മസ്‌കത്ത്– മിഡിൽ ഈസ്റ്റിൽ സംഘർഷം രൂക്ഷമായതോടെ ഹോർമുസ് കടലിടുക്കിന് സമീപം വാണിജ്യ കപ്പലുകൾക്ക് നേരെയുണ്ടാകുന്ന ആക്രമണങ്ങൾ വർധിക്കുന്നു. മേഖലയിൽ ഇതുവരെ 130 ആക്രമണങ്ങൾ നടന്നതായും കൊല്ലപ്പെട്ട നാവികരുടെ എണ്ണം 25 ആയി ഉയർന്നതായും ഇന്റർനാഷണൽ മാരിടൈം ഓർഗനൈസേഷൻ (ഐ.എം.ഒ) അറിയിച്ചു. സമുദ്ര ഗതാഗത മേഖല വലിയ സുരക്ഷാ ഭീഷണിയാണ് നേരിടുന്നത്.
നവംബർ 5-ന് ‘എം.ടി വെലോസ് സഫയർ’ എന്ന എണ്ണ ടാങ്കറിന് നേരെയുണ്ടായ ആക്രമണത്തിലാണ് ഒടുവിൽ മരണം റിപ്പോർട്ട് ചെയ്തത്. നിലവിലുള്ള സംഘർഷാവസ്ഥ കാരണം അറേബ്യൻ ഉൾക്കടൽ വിട്ടുപോകാനാകാതെ ആയിരക്കണക്കിന് നാവികരാണ് കപ്പലുകളിൽ കുടുങ്ങിക്കിടക്കുന്നത്.
ലണ്ടനിൽ നടന്ന ഐ.എം.ഒ കൗൺസിൽ യോഗത്തിൽ നാവികരുടെ സുരക്ഷ ഉറപ്പാക്കേണ്ടതിന്റെ ആവശ്യകത ചർച്ച ചെയ്തു. കപ്പൽ ജീവനക്കാർക്ക് ജലവും ഭക്ഷണവും വൈദ്യസഹായവും ലഭ്യമാകാത്ത സാഹചര്യമുണ്ടെന്ന് ഐ.എം.ഒ സെക്രട്ടറി ജനറൽ ആർസെനിയോ ഡൊമിംഗ്വസ് ആശങ്ക പ്രകടിപ്പിച്ചു. സമുദ്ര പാതകളുടെ സുരക്ഷ ഉറപ്പാക്കാനും അന്താരാഷ്ട്ര നിയമവിരുദ്ധ നടപടികളിൽ നിന്ന് പിന്മാറാനും അംഗരാജ്യങ്ങളോട് യോഗം ആവശ്യപ്പെട്ടു.
ചെങ്കടലിലും ബാബ് അൽമന്ദബ് കടലിടുക്കിലും ഹൂത്തി മിലിഷ്യകൾ നടത്തുന്ന ആക്രമണങ്ങളെയും കരിങ്കടലിലെ റഷ്യൻ ആക്രമണങ്ങളെയും കൗൺസിൽ ശക്തമായി അപലപിച്ചു. കൂടാതെ പടിഞ്ഞാറൻ ഇന്ത്യൻ മഹാസമുദ്രത്തിലും ഏദൻ ഉൾക്കടലിലും കടൽക്കൊള്ള വർധിച്ചുവരുന്നതായും ഈ വർഷം മാത്രം 17 സംഭവങ്ങൾ രേഖപ്പെടുത്തിയതായും യോഗം ചൂണ്ടിക്കാട്ടി.