ദുബായ്: എഎഫ്‌സി ചാംപ്യന്‍സ് ലീഗിലെ അല്‍ നസറിന്റെ മല്‍സരം ദുബായിലേക്ക് മാറ്റി. ഇറാന്‍ ക്ലബ്ബ് എസ്തഗല്‍ തെഹ്‌റാനുമായുള്ള മല്‍സരമാണ് മാറ്റിയത്. ഇറാന്‍-ഇസ്രായേല്‍ സംഘര്‍ഷം നിലനില്‍ക്കുന്നതിനാല്‍ സുരക്ഷ പ്രശ്‌നം മുന്‍ നിര്‍ത്തിയാണ് മല്‍സരം ദുബായിലേക്ക് മാറ്റിയത്. ചൊവ്വാഴ്ചയാണ് സൗദി പ്രോ ലീഗ് ക്ലബ്ബായ ക്രിസ്റ്റിയാനോ റൊണാള്‍ഡോയുടെ അല്‍ നസര്‍ എസ്‌തെഗല്‍ തെഹ്‌റാനുമായി ഏറ്റുമുട്ടുക.
ഒക്ടോബര്‍ രണ്ടിന് നടക്കേണ്ട മോഹന്‍ ബഗാന്റെ ഇറാന്‍ ക്ലബ്ബുമായുള്ള മല്‍സരം ഒഴിവാക്കിയിരുന്നു. ട്രാക്ടര്‍ എസ് സി ആയിരുന്നു മോഹന്‍ബഗാന്റെ എതിരാളികള്‍. എന്നാല്‍ ട്രാക്ടര്‍ എസ് സിയുടെ മറ്റൊരു മല്‍സരവും ദുബായിലേക്ക് മാറ്റിയിട്ടുണ്ട്. തജകിസ്താന്‍ ക്ലബ്ബായ റാവഷന്‍ ഓഫ് തജകിസ്താനുമായാണ് ട്രാക്ടര്‍ എസ് സി ഏറ്റുമുട്ടുക. ഈ മല്‍സരം ബുധനാഴ്ചയാണ്. എന്നാല്‍ എഎഫ്‌സിയുടെ ഈ നടപടിക്കെതിരേ മോഹന്‍ ബഗാന്‍ രംഗത്തെത്തിയിട്ടുണ്ട്.
മോഹന്‍ ബഗാനും സമാനമായ പരിഗണന നല്‍കണമെന്നും ബഗാന്റെ മല്‍സരം ദുബായില്‍ വച്ച് നടത്താനുള്ള തീരുമാനം ഉടന്‍ പ്രതീക്ഷിക്കുന്നതായും ക്ലബ്ബ് അറിയിച്ചു. മല്‍സരത്തിന് പുതിയ വേദി അനുവദിക്കാനായി എഎഫ്‌സി കത്തയച്ചതായി മോഹന്‍ ബഗാന്റെ വക്താവ് അറിയിച്ചു.