- സാമ്പത്തിക ആത്മഹത്യയായിരിക്കുമെന്നും അമേരിക്ക
വാഷിംഗ്ടണ്‍ – ഇറാന്‍ ആണവ കേന്ദ്രങ്ങളില്‍ അമേരിക്ക നടത്തിയ ആക്രമണങ്ങള്‍ക്ക് പ്രതികാരമായി ഹുര്‍മുസ് കടലിടുക്ക് അടക്കുന്നതില്‍ നിന്ന് ഇറാനെ പിന്തിരിപ്പിക്കാന്‍ സഹായിക്കണമെന്ന് അമേരിക്കന്‍ വിദേശ മന്ത്രി മാര്‍ക്കോ റൂബിയോ ചൈനയോട് ആവശ്യപ്പെട്ടു. എണ്ണ വിതരണത്തിനായി ചൈന ഹുര്‍മുസ് കടലിടുക്കിനെ വളരെയധികം ആശ്രയിക്കുന്നതിനാല്‍ ഈ വിഷയത്തില്‍ ഇറാനെ ബന്ധപ്പെടാന്‍ ഞാന്‍ ചൈനീസ് സര്‍ക്കാരിനോട് അഭ്യര്‍ഥിക്കുന്നു – റൂബിയോ ഫോക്‌സ് ന്യൂസിനോട് പറഞ്ഞു. ലോകത്തിലെ എണ്ണ ഉല്‍പാദനത്തിന്റെ അഞ്ചിലൊന്ന് കടന്നുപോകുന്ന സുപ്രധാന ജലപാതയായ ഹുര്‍മുസ് കടലിടുക്ക് അടച്ചുകൊണ്ട് ഇറാന്‍ അമേരിക്കയുടെ ആക്രമണത്തിന് മറുപടി നല്‍കുമെന്ന് വിശകലന വിദഗ്ധര്‍ പ്രവചിക്കുന്നുണ്ട്. ഹുര്‍മുസ് കടലിടുക്ക് അടക്കാന്‍ ഇറാന്‍ പാര്‍ലമെന്റ് അംഗീകാരം നല്‍കിയിട്ടുമുണ്ട്.
അവര്‍ അങ്ങനെ ചെയ്താല്‍, അത് മറ്റൊരു ഗുരുതരമായ തെറ്റായിരിക്കും. അത് അവരെ സംബന്ധിച്ചേടത്തോളം സാമ്പത്തിക ആത്മഹത്യയായിരിക്കും. അത്തരമൊരു പ്രതിസന്ധി കൈകാര്യം ചെയ്യാന്‍ അമേരിക്കക്ക് ഓപ്ഷനുകള്‍ ഉണ്ട് – റൂബിയോ കൂട്ടിച്ചേര്‍ത്തു. എന്നാല്‍ മറ്റ് രാജ്യങ്ങളും ഇത് പരിഗണിക്കണം. ഹുര്‍മുസ് കടലിടുക്ക് അടക്കുന്നത് അവരുടെ സമ്പദ്വ്യവസ്ഥയെ അമേരിക്കയെക്കാള്‍ വളരെയധികം ദോഷകരമായി ബാധിക്കും. ഇത് അമേരിക്കയില്‍ നിന്ന് മാത്രമല്ല, മറ്റുള്ളവരില്‍ നിന്നും തിരിച്ചടി അര്‍ഹിക്കുന്ന വലിയ തീവ്രത കൂട്ടലായിരിക്കുമെന്ന് ഞാന്‍ കരുതുന്നു – അമേരിക്കന്‍ വിദേശ മന്ത്രി പറഞ്ഞു.
അതേസമയം, ഇറാന്‍ ആണവ കേന്ദ്രങ്ങളില്‍ ആക്രമണം നടത്താന്‍ യു.എസ് സേന ഉപയോഗിച്ച താവളങ്ങള്‍ നിയമാനുസൃത ലക്ഷ്യങ്ങളായി ഇറാന്‍ കണക്കാക്കുമെന്ന് ഇറാന്‍ പരമോന്നത നേതാവ് അലി ഖാംനഇയുടെ ഉപദേഷ്ടാവായ അലി അക്ബര്‍ വിലായതി പറഞ്ഞു. ഇറാനിലെ യു.എസ് ആക്രമണങ്ങളെ റഷ്യക്കും നിരവധി അറബ് രാജ്യങ്ങള്‍ക്കും ഒപ്പം ചൈനയും അപലപിച്ചു. അമേരിക്കന്‍ ആക്രമണങ്ങള്‍ മധ്യപൗരസ്ത്യദേശത്ത് സംഘര്‍ഷങ്ങള്‍ വര്‍ധിപ്പിക്കുമെന്ന് ചൈന പറഞ്ഞു.