അഹമ്മദാബാദ്– ഗുജറാത്തിലെ അഹമ്മദാബാദ് വിമാനപകടത്തില് മലയാളി ഉള്പ്പെടെ 133 പേര് മരണപ്പെട്ടതായി ന്യൂസ് 18 റിപ്പോര്ട്ട് ചെയ്തു. ഗുജറാത്ത് മുന് മുഖ്യമന്ത്രി വിജയ് രൂപയാണിയും വിമാനത്തിലുണ്ടായിരുന്നു. ടേക്ക് ഓഫ് ചെയ്ത് മിനിറ്റുകള്ക്കുള്ളില് വിമാനം തകര്ന്നു വീഴുകയായിരുന്നു. വിമാനത്തിന്റെ മിക്ക ഭാഗങ്ങളും കത്തിയമര്ന്നു. അപകടത്തിന്റെ കാരണം ഇതുവരെ വ്യക്തമായിട്ടില്ല. പറന്നുയര്ന്ന ഉടനെ തകര്ന്ന വിമാനം ബഹുനില കെട്ടിടങ്ങളുള്ള ജനവാസ മേഖലയില് തകര്ന്നു വീണതിനാല് മരണ സംഖ്യ ഭയജനകമായി ഉയരുമെന്നാണ് സൂചന. 675 അടി ഉയരത്തിലാണ് സിഗ്നല് നഷ്ടമായതെന്ന് ഫ്ളൈറ്റ് റഡാര് വിവരങ്ങള് വ്യക്തമാക്കുന്നു.
വിമാന അപകടത്തില് മരിച്ച മലയാളി തിരുവല്ല പുല്ലാട് സ്വദേശിനി രഞ്ജിത ഗോപകുമാരന് നായരാണെന്നാണ് വിവരം. അപകടത്തില് പെട്ട ആരും രക്ഷപ്പെട്ടിട്ടില്ലെന്ന് പ്രദേശത്തെ കേരള സമാജം ഭാരവാഹികള് പറഞ്ഞു. മൃതദേഹങ്ങള് തിരിച്ചറിയാനാകാത്ത രൂപത്തിലാണുള്ളത്. വിമാനം തകര്ന്ന് വീണ കെട്ടിടത്തില് താമസിച്ചിരുന്നവര്ക്കും പരുക്കുണ്ട് അഹമ്മദാബാദ് ബി.ജെ.മെഡിക്കല് കോളജിന്റെ ഹോസ്റ്റല് കെട്ടിടത്തിന്റെ ഒരുഭാഗം തകര്ന്നു.