ദമാസ്കസ് – പ്രശസ്ത സിറിയന്‍ മാധ്യമപ്രവര്‍ത്തക സ്വഫാ അഹ്മദ് സിറിയന്‍ തലസ്ഥാനമായ ദമാക്‌സില്‍ ഇന്ന് പുലര്‍ച്ചെ ഇസ്രായില്‍ നടത്തിയ വ്യോമാക്രമണത്തില്‍ കൊല്ലപ്പെട്ടു. ആക്രമണത്തില്‍ മറ്റു രണ്ടു പേര്‍ കൂടി കൊല്ലപ്പെട്ടു. ഒമ്പതു പേര്‍ക്ക് പരിക്കേറ്റിട്ടുമുണ്ട്. ഇതില്‍ മൂന്നു പേരുടെ നില ഗുരുതരമാണ്. തങ്ങളുടെ മാധ്യമപ്രവര്‍ത്തക ഇസ്രായില്‍ ആക്രമണത്തില്‍ കൊല്ലപ്പെട്ടതായി ഔദ്യോഗിക സിറിയന്‍ ടെലിവിഷന്‍ പറഞ്ഞു.
കഴിഞ്ഞ ദിവസങ്ങളിലും ദമാസ്‌കസിലും സിറിയയിലെ മറ്റിടങ്ങളിലും ഇസ്രായില്‍ വ്യോമാക്രമണങ്ങള്‍ നടത്തിയിരുന്നു. സിറിയന്‍ പ്രസിഡന്റ് ബശാര്‍ അല്‍അസദിന്റെ സഹോദരന്‍ മാഹിര്‍ അല്‍അസദിനെ ലക്ഷ്യമിട്ടും കഴിഞ്ഞ ദിവസം ഇസ്രായില്‍ ആക്രമണം നടത്തിയിരുന്നു. മാഹിര്‍ അല്‍അസദിന്റെ വില്ലക്കു നേരെയാണ് വ്യോമാക്രമണം നടത്തിയത്. സംഭവ സമയത്ത് മാഹിര്‍ അല്‍അസദ് സ്ഥലത്തില്ലായിരുന്നു എന്ന് റിപ്പോര്‍ട്ടുകളുണ്ട്.