കയ്‌റോ – മുസ്ലിം ബ്രദര്‍ഹുഡിനെ ഭീകര സംഘടനകളുടെ പട്ടികയില്‍ അന്തിമമായി ഉള്‍പ്പെടുത്താന്‍ ഈജിപ്ഷ്യന്‍ അധികാരികള്‍ തീരുമാനിച്ചു. തിങ്കളാഴ്ച ഔദ്യോഗിക ഗസറ്റ് പ്രസിദ്ധീകരിച്ചതു പ്രകാരം, അന്തിമ കോടതി വിധികളില്‍ ശിക്ഷിക്കപ്പെട്ട ബ്രദര്‍ഹുഡ് ഗ്രൂപ്പിലെ മൂന്ന് നേതാക്കളെയും ഭീകര പട്ടികയില്‍ സ്ഥിരമായി ഉള്‍പ്പെടുത്തിയിട്ടുണ്ട്. അബ്ദുറഹ്‌മാന്‍ ഹസ്സന്‍ മുഹമ്മദ് മെലീജി, ജമാല്‍ അബ്ദുല്‍ ഹമീദ് ജുംഅ അബ്ദുല്‍ ഹമീദ്, ഉസാമ ഇബ്രാഹിം മുഹമ്മദ് മുസ്തഫ അല്‍റഖ് എന്നിവരെയാണ് ഭീകര പട്ടികയില്‍ അന്തിമമായി ഉള്‍പ്പെടുത്തിയി ഉള്‍പ്പെടുത്തിയിരിക്കുന്നത്.
രാജ്യത്തെ നിയമമനുസരിച്ച്, ഭീകര പട്ടികയില്‍ ഉള്‍പ്പെടുത്താനുള്ള തീരുമാനം ഔദ്യോഗിക ഗസറ്റില്‍ പ്രസിദ്ധീകരിച്ച്, കോടതി വിധി നടപ്പാക്കാന്‍ ഏതാനും നിയമപരമായ നടപടികള്‍ ആവശ്യമാണ്. സംഘടനയെ നിരോധിക്കുകയും അതിന്റെ എല്ലാ പ്രവര്‍ത്തനങ്ങളും നിര്‍ത്തലാക്കുകയും ചെയ്യുക, അതിന്റെ എല്ലാ ആസ്ഥാനങ്ങളും അടച്ചുപൂട്ടുക, മീറ്റിംഗുകള്‍ നിരോധിക്കുക, നേരിട്ടോ അല്ലാതെയോ സംഘടനക്ക് ധനസഹായം നല്‍കലും ഫണ്ടുകള്‍ ശേഖരിക്കുന്നതും നിരോധിക്കുക എന്നിവ ഈ നടപടികളില്‍ ഉള്‍പ്പെടുന്നു.
സംഘടനയുടെയോ അതിന്റെ അംഗങ്ങളുടെയോ ഉടമസ്ഥതയിലുള്ള ഫണ്ടുകളും മറ്റ് ആസ്തികളും മരവിപ്പിക്കലും നടപടികളില്‍ ഉള്‍പ്പെടുന്നു. സംഘടനയില്‍ ചേരുന്നതും മറ്റുള്ളവരെ അതില്‍ ചേരാന്‍ ക്ഷണിക്കുന്നതും അതിന് പ്രോത്സാഹിപ്പിക്കുന്നതും സംഘടനയുടെ ചിഹ്നങ്ങള്‍ പ്രദര്‍ശിപ്പിക്കുന്നതും നിരോധിച്ചിരിക്കുന്നു. ഭീകരരായി പട്ടികപ്പെടുത്തിയിരിക്കുന്ന മൂന്ന് പേരെയും യാത്രാ നിരോധനം, വരവ് നിരീക്ഷണ പട്ടികയില്‍ ഉള്‍പ്പെടുത്താന്‍ നിയമം നിര്‍ബന്ധിക്കുന്നു. പട്ടികയില്‍ പെടുന്ന വിദേശ പൗരന്മാര്‍ രാജ്യത്തേക്ക് പ്രവേശിക്കുന്നതും നിയമം നിരോധിക്കുന്നു. ഭീകരരായി പ്രഖ്യാപിച്ചവരുടെ പാസ്പോര്‍ട്ടുകള്‍ റദ്ദാക്കും. ഇവര്‍ക്ക് പുതിയ പാസ്പോര്‍ട്ടുകള്‍ നല്‍കുന്നതും പുതുക്കുന്നതും നിരോധിച്ചിരിക്കുന്നു.
പട്ടികയില്‍ ഉള്‍പ്പെടുത്തിയിരിക്കുന്നവര്‍ക്ക് പൊതു, പാര്‍ലമെന്ററി, പ്രാദേശിക സ്ഥാനങ്ങള്‍ വഹിക്കുന്നതിനും പൊതുമേഖലാ ജോലികളിലോ പൊതുമേഖലാ കമ്പനികളിലോ അവരെ നിയമിക്കുന്നതിനും വിലക്കുണ്ട്.
നിലവില്‍ ജോലി ചെയ്യുന്നവരെ ശമ്പളത്തിന്റെ പകുതി മാത്രം നല്‍കി സസ്പെന്‍ഡ് ചെയ്യും. ഇവരുടെ ഉടമസ്ഥതയിലുള്ള ഫണ്ടുകളും ആസ്തികളും വരുമാനവും മരവിപ്പിക്കും. ഇവര്‍ക്ക് ധനസഹായം നല്‍കുന്നതിനും ഇവര്‍ക്കു വേണ്ടി ഫണ്ട് സ്വരൂപിക്കുന്നതിനും ഫണ്ട് സ്വീകരിക്കുന്നതിനും കൈമാറ്റം ചെയ്യുന്നതിനും സമാനമായ ഏതെങ്കിലും സാമ്പത്തിക സേവനങ്ങളില്‍ നിന്ന് പ്രയോജനം നേടുന്നതിനും വിലക്കുണ്ട്.