ജറുസലേം: തന്ത്രപ്രധാനമായ ഹോർമുസ് കടലിടുക്കിൽ ഇറാൻ നടത്തുന്ന നീക്കങ്ങൾ ആഗോളതലത്തിൽ വലിയ പ്രതിസന്ധി സൃഷ്ടിക്കുന്നതായി ഇസ്രായിൽ പ്രധാനമന്ത്രി ബെഞ്ചമിൻ നെതന്യാഹു. ലോകത്തെ എണ്ണ നീക്കത്തിന്റെ പ്രധാന സിരയായ ഹോർമുസ് കടലിടുക്ക് തടസ്സപ്പെടുത്താനുള്ള ഇറാന്റെ ശേഷിയെക്കുറിച്ച് ഇസ്രായിൽ ഗൗരവമായി ചിന്തിക്കുന്നത് യുദ്ധം തുടങ്ങിയ ശേഷമാണെന്ന് അദ്ദേഹം വെളിപ്പെടുത്തി. ഒരു അന്താരാഷ്ട്ര മാധ്യമത്തിന് നൽകിയ അഭിമുഖത്തിലാണ് അദ്ദേഹം ഈ ആശങ്ക പങ്കുവെച്ചത്.
ഇറാനുമായുള്ള സംഘർഷം കേവലം പ്രാദേശികമായ ഒന്നല്ലെന്നും അത് ആഗോള സമ്പദ്വ്യവസ്ഥയെത്തന്നെ ബാധിക്കുന്നതാണെന്നും നെതന്യാഹു പറഞ്ഞു. ഹോർമുസ് കടലിടുക്കിലൂടെയുള്ള എണ്ണ വിതരണം തടസ്സപ്പെടുന്നത് അന്താരാഷ്ട്ര വിപണിയിൽ ഇന്ധനവില കുതിച്ചുയരുന്നതിനും വിവിധ രാജ്യങ്ങളിൽ കനത്ത പണപ്പെരുപ്പത്തിനും കാരണമായിട്ടുണ്ട്. ഈ സാഹചര്യം ലോകരാജ്യങ്ങൾ ഗൗരവത്തോടെ കാണണമെന്നും അദ്ദേഹം ആവശ്യപ്പെട്ടു.
മേഖലയിലെ സംഘർഷങ്ങൾക്കിടയിൽ സോഷ്യൽ മീഡിയ വഴി ഇസ്രായിലിനെതിരെ നടക്കുന്ന ആസൂത്രിത പ്രചാരണങ്ങളെയും നെതന്യാഹു വിമർശിച്ചു. അന്താരാഷ്ട്ര തലത്തിൽ ഇസ്രായിലിന് ലഭിച്ചിരുന്ന ജനപിന്തുണ കുറയ്ക്കാൻ ഇത്തരം പ്രചാരണങ്ങൾ കാരണമാകുന്നുണ്ട്. പ്രത്യേകിച്ച് അമേരിക്കയിൽ ഇസ്രായിലിനോടുള്ള സമീപനത്തിൽ വലിയ മാറ്റം വന്നിട്ടുണ്ടെന്ന് അദ്ദേഹം സമ്മതിച്ചു. ചില രാജ്യങ്ങൾ സോഷ്യൽ മീഡിയ വഴി നടത്തുന്ന ഇടപെടലുകൾ ഇസ്രായിലിന്റെ പ്രതിരോധ നീക്കങ്ങൾക്ക് തിരിച്ചടിയാകുന്നുണ്ടെന്നും അദ്ദേഹം കൂട്ടിച്ചേർത്തു.