ഗാസ – ഗാസ മുനമ്പിലെ പലസ്തീൻ കുട്ടികൾക്ക് വൈദ്യസഹായം നൽകുന്നതിനായി ഫ്രാൻസിസ് മാർപാപ്പ മുമ്പ് ഉപയോഗിച്ചിരുന്ന വാഹനം മൊബൈൽ ക്ലിനിക്കായി മാറ്റി. 2014 ബെത്ലഹേം സന്ദർശന വേളയിൽ മാർപാപ്പ ഉപയോഗിച്ച പരിഷ്കരിച്ച മിത്സുബിഷി പിക്കപ്പ് ട്രക്കാണ് ഇപ്പോൾ മൊബൈൽ ക്ലിനിക്കായി രൂപാന്തരപ്പെടുത്തിയിരിക്കുന്നത്. ഈ സംരംഭത്തെ അന്തരിച്ച മാർപാപ്പ അനുഗ്രഹിക്കുകയും വാഹനം മൊബൈൽ ക്ലിനിക്കായി മാറ്റുന്നതിനുള്ള പദ്ധതിക്ക് മേൽനോട്ടം വഹിച്ച കാരിത്താസ് ജറുസലേം എന്ന കത്തോലിക്കാ സഹായ സംഘടനയെ ഏൽപ്പിക്കുകയും ചെയ്തിരുന്നു. ഗാസയിലെ കുട്ടികളുടെ ആരോഗ്യ സംരക്ഷണത്തിന് ഗൗരവമേറിയ സംഭാവന നൽകാൻ കഴിഞ്ഞതിൽ സന്തോഷമുണ്ടെന്ന് കാരിത്താസ് സെക്രട്ടറി ജനറൽ അലിസ്റ്റർ ഡട്ടൺ ബെത്ലഹേമിൽ പത്രസമ്മേളനത്തിൽ അറിയിച്ചു.
മൊബൈല്‍ ക്ലിനിക്കില്‍ പ്രതിദിനം ഏകദേശം 200 കുട്ടികളെ ചികിത്സിക്കാന്‍ കഴിയുമെന്ന് കാരിത്താസ് സ്വീഡന്‍ സെക്രട്ടറി ജനറല്‍ പീറ്റര്‍ ബ്രണ്‍ പറഞ്ഞു. എന്നാല്‍, യുദ്ധബാധിത പ്രദേശത്ത് വാഹനം എപ്പോള്‍ പ്രവേശിക്കുമെന്ന് വ്യക്തമല്ല. എത്രയും വേഗം മൊബൈല്‍ ക്ലിനിക്ക് പ്രവര്‍ത്തിപ്പിക്കാനാണ് ശ്രമമെന്ന് അലിസ്റ്റര്‍ ഡട്ടണ്‍ പറഞ്ഞു.ഗാസ യുദ്ധത്തെ കുറിച്ച് ഫ്രാന്‍സിസ് മാര്‍പാപ്പ ആവര്‍ത്തിച്ച് സംസാരിച്ചിരുന്നു. ജനുവരിയില്‍, അവിടത്തെ മാനുഷിക സാഹചര്യത്തെ ‘ലജ്ജാകരം’ എന്ന് അദ്ദേഹം വിശേഷിപ്പിച്ചു. ഹമാസിന്റെ ആക്രമണങ്ങളെ അപലപിച്ച മാർപാപ്പ, പലസ്തീൻ പോരാളികൾ ബന്ദികളാക്കിയവരെ മോചിപ്പിക്കണമെന്ന് ആവശ്യപ്പെടുകയും അവരുടെ ബന്ധുക്കളെ കാണുകയും ചെയ്തിരുന്നു. വിശുദ്ധ നാട്ടിലെയും, പ്രത്യേകിച്ച് ഗാസയിലെയും ജനങ്ങളോട് മാർപാപ്പയ്ക്ക് വലിയ സ്നേഹമുണ്ടായിരുന്നുവെന്നും ഫാദർ ഇബ്രാഹിം ഫൽത്തസ് കൂട്ടിച്ചേർത്തു.