ചാമ്പ്യൻസ് ലീഗ്; ബയേണിനെ തളച്ച് പി.എസ്.ജി ഫൈനലിൽ

മ്യൂണിക്– ആവേശകരമായ രണ്ടാം പാദ സെമി ഫൈനലിൽ ബയേൺ മ്യൂണിക്കിനെ സമനിലയിൽ തളച്ച് പാരീസ് സെന്റ് ജെർമെയ്ൻ (PSG) തുടർച്ചയായി രണ്ടാം തവണവ യുവേഫ ചാമ്പ്യൻസ് ലീഗ് ഫൈനലിൽ പ്രവേശിച്ചു. അലിയൻസ് അരീനയിൽ നടന്ന പോരാട്ടത്തിൽ ഇരു ടീമുകളും ഓരോ ഗോൾ വീതം നേടി പിരിഞ്ഞെങ്കിലും, ഇരു പാദങ്ങളിലുമായി 6-5 എന്ന അഗ്രിഗേറ്റ് സ്കോറിനാണ് ഫ്രഞ്ച് കരുത്തർ കലാശപ്പോരാട്ടത്തിന് യോഗ്യത നേടിയത്. മേയ് 30-ന് ബുഡാപെസ്റ്റിൽ നടക്കുന്ന ഫൈനലിൽ ഇംഗ്ലീഷ് ക്ലബ്ബ് ആഴ്സണലാണ് പി.എസ്.ജിയുടെ എതിരാളികൾ.
​
​മത്സരം തുടങ്ങി മൂന്നാം മിനിറ്റിൽ തന്നെ ഉസ്മാൻ ഡെംബെലെയിലൂടെ പി.എസ്.ജി ലീഡെടുത്തു. ആദ്യ പാദത്തിലെ 5-4 എന്ന മുൻതൂക്കത്തിന് പുറമെ ഈ ഗോൾ കൂടി വന്നതോടെ ബയേൺ സമ്മർദ്ദത്തിലായി. രണ്ടാം പകുതിയിൽ ഗോളടിക്കാൻ ബയേൺ കിണഞ്ഞു ശ്രമിച്ചെങ്കിലും പി.എസ്.ജി പ്രതിരോധം വിള്ളലില്ലാതെ കാത്തു. മത്സരത്തിന്റെ ഇഞ്ചുറി ടൈമിൽ (90+4′) സൂപ്പർ താരം ഹാരി കെയ്ൻ ബയേണിനായി സമനില ഗോൾ നേടിയെങ്കിലും അഗ്രിഗേറ്റ് സ്കോറിൽ ഒപ്പമെത്താൻ അത് മതിയാകുമായിരുന്നില്ല.