ന്യൂയോർക്ക്– ലോകകപ്പ് പ്രീ-ക്വാർട്ടറിലെ അതിшക്തമായ പോരാട്ടത്തിൽ മുൻ ചാമ്പ്യന്മാരായ ബ്രസീൽ ഇന്ന് യൂറോപ്യൻ കരുത്തരായ നോർവേയെ നേരിടുന്നു. കളിയിലെ തന്ത്രങ്ങൾക്കൊപ്പം ബ്രസീലിനെ വേട്ടയാടുന്ന വലിയൊരു ചരിത്ര ശാപത്തിന്റെ പശ്ചാത്തലം കൂടിയുള്ളതാണ് ഈ മത്സരം. ചരിത്രത്തിൽ ഇതുവരെ ബ്രസീലിന് പരാജയപ്പെടുത്താൻ സാധിക്കാത്ത ഒരേയൊരു ടീമെന്ന റെക്കോർഡ് നോർവേയ്ക്ക് സ്വന്തമാണ്. ഇതിൽ വിജയിക്കുന്നവർ ക്വാർട്ടർ ഫൈനലിൽ ഇംഗ്ലണ്ട് അല്ലെങ്കിൽ മെക്സിക്കോ ടീമുകളിലൊന്നിനെ നേരിടും. അമേരിക്കയിലെ ന്യൂയോർക്ക് ന്യൂജേഴ്സി സ്റ്റേഡിയത്തിലാണ് മത്സരം അരങ്ങേറുന്നത്. ഇന്ത്യൻ സമയപ്രകാരം ഇന്ന് രാത്രി 1:30-നാണ് കിക്ക് ഓഫ്.
മത്സരത്തിലേക്ക് എത്തുമ്പോൾ ഇരുടീമുകളും കഴിഞ്ഞ കളിയിലെ ആവേശ വിജയങ്ങളുടെ ആത്മവിശ്വാസത്തിലാണ്. റൗണ്ട് ഓഫ് 32 പോരാട്ടത്തിൽ ഏഷ്യൻ കരുത്തരായ ജപ്പാനെ ഒന്നിനെതിരെ രണ്ട് ഗോളുകൾക്ക് തകർത്താണ് ബ്രസീൽ പ്രീ-ക്വാർട്ടർ ടിക്കറ്റെടുത്തത്. മത്സരത്തിന്റെ 96-ാം മിനിറ്റിൽ ഗബ്രിയേൽ മാർട്ടിനെല്ലി നേടിയ നാടകീയ ഗോളാണ് ബ്രസീലിന് തുണയായത്. മറുവശത്ത് ശക്തരായ ഐവറി കോസ്റ്റിനെ ഇതേ സ്കോറിന് (2-1) വീഴ്ത്തിയാണ് നോർവേ അവസാന 16-ൽ ഇടംപിടിച്ചത്.
ഫുട്ബോൾ ചരിത്രത്തിൽ ബ്രസീലിന് മുന്നിൽ തലയുയർത്തി നിൽക്കുന്ന അപൂർവ്വം ടീമുകളിലൊന്നാണ് നോർവേ. ഇരുടീമുകളും ഇതുവരെ നാല് തവണയാണ് അന്താരാഷ്ട്ര തലത്തിൽ ഏറ്റുമുട്ടിയിട്ടുള്ളത്. ഇതിൽ രണ്ട് തവണ നോർവേ വിജയിച്ചപ്പോൾ രണ്ട് മത്സരങ്ങൾ സമനിലയിൽ കലാശിച്ചു. ഒരു തവണ പോലും മഞ്ഞപ്പടയ്ക്ക് നോർവേയെ തകർക്കാനായിട്ടില്ല. 1998-ലെ ഫ്രാൻസ് ലോകകപ്പിൽ ഗ്രൂപ്പ് ഘട്ടത്തിൽ ഇരുടീമുകളും നേർക്കുനേർ വന്നപ്പോൾ ഒന്നിനെതിരെ രണ്ട് ഗോളുകൾക്ക് ബ്രസീലിനെ നോർവേ അട്ടിമറിച്ച ചരിത്രം ഇന്നത്തെ മത്സരത്തിന് ആവേശം കൂട്ടുന്നു.
മിന്നും ഫോമിലുള്ള ബ്രസീൽ ക്യാമ്പിൽ പരിക്കിന്റെ വാർത്തകൾ ആശങ്ക പരത്തുന്നുണ്ട്. മധ്യനിരയിലെ തന്ത്രജ്ഞനായ ലൂക്കാസ് പക്വേറ്റയ്ക്ക് ജപ്പാനെതിരെയുള്ള മത്സരത്തിനിടെ ഇടത് തുടയ്ക്കേറ്റ പരിക്ക് കാരണം ഇന്നത്തെ മത്സരം നഷ്ടമാകും. എങ്കിലും ടൂർണമെന്റിൽ ബ്രസീലിന്റെ ആക്രമണ നിര മികച്ച ഫോമിലാണ്. ഈ ലോകകപ്പിൽ ഇതിനകം നാല് ഗോളുകൾ അടിച്ചുകൂട്ടിയ വിനീഷ്യസ് ജൂനിയറും, മൂന്ന് ഗോളുകൾ നേടിയ മാറ്റിയൂസ് കുൻഹയും ചേരുന്ന സഖ്യത്തിലാണ് ബ്രസീലിന്റെ പ്രധാന പ്രതീക്ഷകൾ. പരിക്ക് മാറി വിംഗർ റാഫിഞ്ഞ പരിശീലനത്തിന് ഇറങ്ങിയത് ആശ്വാസകരമാണ്, എങ്കിലും താരം ഇന്ന് പകരക്കാരുടെ ബെഞ്ചിലായിരിക്കും ഉണ്ടാവുക. സൂപ്പർ താരം നെയ്മർ പൂർണ്ണ ഫിറ്റ്നസ് വീണ്ടെടുത്ത് ആദ്യ ഇലവനിൽ തന്നെയുണ്ടാകും. സീനിയർ താരം കാസിമിറോയും ഫിറ്റ്നസ് ടെസ്റ്റ് പാസായിട്ടുണ്ട്.
മറുവശത്ത് നോർവേയുടെ പ്രധാന ആയുധം മാഞ്ചസ്റ്റർ സിറ്റിയുടെ സൂപ്പർ സ്ട്രൈക്കർ എർലിങ് ഹാലൻഡാണ്. ടൂർണമെന്റിൽ ഇതുവരെ 5 ഗോളുകൾ നേടി തകർപ്പൻ ഫോമിലാണ് ഹാലണ്ട്. ഐവറി കോസ്റ്റിനെതിരെയുള്ള കഠിനമായ മത്സരത്തിന് ശേഷം ശാരീരികക്ഷീണം ഉണ്ടെന്ന് താരം സമ്മതിച്ചെങ്കിലും ഇന്നത്തെ മത്സരത്തിൽ ടീമിനെ നയിക്കാൻ ഹാലൻഡ് തന്നെയുണ്ടാകും. അന്റോണിയോ നൂസ, അലക്സാണ്ടർ സോർലോത്ത്, മാർട്ടിൻ ഒഡേഗാർഡ് എന്നിവർ ഹാലണ്ടിന് മുന്നേറ്റ നിരയിൽ പിന്തുണയേകും. പ്രതിരോധത്തിൽ റൈറ്റ് ബാക്ക് ജൂലിയൻ റയേഴ്സന്റെ പരിക്ക് നോർവേ കോച്ച് സ്റ്റാലെ സോൽബാക്കന് തലവേദനയാണ്. റയേഴ്സൻ കളിച്ചില്ലെങ്കിൽ മാർക്കസ് പെഡേഴ്സൻ ആദ്യ ഇലവനിൽ സ്ഥാനം പിടിക്കും. ടൂർണമെന്റിൽ ആക്രമണത്തിൽ മികച്ചുനിൽക്കുന്നുണ്ടെങ്കിലും ഇതുവരെ ഒരു മത്സരത്തിൽ പോലും ഗോൾ വഴങ്ങാതെ വലകാക്കാൻ നോർവേ പ്രതിരോധത്തിന് കഴിഞ്ഞിട്ടില്ല എന്നത് അവരുടെ ബലഹീനതയാണ്.