റിയാദ് – സൗദി അറേബ്യയുടെ തലസ്ഥാനമായ റിയാദിൽ സ്ഥാപിക്കുന്ന ലോകത്തിലെ ഏറ്റവും വലിയ സ്പോർട്സ് ടവറിന്റെ ഡിസൈനിന് സ്പോർട്സ് ബൊളിവാർഡ് ഫൗണ്ടേഷൻ (എസ്.ബി.എഫ്) അംഗീകാരം നൽകി. എസ്.ബി.എഫ് ഡയറക്ടർ ബോർഡ് ചെയർമാനും കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ അധ്യക്ഷനായ ഡയറക്ടർ ബോർഡാണ് ഗ്ലോബൽ സ്പോർട്സ് ടവറിൻ്റെ ഡിസൈനുകൾക്ക് അംഗീകാരം നൽകിയത്. പ്രിൻസ് മുഹമ്മദ് ബിൻ സൽമാൻ ബിൻ അബ്ദുൽ അസീസ് റോഡിലെ സ്പോർട്സ് ബൊളിവാർഡിലാണ് സ്പോർട്സ് ടവർ വരുന്നത്.
130 മീറ്റർ ഉയരമുള്ള ഗ്ലോബൽ സ്പോർട്സ് ടവർ ലോകത്തിലെ ഏറ്റവും ഉയരം കൂടിയ സ്പോർട്സ് ടവറാണ്. മൊത്തം ആന്തരിക വിസ്തീർണ്ണം 84,000 ചതുരശ്ര മീറ്ററാണ്. 30-ലധികം വ്യത്യസ്ത കായിക ഇനങ്ങൾക്ക് ഇവിടെ സൗകര്യമുണ്ടായിരിക്കും. 98 മീറ്ററുള്ള ലോകത്തിലെ ഏറ്റവും ഉയരം കൂടിയ ഇൻഡോർ ക്ലൈംബിംഗ് മതിലും ഇതിൽ ഉൾപ്പെടും. തുടക്കക്കാർ മുതൽ പ്രൊഫഷണൽ വരെ എല്ലാ തലങ്ങളിൽ നിന്നുമുള്ള പർവതാരോഹകർക്ക് ക്ലൈബിംഗിന് അവസരമുണ്ടായിരിക്കും. ലോകത്തിലെ ഏറ്റവും ഉയരം കൂടിയ റണ്ണിംഗ് ട്രാക്കും ഉണ്ടാകും. പൂർണ്ണമായും ഡിജിറ്റൈസ് ചെയ്‌തതും 250 മീറ്റർ സർക്യൂട്ടും ഉള്ളതിനാൽ, ഏതൊരു കായികതാരത്തിനും റിയാദിൻ്റെ മികച്ച കാഴ്‌ചകൾ ആസ്വദിക്കാനാകും.
ലോകത്തിലെ ഏറ്റവും ഉയരം കൂടിയ സ്പോർട്സ് ടവറും സ്പോർട്സ് ബൊളിവാർഡ് പദ്ധതിയുടെ പ്രധാന നാഴികക്കല്ലുമായ ഗ്ലോബൽ സ്പോർട്സ് ടവർ സൗദി വിഷൻ 2030ൻ്റെ ലക്ഷ്യങ്ങൾ കൈവരിക്കും. റിയാദിലെ ജീവിത നിലവാരം ഉയർത്തുന്നതിനാണ് ടവർ സജ്ജീകരിച്ചിരിക്കുന്നത്. ആഗോളതലത്തിൽ മികച്ച 10 സമ്പദ്‌വ്യവസ്ഥകളിലൊന്നായി റിയാദ് മാറും.
രാജ്യത്തിൻ്റെ സമ്പദ്‌വ്യവസ്ഥയെ ക്രിയാത്മകമായി സ്വാധീനിക്കുകയും അന്താരാഷ്ട്ര നിലവാരം ഉയർത്തുകയും ചെയ്യുമെന്ന് വാഗ്ദാനം ചെയ്യുന്ന റിയാദിൻ്റെ ഭാവി നഗര അന്തരീക്ഷത്തിലേക്കുള്ള പാലമായാണ് ഈ പദ്ധതി വിഭാവനം ചെയ്തിരിക്കുന്നത്.
കാൽനടയാത്രക്കാർ, സൈക്ലിസ്റ്റുകൾ, കായികതാരങ്ങൾ, കുതിരസവാരിക്കാർ എന്നിവർക്കായി സുരക്ഷിതമായ ഹരിത പാതകളിലൂടെ പടിഞ്ഞാറ് വാദി ഹനീഫയെയും കിഴക്ക് വാദി അൽ സുലൈയെയും ബന്ധിപ്പിക്കുന്ന സ്പോർട്സ് ബൊളിവാർഡ് പദ്ധതിക്ക് 135 കിലോമീറ്ററിലധികം നീളമുണ്ടാകും. പദ്ധതിയിൽ 4.4 ദശലക്ഷം ചതുരശ്ര മീറ്റർ പച്ചപ്പും തുറസ്സായ സ്ഥലങ്ങളും 50 വരെ മൾട്ടി ഡിസിപ്ലിനറി കായിക സൗകര്യങ്ങളും ഉൾപ്പെടുന്നു. കൂടാതെ, മൊത്തം വിസ്തീർണ്ണം 3 ദശലക്ഷം ചതുരശ്ര മീറ്ററാണ്.
ലോകത്തിലെ ആദ്യത്തെ സ്പോർട്സ് ടവർ കൂടിയായിരിക്കും ഇത്. രാജ്യത്തിൻ്റെ അന്തർദേശീയ അഭിലാഷങ്ങളെ ഉയർത്തുക മാത്രമല്ല, താഴെത്തട്ടിലുള്ള കായിക പങ്കാളിത്തം പ്രോത്സാഹിപ്പിക്കുന്നതിനുള്ള സൗകര്യങ്ങൾ നൽകുകയും ചെയ്യുന്ന ഒരു യഥാർത്ഥ കായിക നവോത്ഥാനം കൂടിയാണ് ഇതുവഴി സാധ്യമാക്കുക.
മൗലികതയിലും ആധുനികതയിലും അധിഷ്ഠിതമായ സൽമാനി വാസ്തുവിദ്യ അടിസ്ഥാനമാക്കിയാണ് സ്പോർട്സ് ടവർ സജ്ജമാക്കിയിരിക്കുന്നത്. 2019 മാർച്ച് 19 ന് തിരുഗേഹങ്ങളുടെ സേവകൻ സൽമാൻ ബിൻ അബ്ദുൽ അസീസ് രാജാവാണ് പദ്ധതി പ്രഖ്യാപിച്ചത്.