യു.കെ.ജിയിൽ കയറിയ അനുഭവം; മന്ത്രിസ്ഥാനവും സിനിമയും ഒരുമിച്ച് കൊണ്ടുപോകുമെന്ന് കേന്ദ്രന്ത്രി സുരേഷ് ഗോപി

ന്യൂഡൽഹി: യു.കെ.ജിയിൽ കയറിയ അനുഭവമാണ് ഇപ്പോഴെന്ന് കേന്ദ്ര പെട്രോളിയം, ടൂറിസം സഹമന്ത്രിയായി ചുമതലയേറ്റ നടൻ സുരേഷ് ഗോപി പറഞ്ഞു. വകുപ്പു വിഭജനം പൂർത്തിയായതിനു പിന്നാലെ ശാസ്ത്രി ഭവനിലെ മന്ത്രാലയത്തിലെത്തി മന്ത്രിസ്ഥാനം ഏറ്റെടുത്തശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ശരിക്കും ഞാനിപ്പോൾ ഒരു യു.കെ.ജി വിദ്യാർത്ഥിയാണ്. തീർത്തും പുതിയ സംരംഭമാണ് ഏറ്റെടുത്തത്. സീറോയിൽനിന്നാണ് സ്റ്റാർട്ട് ചെയ്യുന്നത്. എല്ലാമൊന്ന് പഠിച്ചോട്ടെ. കേരളത്തെ ടൂറിസം രംഗത്ത് ഭാരതത്തിന്റെ തിലകക്കുറിയാക്കുമെന്നും അദ്ദേഹം പറഞ്ഞു.
ജനങ്ങൾക്കു വേണ്ടി പ്രവർത്തിക്കും. ജനങ്ങളാണ് ഈ അവസരം നൽകിയത്. തൃശൂരിലുടെ കേരളത്തിന്റെ വികസനം യാഥാർത്ഥ്യമാക്കുമെന്നും സുരേഷ് ഗോപി വ്യക്തമാക്കി. പെട്രോളിയം, പ്രകൃതിവാതക മന്ത്രാലയം മന്ത്രി ഹർദീപ് സിങ് പുരി സുരേഷ് ഗോപിയെ സ്വീകരിച്ച് കസേരയിലേക്ക് ആനയിച്ചു. വകുപ്പ് സെക്രട്ടറിമാരും ചടങ്ങിൽ പങ്കെടുത്തു.
ശേഷം ട്രാൻസ്‌പോർട്ട് ഭവനിലുള്ള ടൂറിസം വകുപ്പ് കാര്യാലയത്തിലെത്തി ടൂറിസം വകുപ്പ് സഹമന്ത്രിയായും ചുമതലയേറ്റു. കേരളത്തെ ടൂറിസം ഹബ്ബാക്കുമെന്നും ഇതുവരെ ആരും കണ്ടെത്താത്ത ടൂറിസം മേഖലകൾ കണ്ടെത്തി പ്രോത്സാഹിപ്പിക്കുമെന്നും സുരേഷ് ഗോപി പറഞ്ഞു.
മന്ത്രിസ്ഥാനവും സിനിമയും ഒരുമിച്ച് കൊണ്ടുപോകും. ക്ലീൻ സ്ലേറ്റിലാണ് ഞാൻ തുടങ്ങുന്നത്. യഥാർത്ഥ ഇന്ത്യ എന്താണോ അത് മറ്റ് രാജ്യങ്ങൾക്കു മുന്നിൽ അവതരിപ്പിക്കണം. മനസിലുള്ള കാര്യങ്ങൾ കാബിനറ്റ് മന്ത്രിയെ അറിയിക്കും. ശേഷം വിശദപദ്ധതികൾ തയ്യാറാക്കും. അടുത്ത വർഷംമുതൽ തൃശൂർ പൂരം മികച്ച രീതിയിൽ നടത്തും. ഇത് ഞാൻ നൽകിയ ഉറപ്പാണ്. അടുത്ത ദശാബ്ദത്തിന്റെ ടൂറിസം എന്താണെന്ന് പരിചയപ്പെടുത്തുമെന്നും മന്ത്രി വ്യക്തമാക്കി.