തെഹ്റാന് – യുദ്ധം മൂലം ദീര്ഘകാലം മാറ്റിവെച്ചതിന് ശേഷം, ഇറാനിലെ യു.എസ്-ഇസ്രായില് ആക്രമണത്തിന്റെ ആദ്യ ദിനത്തില് കൊല്ലപ്പെട്ട മുന് പരമോന്നത നേതാവ് അലി ഖാംനഇയുടെ സംസ്കാര ചടങ്ങുകള്ക്ക് ഇറാന് അധികൃതര് ഒരുങ്ങുന്നു. മയ്യിത്ത് സംസ്കാര ചടങ്ങുകള്ക്ക് ഇതുവരെ തീയതി നിശ്ചയിച്ചിട്ടില്ല. മയ്യിത്ത് സംസ്കാര ചടങ്ങുകള്ക്കുള്ള ഒരുക്കങ്ങള്ക്കായി പ്രത്യേക ആസ്ഥാനം സ്ഥാപിച്ചിട്ടുണ്ടെന്നും നിരവധി വകുപ്പുകള് നിലവില് ആവശ്യമായ ആസൂത്രണത്തിലും ക്രമീകരണങ്ങളിലും പ്രവര്ത്തിക്കുന്നുണ്ടെന്നും തെഹ്റാനിലെ കോര്ഡിനേഷന് കൗണ്സില് ഫോര് ഇസ്ലാമിക് പ്രൊപ്പഗണ്ട തലവനായ മുഹ്സിന് മഹ്മൂദിയെ ഉദ്ധരിച്ച് ഇറാന് സ്റ്റേറ്റ് ടെലിവിഷന് റിപ്പോര്ട്ട് ചെയ്തു. ഔദ്യോഗിക പ്രഖ്യാപനം വന്നാലുടന്, ഗംഭീര ചടങ്ങ് നടത്താന് കഴിയുന്ന തരത്തില് ആവശ്യമായ ഒരുക്കങ്ങള് സൃഷ്ടിക്കാന് നിരവധി സംഘടനകള് പ്രവര്ത്തിക്കുന്നുണ്ടെന്നും മയ്യിത്ത് സംസ്കാര ചടങ്ങില് വമ്പിച്ച ജനപങ്കാളിത്തം പ്രതീക്ഷിക്കുന്നുണ്ടെന്നും മഹ്മൂദി പറഞ്ഞു.
മൂന്ന് പതിറ്റാണ്ടിലേറെയായി അലി ഖാംനഇ ഇറാനെ നയിച്ചു. ഫെബ്രുവരി 28 ന് ഇറാനെതിരായ ആദ്യ ആക്രമണത്തില് അദ്ദേഹം കൊല്ലപ്പെട്ടു. അലി ഖാംനഇയുടെ പിന്ഗാമിയായി പുത്രന് മുജ്തബ ഖാംനഇ അധികാരമേറ്റു. പിതാവ് അടക്കമുള്ളവര് കൊല്ലപ്പെട്ട ആക്രമണത്തില് മുജ്തബക്ക് പരിക്കേറ്റു. പരമോന്നത നേതാവായി സ്ഥാനമേറ്റതിനുശേഷം മുജ്തബ ഖാംനഇ പരസ്യമായി പ്രത്യക്ഷപ്പെട്ടിട്ടില്ല. മുന് പരമോന്നത നേതാവിന്റെ മരണത്തിന്റെ 40-ാം ദിവസം ഏപ്രിലില് ആയിരക്കണക്കിന് ഇറാനികള് ആചരിച്ചു. എന്നാല് ആദ്യം പ്രഖ്യാപിച്ചിരുന്ന ഔദ്യോഗിക മയ്യിത്ത് സംസ്കാരം യുദ്ധം കാരണം നടന്നില്ല.