ടെക്സസ്: കോപ്പ അമേരിക്ക ഫുട്ബോള് ടൂര്ണമെന്റില് പുതു ചരിത്രമെഴുതി കാനഡ. കോപ്പാ അമേരിക്കാ ടൂര്ണ്ണമെന്റില് കന്നിയങ്കത്തിനെത്തിയ ടീം സെമിയില് കടന്നു. ഇന്ന് നടന്ന ക്വാര്ട്ടറില് വെനസ്വേലയെ പെനാല്റ്റി ഷൂട്ടൗട്ടില് തകര്ത്താണ് കാനഡയുടെ കുതിപ്പ്. സെമിയില് നിലവിലെ ചാംപ്യന്മാരായ അര്ജന്റീനയാണ് കാനഡയുടെ എതിരാളികള്.
ഇഞ്ചോടിഞ്ച് പോരാട്ടത്തിനൊടുവില് പെനാല്റ്റി ഷൂട്ടൗട്ടിലാണ് വെനസ്വേലയെ തോല്പിച്ച് കാനഡ കോപ്പ അമേരിക്കയുടെ സെമിയിലേക്ക് കടന്നുകയറിയത്. നിശ്ചിത സമയത്ത് ഇരു ടീമുകളും ഓരോ ഗോള് വീതം നേടി സമനില പിടിച്ചു. കാനഡയാണ് മല്സരത്തില് ലീഡെടുത്തത്. 13ാം മിനിറ്റില് ജേക്കബ് ശെഫല്ബര്ഗിലൂടെയാണ് സ്കോര് ചെയ്തത്. 64ാം മിനിറ്റില് ജോസ് സലമോണ് റോണ്ടന് വെനസ്വേലയ്ക്കായി ഗോള് മടക്കി. മത്സരം സമനിലയിലായതിനെ തുടര്ന്ന് പെനാല്റ്റി ഷൂട്ടൗട്ടിലേക്ക് നീങ്ങുകയായിരുന്നു.
ഷൂട്ടൗട്ടില് കാനഡ 4-3ന്റെ ജയമാണ് വെനസ്വേലക്കെതിരെ സ്വന്തമാക്കിയത്. വെനസ്വേലയുടെ യാംഗല് ഹെറേര, ജെഫേഴ്സന് സവാറിയോ, വില്കര് ഏയ്ഞ്ചല് എന്നിവരുടെ കിക്കുകള് പാഴായപ്പോള് ജോണ്ടര് കാഡിസ്, തോമസ് റിന്കോണ്, സോളമന് റോണ്ടന് എന്നിവര് ലക്ഷ്യം കണ്ടു. അതേസമയം കാനഡയില് സൂപ്പര് താരം അല്ഫോന്സോ ഡേവീസും ഇസ്മായില് കോനെയും മോയ്സ് ബോംബിറ്റോയും ജൊനാഥന് ഡേവിഡും വലകുലുക്കി. സ്റ്റീഫന് എസ്സ്താക്യൂ, ലിയാം മില്ലര് എന്നിവരുടെ ഷോട്ടുകളാണ് പാഴായത്. ഗ്രൂപ്പ് ഘട്ടത്തില് ഇരു ടീമും ഏറ്റുമുട്ടിയപ്പോള് ജയം അര്ജന്റീനയ്ക്കൊപ്പമായിരുന്നു.മല്സരത്തിലുട നീളം വാമോസിന് ഭീഷണി ഉയര്ത്താന് ഇത്തിരികുഞ്ഞന്മാര്ക്ക് ആയിരുന്നു.