വാഷിംഗ്ടൺ – ഇറാനിൽ വെടിയേറ്റ് വീണ എഫ്-15 ഈഗിൾ വിമാനത്തിലെ അമേരിക്കൻ സൈനികനെ സാഹസികമായി രക്ഷപ്പെടുത്തിയതിന്റെ വിശദാംശങ്ങൾ പ്രസിഡന്റ് ഡൊണാൾഡ് ട്രംപ് വെളിപ്പെടുത്തി. കടുത്ത പരിക്കുകളും രക്തസ്രാവവും ഉണ്ടായിരുന്നിട്ടും, തനിക്ക് ലഭിച്ച പ്രത്യേക പരിശീലനത്തിന്റെ കരുത്തിൽ പൈലറ്റ് രണ്ട് ദിവസത്തോളം ഇറാൻ സൈന്യത്തിന്റെ കണ്ണുവെട്ടിച്ച് മലനിരകളിൽ ഒളിച്ചു കഴിഞ്ഞു. സ്വയം ചികിത്സ തേടുകയും ദുർഘടമായ പാറക്കെട്ടുകൾ കയറി സുരക്ഷിത സ്ഥാനത്തെത്തുകയും ചെയ്ത പൈലറ്റ്, അത്യാധുനിക ഉപകരണങ്ങൾ വഴിയാണ് തന്റെ സ്ഥാനം സൈന്യത്തെ അറിയിച്ചത്. പൈലറ്റിനെ പുറത്തെത്തിക്കാൻ ബോംബർ വിമാനങ്ങളും ടാങ്കറുകളും ഉൾപ്പെടെ 155 വിമാനങ്ങൾ പങ്കെടുത്ത വമ്പിച്ച രക്ഷാദൗത്യമാണ് അമേരിക്ക നടത്തിയത്. ഇറാൻ സൈന്യത്തിന്റെ ശ്രദ്ധ തിരിക്കാൻ ഏഴ് സ്ഥലങ്ങളിൽ ഒരേസമയം സൈന്യത്തെ വിന്യസിച്ചതായും, അമേരിക്കൻ സാങ്കേതികവിദ്യ ഇറാൻ കൈക്കലാക്കാതിരിക്കാൻ കേടുപാടുകൾ പറ്റിയ രണ്ട് വിമാനങ്ങൾ തകർത്തു കളഞ്ഞതായും ട്രംപ് വ്യക്തമാക്കി.
യുദ്ധവുമായി ബന്ധപ്പെട്ട് ബ്രിട്ടന്റെ നിലപാടിനെ ട്രംപ് രൂക്ഷമായി വിമർശിച്ചു. ബ്രിട്ടന്റെ പക്കൽ പഴയതും പ്രവർത്തനക്ഷമമല്ലാത്തതുമായ വിമാനവാഹിനിക്കപ്പലുകളാണുള്ളതെന്നും നാറ്റോ സഖ്യകക്ഷിയെന്ന നിലയിൽ അവർ അമേരിക്കയെ സഹായിക്കുന്നില്ലെന്നും അദ്ദേഹം കുറ്റപ്പെടുത്തി. താൻ ഒരു ബിസിനസുകാരനാണെന്നും അതിനാൽ തന്നെ ഇറാന്റെ എണ്ണ കൈക്കലാക്കാൻ ആഗ്രഹിക്കുന്നുണ്ടെന്നും ട്രംപ് തുറന്നുപറഞ്ഞു. വെനസ്വേലയുമായുള്ള യുദ്ധം വെറും 45 മിനിറ്റിനുള്ളിൽ അവസാനിപ്പിച്ച് കോടിക്കണക്കിന് ബാരൽ എണ്ണ പിടിച്ചെടുത്ത അനുഭവം അദ്ദേഹം ഓർമ്മിപ്പിച്ചു. യുദ്ധത്തിൽ വിജയിക്കുന്നവർക്ക് അതിന്റെ ലാഭം ലഭിക്കണമെന്നതാണ് തന്റെ നയമെന്നും, വെനസ്വേലയിൽ നിന്ന് ലഭിച്ച എണ്ണയിലൂടെ യുദ്ധച്ചെലവിനേക്കാൾ വലിയ തുക അമേരിക്ക സമ്പാദിച്ചുവെന്നും അദ്ദേഹം അവകാശപ്പെട്ടു.
ഇറാന്റെ സൈനിക ശേഷിയും അടിസ്ഥാന സൗകര്യങ്ങളും തകർക്കാൻ അമേരിക്കയ്ക്ക് വേഗത്തിൽ സാധിക്കുമെന്നും അത് പുനർനിർമ്മിക്കാൻ അവർക്ക് 15 വർഷമെങ്കിലും വേണ്ടിവരുമെന്നും ട്രംപ് പറഞ്ഞു. ഇറാൻ ഭരണകൂടത്തെ ഒരു കാരണവശാലും ആണവായുധങ്ങൾ നിർമ്മിക്കാൻ അനുവദിക്കില്ലെന്നും അദ്ദേഹം വ്യക്തമാക്കി. ഇറാനിലെ ജനങ്ങളെയും ഭരണകൂടത്തെയും രൂക്ഷമായ ഭാഷയിൽ വിമർശിച്ച ട്രംപ്, അവിടുത്തെ വൈദ്യുതി നിലയങ്ങളും പാലങ്ങളും തകർക്കുന്നത് യുദ്ധക്കുറ്റമാകില്ലേ എന്ന മാധ്യമപ്രവർത്തകന്റെ ചോദ്യത്തിന്, അവർ മൃഗങ്ങളും രാക്ഷസന്മാരുമാണെന്നാണ് മറുപടി നൽകിയത്. ഇറാന്റെ ആണവമോഹങ്ങൾ ആഗോള സമാധാനത്തിന് ഭീഷണിയാണെന്നും അതിനാൽ ഒത്തുതീർപ്പുകൾക്ക് താൻ തയ്യാറല്ലെന്നും അദ്ദേഹം ഉറപ്പിച്ചു പറഞ്ഞു.