊന്നില് സൈനികര് കയറിയതായും യു.എസ് സൈന്യം അറിയിച്ചു. ഈ വാരാദ്യത്തില് ഇറാന് തുറമുഖങ്ങള്ക്കു മേല് ഏര്പ്പെടുത്തിയ പുതിയ ഉപരോധത്തിന്റെ ഭാഗമായി ഒമാന് ഉള്ക്കടലില് തങ്ങളുടെ സൈന്യം ഒരു കപ്പലില് കയറി. യു.എസ് നാവിക ഉപരോധം പൂര്ണ്ണമായി പാലിക്കുന്നുണ്ടെന്ന് ഉറപ്പാക്കാന് യുഎസ് മറൈനുകള് വെന് യാവോ എന്ന് പേരുള്ള ടാങ്കറില് കയറിയതായി യു.എസ് സെന്ട്രല് കമാന്ഡ് പ്രസ്താവനയില് പറഞ്ഞു. ചൊവ്വാഴ്ച രാത്രി 8:00 മണിക്ക് പ്രാബല്യത്തില് വന്നതിനുശേഷം ഉപരോധം ലംഘിക്കാന് ശ്രമിച്ച മൂന്ന് വാണിജ്യ കപ്പലുകള് വഴിതിരിച്ചുവിട്ടു. നിര്ദ്ദേശങ്ങള് പാലിക്കാന് വിസമ്മതിച്ച ഒരു കപ്പല് ആക്രമിച്ച് പ്രവര്ത്തനരഹിതമാക്കി.
തീരദേശ നിരീക്ഷണ, വ്യോമ പ്രതിരോധ കേന്ദ്രങ്ങള്, സൈനിക ലോജിസ്റ്റിക്സ് ഇന്ഫ്രാസ്ട്രക്ചര്, നാവിക കേന്ദ്രങ്ങള് എന്നിവയുള്പ്പെടെ ഡസന് കണക്കിന് ഇറാന് സൈനിക ലക്ഷ്യങ്ങള് ഇന്നലെ ആക്രമിച്ചതായി യു.എസ് സൈന്യം എക്സിലെ പ്രസ്താവനയില് പറഞ്ഞു.
അമേരിക്കന് വ്യോമാക്രമണത്തില് തങ്ങളുടെ തെക്കന് പവര് ഗ്രിഡിന് കേടുപാടുകള് സംഭവിച്ചതായി ഇറാന് അറിയിക്കുകയും വൈദ്യുതി ഉപഭോഗം കുറക്കാന് ജനങ്ങളോട് ആവശ്യപ്പെടുകയും ചെയ്തു. പാലങ്ങള്, തുറമുഖം, വിമാനത്താവളം, ട്രെയിന് സ്റ്റേഷന് എന്നിവ ബോംബാക്രമണത്തില് തകര്ന്നതായും റിപ്പോര്ട്ട് ചെയ്തു. ഈ ആക്രമണങ്ങളില് എട്ട് പേര് കൊല്ലപ്പെടുകയും 20 പേര്ക്ക് പരിക്കേല്ക്കുകയും ചെയ്തതായി ഔദ്യോഗിക വാര്ത്താ ഏജന്സിയായ ഇര്ന റിപ്പോര്ട്ട് ചെയ്തു.