ഗുവാഹതി: ദക്ഷിണാഫ്രിക്കക്കെതിരായ രണ്ടാം ടെസ്റ്റിൽ ഇന്ത്യ ദയനീയമായ സ്ഥിതിയിൽ. ഒന്നാമിന്നിങ്‌സിൽ 489 റൺസ് അടിച്ചുകൂട്ടിയ ദക്ഷിണാഫ്രിക്കയ്‌ക്കെതിരെ ഇന്ത്യയുടെ ഒന്നാം ഇന്നിങ്‌സ് വെറും 201 റൺസിൽ അവസാനിച്ചു. 93 റൺസുമായി ദക്ഷിണാഫ്രിക്കയെ കൂറ്റൻ സ്‌കോറിലെത്തിച്ച മാർക്കോ യാൻസൻ ആറു വിക്കറ്റുമായി തിളങ്ങിയപ്പോൾ ഇന്ത്യൻ ബാറ്റിങ്ങിന്റെ നടുവൊടിഞ്ഞു.
288 റൺസ് ലീഡുള്ള ദക്ഷിണാഫ്രിക്ക ഇന്ത്യയെ ഫോളോ ഓണിന് നിർബന്ധിക്കാതെ രണ്ടാം ഇന്നിങ്‌സ് ബാറ്റിങ് ആരംഭിച്ചു.
ഈഡൻ ഗാർഡൻസിൽ നടന്ന ആദ്യ ടെസ്റ്റിൽ പരാജയം രുചിച്ച ഇന്ത്യയ്ക്ക് പരമ്പര സമനിലയാക്കാൻ ഗുവാഹതിയിലെ മത്സരത്തിൽ ജയം അനിവാര്യമാണ്. എന്നാൽ, സെനുരൻ മുത്തുസാമിയുടെ (109) സെഞ്ച്വറിയും യാൻസന്റെയും (93) സ്റ്റബ്‌സ് (49), കെയ്ൽ വെറൈൻ (45), നായകൻ ടെംബ ബവുമ (41) എന്നിവരുടെ മികച്ച ഇന്നിങ്‌സുകളും ദക്ഷിണാഫ്രിക്കയ്ക്ക് മികച്ച സ്‌കോർ നേടിക്കൊടുത്തു.
രണ്ടാം ദിനം വെളിച്ചക്കുറവ് മൂലം കളിനിർത്തുമ്പോൾ വിക്കറ്റ് നഷ്ടമാകാതെ ഒമ്പത് എന്ന നിലയിലായിരുന്ന ഇന്ത്യ, മൂന്നാം ദിനമായ ഇന്ന് കൂട്ടത്തകർച്ച നേരിടുകയായിരുന്നു. യശസ്വി ജയ്‌സ്വാളും (58) ലോകേഷ് രാഹുലും (22) ചേർന്ന ഒന്നാം വിക്കറ്റ് സഖ്യം 65 റൺസ് ചേർത്തെങ്കിലും ഇരുവരും മടങ്ങിയതോടെ തകർച്ച തുടങ്ങി. സായ് സുദർശൻ (15), ധ്രുവ് ജുറേൽ (0), ക്യാപ്ടന് ഋഷഭ് പന്ത് (7), വെറ്ററൻ താരം രവീന്ദ്ര ജഡേജ (6), നിതീഷ് കുമാർ റെഡ്ഡി (10) എന്നിവരെല്ലാം കാര്യമായ പോരാട്ടമില്ലാതെ കീഴടങ്ങി.
ഏഴു വിക്കറ്റിന് 122 എന്ന നിലയിൽ തകർന്നടിഞ്ഞ ആതിഥേയരെ വൻ നാണക്കേടിൽ നിന്ന് രക്ഷിച്ചത് വാഷിങ്ടൺ സുന്ദറും (48) കുൽദീപ് യാദവും (19) ചേർന്ന എട്ടാം വിക്കറ്റ് സഖ്യമാണ്. മൂന്ന് ഓവർ ഇടവേളയിൽ ഇരുവരും മടങ്ങിയതിനു പിന്നാലെ ദക്ഷിണാഫ്രിക്ക ഇന്ത്യയെ ഓൾഔട്ടാക്കി.
ഋഷഭ് പന്ത്, ജുറേൽ, ജഡേജ, നിതീഷ് കുമാർ, കുൽദീപ് യാദവ്, ജസ്പ്രിത് ബുംറ എന്നിവരാണ് മാർക്കോ യാൻസന് ഇരയായത്. സൈമൺ ഹാർമർ മൂന്നുവിക്കറ്റെടുത്തപ്പോൾ കേശവ് മഹാരാജിന് ഒരു വിക്കറ്റ് ലഭിച്ചു.